Ŋúnuyi 119 - Cebaara Bible 2010Ŋúnuyi 119 Kolocɔlɔɔ làlwaw kalàrala ní wi bìngaari kéele 1 Syɛ́ɛnbèle bele be nyɔɔ n foro be kôdanʔari ni lè, ní i táanri ni yɛlɛgi ní Yawe làlwaw ní lè, bele bee i nyɛ dùba pìibēle! 2 Bele be wi kajoogèle kɔn lè, ní i wi caa ní be fúnyi myɛ ní, bele bee i nyɛ dùba pìibēle! 3 Pe tɔ̀nɔ́ o sìnzinmɛ kele kpéʔele í, kàjáa pe i táanri ni yɛlɛgi ní wi kólogi kèlē ní. 4 Mɔ n mɔ làlwaw kèlē joo n kaan jàngó wo ge sámaga wo cò ní yákirii ní. 5 Ki n yɛlɛ mii tánʔaganmi í báriga, jàngó mii í mɔ kajoogèle cò! 6 Lǎli ni mii ga mɔ kajoodɛɛngèle myɛ kéele kpɔ́ʔɔ lè fɛ̀ɛrɛ a mii taa í. 7 Mii a ra mɔ kpɔ̀ʔɔrɔ́ ní mii fúngi ní wozinge ní, lǎli ni mii ga ni mɔ sínni làlwa kajoogéle tama lè. 8 Mii a mɔ lalwaw kèlē sámaga cò, mɔ a kɔ́ mii cée péw í! 9 Mɛ̀ɛ́ nìgɔcariɔ a wi kólogi sámaga gi pye fɔɔnrɔ fun? Ki n yɛlɛ wi mɔ syɛ́ɛnri sámaga wi cò. 10 Mii i mɔ caa ní mii fúngi myɛ ní, mɔ a kɔ́ mii yaʔa mii í pùuni bi láʔa mɔ kajoodɛɛngèle na í! 11 Mii n mɔ syɛ́ɛnri kɔn mii fúngi ni, koro ga pye mii a kɔ́ kapeele pye mɔ na í. 12 Mɔ na kpɔ̀ʔɔrɔli yɛlɛ, Yawe! Mii tama mɔ lalwaw kèlē na! 13 Mii nyɔɔwari i mɔ nyɔ́ɔgi kajoogéle myɛ fíligi ni nyuu. 14 Mii i fundaanra kpéʔele mɔ séeraw kèlē kôdanʔara na, àmɛɛ lɔnɛʔɛrɛ taala nyɛ lè. 15 Mii a ra sɔ̀ngí mɔ kajoogèle na, si kòro bàā mɔ kólogi kèlē jàtée. 16 Mɔ kajoogèle ge nyɛ mii kínidɛnɛgi kèlē, mii a fɛ̀ʔɛ mɔ syɛ́ɛnri na í. 17 Kacànna kpéʔele mɔ falipyew na, wi lè mii, koro ga pye mii í kòro sìi na, si mii sɔ̀ngumi yaʔa mɔ syɛ́ɛnri na! 18 Mii nyapiigèle múgu koro ga pye mii í da bìngaari kèlē nyaagi mɔ lalwaw ni! 19 Mii i nyɛ nibɔɔn tári na, mɔ a kɔ́ mɔ kajoodɛɛngèle làriga mii na í. 20 Mɔ lalwaw kajoogéle láa i gbàngí mii na gbanʔama mii fúngi ni làrigèle myɛ ni. 21 Mɔ i fúlo nɛ̀ɛnyɛnɛgi fɔ̀ɔlɔ na pe dánga lè, poro bele be pùuni n léeli mɔ kajoodɛɛngèle na lè. 22 Tɛʔɛlɛyi ní faʔari láʔa mii na, níì cán mii n mɔ kajoogèle kɔn! 23 Fànʔafɔbiigèle n tɛ́ɛn n joo mii kánmi na, kàjáa mɔ falipyew i sɔ̀ngí mɔ lalwaw kèlē na. 24 Mɔ kajoogèle ge nyɛ mii kínidɛnɛgi kèlē, koro ge mii lálii. 25 Mii pǐli n tan támiigi na, mii yaʔa mii í pye sìi na bi yɛlɛ ní mɔ syɛ́ɛnri ní! 26 Mii n mii kozɔ̀lɔyi kéele joo n tɛ̀ɛn, a mɔ lóʔo mii ma, mii tama mɔ kajoogèle na! 27 Mɔ làlwaw kèlē kólogo tɛ̀ɛn mii na, mii a ra sɔ̀ngí mɔ bingaari kèlē na! 28 Mii fúngi i nyaan kayaagi báriga ni, da fànʔa nii mii ni bi yɛlɛ ní mɔ syɛ́ɛnri ní! 29 Jànvaa kólogi léeli mii na, mí mɔ lalwaw tɛ̀ɛn mii na mɔ funjǎngi báriga ni. 30 Mii n kányɛɛgi kólogo nyɛ́nɛ n wòlo, mii n mɔ lalwaw kajoogéle tɛ́ʔɛ niyɛɛ yɛ́ʔɛ ma. 31 Mii n niyɛɛ bwɔɔ mɔ kajoogèle na. Yawe, mɔ a kɔ́ fɛ̀ɛrɛ yaʔa di mii taa í! 32 Mii i fé mɔ kajoodɛɛngèle kólogo ni, níì cán mɔ n mii fúngi télege ŋɔ́ndaala ni. 33 Yawe, mii tama mɔ lalwaw kèlē na koro ga pye mii í ge kɔn bi taa sa nan gi kwɔ́ɔmi na! 34 Sícilimɛ kaan mii ma, koro ga pye mii í mɔ lalwaw sámaga cò, sáā sɔ̀ngí wi na ní mii fúngi myɛ ní! 35 Mii dɛ̀ɛmɛ mii í da táanri mɔ kajoodɛɛngèle kólogo ni! Níì cán ge kéeli n mii dɛ́nɛ. 36 Mii fúngi fíige mɔ kajoogèle kàbaan na, mɔ a kɔ́ gi yaʔa gi fíige tɔ̀nɔpeew kàbaan na í! 37 Mii nyapiigèle yirige gbanzan yáriri ni, sìi kaan mii ma mɔ kólogi ni! 38 Mɔ nyɔɔfaligi foro mɔ falipyew ma wi nyɛ lè ní mɔ yɛ́ɛgi fyáafɔɔlɔ ní! 39 Faʔari léeli mii na, toro dee na mii fɛ̀ɛgí lè gbanʔama! Níì cán mɔ lalwaw kajoogéle n nyɔɔ. 40 Wéle, mɔ lalwaw kajoogéle láa tɔ̀nɔ́ i nyɛ mii na, sìi kaan mii ma mɔ sínni báriga ni! 41 Yawe, ki n yɛlɛ mɔ kpɔ́ʔɔri í nan mii na, ti lè mɔ syɔɔli, bi yɛlɛ ní mɔ nyɔɔfaligi ní! 42 Kánmi bee na mii a gbǎn syɛɛnlurugori kaan mii faʔafɔw ma, níì cán mii n niyɛɛ daʔa mɔ syɛ́ɛnri na. 43 Mɔ a kɔ́ kányɛɛgi syɛ́ɛnrɛ láʔa mii nyɔ́ɔgi na nyáana í! Níì cán mɔ kajoo-mí-cerigèle na mii mii sɔ̀ngumi taʔa. 44 Mii a mɔ lalwaw sámaga cò bànlaʔa ni, làla o làla, kwɔ́ɔmɔ fun. 45 Mii a ra nyaari fáa, níì cán mii i mɔ lalwaw kajoogéle tama. 46 Mii a ra mɔ kajoogèle nyuu fànʔafɔbèle nyɛ́nɛ na, fɛ̀ɛrɛ si a tée mii taa í. 47 Mii kínidɛnɛgi kèlē ge nyɛ mɔ kajoodɛɛngèle, ke kéeli n mii dɛ́nɛ. 48 Mii a mii kɔ́yi yìrige mɔ kajoodɛɛngèle ma, ke kéeli n mii dɛ́nɛ, mii a ra sɔ̀ngí mɔ lalwaw kèlē na. 49 Sɔ̀ngi mi taa mɔ syɛ́ɛnri na, dee mɔ joo mɔ falipyew ma lè, níì cán toro mɔ pye mii sɔ̀ngumi tɛɛtaʔaga! 50 Toro di mii kpɛʔɛlɛ mii wɔʔɔgi làla ni, níì cán mɔ nyɔɔfaligi i sìi kaangi mii ma. 51 Nɛ̀ɛnyɛnɛgi fɔ̀ɔlɔ i mii kpàná, kàjáa mii ga téè wàli n yiri mɔ lalwaw kólogo ni í. 52 Mii i sɔ̀ngí ni taagi mɔ booma kútiiw kèlē na, ee Yawe, a gee bee i mii kpɛʔɛlɛ. 53 Kayaagbɔʔɔ n too mii na syɛɛnpeebèle kéele na, poro bele be mɔ lalwaw yaʔa lè. 54 Mɔ lalwaw kèlē ge nyɛ mii ŋúnuyi nyúngo, n mii yaʔa kpáagi ni, gee ni mii nyɛ lè nibɔɔn. 55 Mii i sɔ̀ngí ni taagi mɔ mɛ́ɛgi na yébiligi ni, ee Yawe! Ní i mɔ lalwaw có. 56 Koro si gi nyɛ mii yataagi, níì cán mii n mɔ lalwaw kajoogéle sámaga n cò. 57 Mii lɛɛli, ee Yawe! Mii a gi joo si jo, loro li nyɛ mɔ syɛ́ɛnri còlo. 58 Mii i mɔ caa ní mii fúngi myɛ ní, nyɔɔ mii na bi yɛlɛ ní mɔ nyɔɔfaligi ní! 59 Mii i sɔ̀ngí mii kóloyi kéele na, níì mii tɔ́lɔyi fíige mɔ kajoogèle kàbaan na. 60 Mii ga gi yaʔa kàdoʔo ma í, mii n kɔlɔ̀ wári ni sɔ̀ngí mɔ kajoodɛɛngèle kéele na. 61 Syɛɛnpeebèle mɛ́ɛngéle n mii cò, kàjáa mii ga fɛ̀ʔɛ mɔ lalwaw na í. 62 Mii i yìrigí nyǐnlɛɛgi na ni bariga kaangi mɔ ma, mɔ sínni kajoo-mí-cerigéle báriga ni. 63 Mii i nyɛ mɔ yɛ́ɛgi fyáafɔɔlɔ myɛ pínɛnyɛnnɛ, ní bele be mɔ lalwaw kajoogéle cò lè. 64 Ee Yawe, mɔ funjǎngi n tári nyìn. Mii tama mɔ lalwaw kèlē na! 65 Mɔ n kacànna pye mɔ falipyew na, ee Yawe, n yɛlɛ ní mɔ syɛ́ɛnri ní. 66 Mii tama kérigèle cán-mí-wàlila, ní cánni na! Níì cán mii n tága mɔ kajoodɛɛngèle na. 67 Sáni fɔ̀rɔgi í too mii na lè, mii maa ni pùuní. Kàjáa tɔ́ɔliw ni, mii n mɔ syɛ́ɛnri kɔn. 68 Mɔ n nyɔɔ, ní i nyɛ kacànbyeo. Mii tama mɔ lalwaw kèlē na! 69 Nɛ̀ɛnyɛnɛgi fɔ̀ɔlɔ i jànvaaw taari mii na. Mii si n mɔ lalwaw kajoogéle cò ní mii fúngi myɛ ní. 70 Pe fúnyi i nyɛ máanri, móō sìnmɛ bii. Mii si na, mɔ lalwaw wi nyɛ mii kínidɛnɛgi kèlē. 71 Mii n wɔʔɔ, a koro pye mii ma kacànna, koro ga pye mɔ lalwaw kèlē í mii tama. 72 Mɔ nyɔ́ɔgi syɛ́ɛnrɛ n mii dɛ́nɛ n sɔ̀lɔ tɛ́ɛw, ní wálifiiw yárira saala kagunɔ kagunɔbèlē saʔa na. 73 Mɔ kɔ́yi yi mii faan níì mii sámaga n yérige. Sícilimɛ kaan mii ma koro ga pye mii í da mɔ kajoodɛɛngèle tama bàā cángi! 74 Bele be fɛ̀ɛgí mɔ na lè, pe i mii nyaagi ní i fundaanra kpéʔele, níì cán mii n mii sɔ̀ngumi taʔa mɔ syɛ́ɛnri na. 75 Ee Yawe, mii n gi cán ncan mɔ kútiiw kèlē n sín, mɔ kányɛɛgi báriga ni mɔ mii wɔʔɔ. 76 Ki n yɛlɛ mɔ funjǎngi í mii kpɛʔɛlɛ bi yɛlɛ ní mɔ nyɔɔfaligi ní, gee mɔ kpéʔele mɔ falipyew ma lè! 77 Mɔ funjǎngi yaʔa gi nan mii na jàngó mii í sìi taa! Níì cán mɔ lalwaw wi nyɛ mii kínidɛnɛgi kèlē. 78 Ki n yɛlɛ fɛ̀ɛrɛ í nɛ̀ɛnyɛnɛgi fɔ̀ɔlɔ taa poro bele be fɔ̀rɔyi cáan mii na lè nyùngo fun! Mii si na, mii i sɔ̀ngí mɔ lalwaw kajoogéle na. 79 Bele be fɛ̀ɛgí mɔ na lè, ki n yɛlɛ poro í pan mii ma, poro bele be mɔ kajoogèle cán lè! 80 Ki n yɛlɛ mii fúngi í fílige mɔ kajoogèle kàbaan na koro ga pye fɛ̀ɛrɛ a kɔ́ mii taa í! 81 Mii fúngi i káagi mɔ syɔɔli kurugo, mɔ syɛ́ɛnri na mii niyɛɛ daʔa. 82 Mii nyapiigèle i káagi mɔ nyɔɔfaligi kurugo, mii i gi nyuu níì jo: «Làlìí ni mɔ a mii kpɛʔɛlɛ?» 83 Níì cán mii i nyɛ àmɛɛ kpàbi nyɛ, wee be tɛ́ʔɛ wírige ni lè. Kàjáa mɔ lalwaw kèlē ga fɛ̀ʔɛ mii ni í. 84 Jòorí mɔ fálipyew sìi canya nyɔ́ɔ nyɛ? Làlìí ni mɔ a kútiiw cáan mii wɔʔɔfɔbèle na? 85 Nɛ̀ɛnyɛnɛgɛ fɔɔlɔ i weeye túru mii yɛ́ʔɛ ma, gee bee si ga pínɛ ní mɔ lalwaw ni í dɛ. 86 Mɔ kajoodɛɛngèle myɛ i nyɛ kányɛʔɛ wòʔolo. Syɛ́ɛnbèle i mii wɔʔɔ nyùngo fun, tɔ́ɔ mi mii dɛ̀ɛmɛ! 87 Cɛɛri wi da kòro pé mii kwɔ́ɔ bi láʔa yaà. Kàjáa mii ga mɔ lalwaw kajoogéle yaʔa í. 88 Sìi kaan mii ma bi yɛlɛ ní mɔ funjǎngi ní, koro ga pye mii í mɔ nyɔ́ɔgi kajoogéle cò! 89 Ee Yawe, mɔ syɛ́ɛnri i yaà làla o làla nyɛ̀ʔɛni na! Ti a tée kwɔ́ɔ í. 90 Mɔ kányɛɛgi a kòro beè yìrigèle myɛ syɛ̀ɛnnɛ ma. Mɔ n tári sámaga n yérige, a di kòro nya. 91 Mɔ kajoo-mí-cerigèle báriga ni yáriri myɛ nyɛ beè níjanʔa, níì cán yafaanri myɛ i nyɛ mɔ fáliw na. 92 Kapye mɔ lalwaw da pye mii kínidɛnɛgi kèlē í, lǎli bee ni mii mǎà dée kálagi mii wɔʔɔgi ni. 93 Mii a tée fɛ̀ʔɛ mɔ lalwaw kajoogéle na nyáana í, níì cán koro bárigaw ni mɔ sìi kaan mii ma. 94 Mii i nyɛ mɔ wóo, mii syɔɔ! Níì cán mɔ lalwaw kajoogéle mii caa. 95 Syɛɛnpeebèle i mii laba bi mii kálagi. Kàjáa mii i mɔ kajoogèle lúro. 96 Gee myɛ gi nyɔɔ n foro lè, mii i gi láʔali nyaagi, kàjáa mɔ kajoodɛɛngèle i nyɛ tɛɛ̀laʔala fun ni. 97 Mɔ lalwaw kéele n tɔ̀nɔ n mii dɛ́nɛ! Mii i wi kéeli sɔ̀ngí canbogi myɛ ni. 98 Mɔ kajoodɛɛnni i sícilimɛ kaangi mii ma n sɔ̀lɔ mii nigoobèle na, níì cán li i nyɛ mii ma canʔa o canʔa. 99 Mii n cánna taa n sɔ̀lɔ mii tamafɔbèle myɛ na, níì cán mii i sɔ̀ngí mɔ kajoogèle na. 100 Mii n sícilimɛ taa n sɔ̀lɔ wolɛɛbèle na, níì cán mii n mɔ lalwaw kajoogéle kɔn. 101 Mii i mii tɔ́lɔyi léeli kobeeyi myɛ na koro ga pye mii í da mɔ syɛ́ɛnri sámagi da kɔ̀rɔsíi. 102 Mii ga téè niyɛɛ wàli n láʔa mɔ lalwaw kajoogéle na í, níì cán mɔ wi mii tama ge na. 103 Mɔ syɛ́ɛnri n tɔ́ɔ̀ tɛ́nɛ mii nyɔ́ɔgi na, ti n tɛ́nɛ mii nyɔ́ɔgi na n sɔ̀lɔ sárigā na! 104 Mɔ kajoogèle i sícilimɛ kaangi mii ma koro na jànvaa kólogaa faala kéele ga mii dɛ́nɛ í. 105 Mɔ syɛ́ɛnri i nyɛ fètinnɛ mii tɔ́lɔyi ma, ní gbɛ̀ɛnmɛ mii kólogi ni. 106 Mii n kàli, mii a gi foro, mii n jo, mii a mɔ sínni kajoogéle sámaga cò. 107 Mii n wɔʔɔ gbanʔama, ee Yawe, sìi kaan mii ma bi yɛlɛ ní mɔ syɛ́ɛnri ní! 108 Ee Yawe, fɔ̀lɔ mii nyɔɔsaliyi yakanʔa na! Mí mii tama mɔ kajoogèle na! 109 Mii pǐli i nyɛ kùúw nyɔ́ɔ na làla o làla, kàjáa mɔ lalwaw o fɛ̀ʔɛ́ mii ni í. 110 Syɛɛnpeebèle n karinyanga le mii yɛ́ʔɛ ma, kàjáa mii ga pùuni n láʔa mɔ lalwaw kèlē na í. 111 Mɔ kajoogèle ge nyɛ mii kɔ́rigi làla o làla, koro ge nyɛ mii fúngi fundaanra. 112 Mii n mii sɔ̀ngumi taʔa mɔ lalwaw kèlē na, ni táanri ge na canʔa o canʔa bi taa sa nan gi kwɔ́ɔmi na. 113 Fúnyi siin-ziin fɔ̀ɔlɔ kéele n mii bɛɛn, á mɔ lalwaw kéele si mii dɛ́nɛ. 114 Mɔ wi nyɛ mii tɛɛlàragi ní mii tunmɔzige-yárigi, mɔ syɛ́ɛnri na mii niyɛɛ daʔa. 115 Ye léeli mii na, yele syɛɛnpeebèle koro ga pye mii í mii Kolocɔlɔw kajoodɛɛngēle cò. 116 Mii tɔʔɔ mi cò bi yɛlɛ ní mɔ syɛ́ɛnri ní, koro ga pye mii í sìi taa, mɔ a kɔ́ fɛ̀ɛrɛ yaʔa di mii taa mii sɔ̀ngumi tɛɛtaʔaga kéele na í! 117 Pye mii tɛɛ̀sigigi, jàngó mii í syɔɔ, si kòro bi mii sɔ̀ngumi taʔa mɔ lalwaw kèlē na! 118 Syɛ́ɛnbèle bele myɛ be pùuni n mɔ lalwaw kèlē yaʔa lè, mɔ n be ŋɔrigɔ n wáa, níì cán jànvaaw myɛ be pwɔɔ lè, wi i nyɛ gbanzan. 119 Mɔ i tári syɛɛnpeebéle myɛ kwóo ni yirigi yaà àmɛɛ tunmɔvire nyɛ lè, koro na mɔ kajoogèle mii dɛ́nɛ. 120 Mii céri i cɛ̀lɛ́ mii na mɔ yɛ́ɛgi fyáara báriga ni, mɔ kútiiw kèlē fyáara i nyɛ mii na. 121 Mii n kányɛɛgi ní sínni kèlē sámaga n cò, mɔ a kɔ́ mii le mii wɔʔɔfɔbeebèle kɔ́yɔ ni í! 122 Miyɛɛ le mɔ falipyew lariga ni wi nyɔɔmi kéele na. Mɔ a kɔ́ nɛ̀ɛnyɛnɛgi fɔ̀ɔlɔ yaʔa be fànʔa cáan mii na í! 123 Mii nyapiigèle i káagi mɔ syɔɔli kurugo, ní mɔ sínni nyɔɔfaliga kurugo. 124 Ki n yɛlɛ mi mɔ falipyew kéele cɔɔnri bi yɛlɛ ní mɔ funjǎngi ní, mii tama mɔ lalwaw kèlē na! 125 Mii i nyɛ mɔ falipyeo, sícilimɛ kaan mii ma, koro ga pye mii í mɔ kajoogèle cán! 126 Lǎli n nan Yawe, mɔ í yarigaa kpéʔele, pe i mɔ lalwaw kálagi. 127 Koro na mɔ kajoodɛɛngèle kéele mii dɛ́nɛ n sɔ̀lɔ tɛ́ɛw na, àlí tɛɛtelew na. 128 Koro na mii i mɔ kajoogèle myɛ córo ke n sín, jànvaa kóloyi myɛ kéele n mii bɛɛn. 129 Mɔ kajoogèle i nyɛ bìngaara kele, koro na mii ge có mii fúngi ni. 130 Mɔ syɛ́ɛnri tɛ̀ɛnnɛ i gbɛ̀ɛnmɛ yirigi, ti i sícilimɛ kaangi kanaa-sìnjánbèle ma. 131 Mii n mii nyɔ́ɔgi múgu ni ŋɔ́ngi ni fɔ̀ngí, níì cán mɔ kajoodɛɛngèle láa n mii taa gbanʔama. 132 Mɔ yɛ́ɛgi fíige mii ma, mí nyɔɔ mii na bi yɛlɛ ní mɔ kalɛɛli ní bele kàbaan na, bele mɔ mɛ́ɛgi kéele dɛ́nɛ lè! 133 Mii tɔ́lɔyi sámaga mi yérige bi yɛlɛ ní mɔ syɛ́ɛnri ní, mɔ a kɔ́ sìnzinmaa faala yaʔa bi tɛ́ɛn mii nyúngi na í! 134 Mii syɔɔ fǎngi ma, gee syɛ́ɛnbèle cáan mii na lè, koro ga pye mii í mɔ lalwaw kèlē cò! 135 Mɔ yɛ́ɛgi gbɛ̀ɛnmɛ yirige mɔ falipyew ma, mii tama mɔ lalwaw kèlē na. 136 Lɔ̀ʔɔ saʔa i fóo ni yirigi mii nyapiigèle ni, níì cán pe o mɔ lalwaw có í. 137 Mɔ n sín, ee Yawe! Mɔ kajoo-mí-cerigèle n sín. 138 Mɔ n mɔ kajoogèle télege sínni na, ní kányɛɛgi na, gee gi kpɔ́ʔɔ lè. 139 Mii kayaagi n mii lìi, níì cán mii kàsiitun-nyɛ́nbèle n fɛ̀ʔɛ mɔ syɛ́ɛnri na. 140 Mɔ syɛ́ɛnri myɛ bìnɛw tɔ̀nɔ́ i nyɛ wodelere ní, ti kéeli n mɔ falipyew dɛ́nɛ. 141 Mii n fɛ́gɛfɛgɛ ní i nyɛ yafaʔala, kàjáa mii o fɛ̀ʔɛ́ mɔ lalwaw kèlē na í. 142 Mɔ sínni i nyɛ bàngwɔɔ sínnɛ, mɔ lalwaw i nyɛ kányɛʔɛ. 143 Wɔʔɔgi ní fóomi n nan mii na. Kàjáa mɔ kajoodɛɛngèle ge nyɛ mii kínidɛnɛgi kèlē. 144 Mɔ kajoogèle n sín kwɔ́ɔmɔ fun, sícilimɛ kaan mii ma, jàngó mii í pye sìi na! 145 Mii i mɔ mɛ́ɛgi yiri ní mii fúngi myɛ ní, lóʔo mii ma, Yawe, koro ga pye mii í mɔ lalwaw kèlē cò! 146 Mii i mɔ mɛ́ɛgi yiri, mii syɔɔ, koro ga pye mii í mɔ kajoogèle cò! 147 Mii i yìrigí nyǐnjerigi yɛ́ʔɛ na ni yákpoli wáa, mii n mii sɔ̀ngumi taʔa mɔ syɛ́ɛnri na. 148 Mii nyapiigèle i múru yébiligi kɔ̀rɔsiifɔɔlɔ larivalila yɛ́ʔɛ na jàngó bàā mɔ syɛ́ɛnri sɔ̀ngí. 149 Mii yákpoli lóʔo mɔ funjǎngi báriga ni! Sìi kaan mii ma, Yawe, bi yɛlɛ ní mɔ kajoo-mí-cerigèle ní! 150 Bele be fé kapeegi kurugo lè, pe i nùuní naa, pe i léeli mɔ lalwaw na. 151 Mɔ n nùuni naa, Yawe! Mɔ kajoodɛɛngèle myɛ i nyɛ kányɛʔɛ. 152 Nlaa yaà booma ni, mii n gi cán mɔ kajoogèle báriga ni ncan mɔ n ge télege ge kòro beè làla o làla. 153 Mii wɔʔɔgi kéele wéle, mí mii syɔɔ! Níì cán mii o fɛ̀ʔɛ́ mɔ lalwaw na í. 154 Ba fàra mii na mi mii nyúngi syɔɔ. Mii yaʔa mii í pye sìi na bi yɛlɛ ní mɔ nyɔɔfaligi ní! 155 Syɔɔli n léeli syɛɛnpeebèle na, níì cán pe o mɔ lalwaw kèlē caa í. 156 Mɔ nyínimi n tɔ̀nɔ n nɛʔɛ, ee Yawe! Mii yaʔa mii í pye sìi na bi yɛlɛ ní mɔ kajoo-mí-cerigèle ní! 157 Mii wɔʔɔfɔbèle ní mii kàsiitun-nyɛ́nbèle n nɛʔɛ. Mii si o wɛ̀ɛ́ ni láari mɔ kajoogèle na í. 158 Mii n syɛɛnco-mí-kaanbèle nyaa, pe kéeli n mii bɛɛn, poro bele be lè pe o sɔ̀ngí mɔ syɛ́ɛnri na í. 159 Ki n yɛlɛ mi gi cán mɔ lalwaw kèlē n mii dɛ́nɛ, Yawe, sìi kaan mii ma bi yɛlɛ ní mɔ funjǎngi ní! 160 Ki myɛ nyúngo i nyɛ mɔ syɛ́ɛnri i nyɛ kányɛʔɛ, mɔ sínni làlwa kèlē myɛ si i nyɛ bàngwɔɔ. 161 Fànʔafɔbiigèle i mii wɔʔɔ nyùngo fun, kàjáa mɔ syɛ́ɛnri yagana kéele na mii zɔ̌nw cɛ̀lɛ́. 162 Mii i fundaanra kpéʔele mɔ syɛ́ɛnri kéele na, àmɛɛ syɔɔnwaa nyɛ, wee wi lɔnɛʔɛrɛ taa n koli lè. 163 Jànvaaw kéele n mii bɛɛn, wi i nyɛ mii ma yapeʔe, kàjáa mɔ lalwaw kéele n mii dɛ́nɛ. 164 Mii i mɔ sòoló tɔlɔyɔ kɔrɔsiin canbogi ni, mɔ sínni làlwa kèlē kéele na. 165 Bele mɔ lalwaw kéele dɛ́nɛ lè, yɛɛ̀nyinge saʔa i nyɛ be ma, yafyɛn a be kaan be kpírige í. 166 Mii n mii sɔ̀ngumi taʔa mɔ syɔɔli na, ee Yawe, ní i mɔ kajoodɛɛngèle kpéʔele. 167 Mii pǐli n mɔ kajoogèle cò, ge kéeli n mii dɛ́nɛ gbanʔama. 168 Mii n mɔ lalwaw kèlē, ní mɔ kajoogèle cò, níì cán mɔ nyɛ́nɛ i nyɛ mii kóloyi myɛ na. 169 Ki n yɛlɛ mii sùpili í nan mɔ na, Yawe! Sícilimɛ kaan mii ma bi yɛlɛ ní mɔ syɛ́ɛnri ní. 170 Mii nyɛ́ɛrigbɔɔgi n yɛlɛ gi nan mɔ na! Mii syɔɔ mi yɛlɛ ní mɔ nyɔɔfaligi ní! 171 Mii nyɔɔwari n yɛlɛ bàā sòololi kéele càrí da yirigi! Níì cán mɔ i mii tama mɔ lalwaw kèlē na. 172 Mii nyínni n yɛlɛ bàā mɔ syɛ́ɛnri ŋúu ŋúnugo, níì cán mɔ kajoodɛɛngèle myɛ n sín. 173 Ki n yɛlɛ mɔ kɔ́gi í mii dɛ̀ɛmɛ! Níì cán mɔ kajoogèle mii nyɛ́nɛ n wòlo. 174 Mɔ syɔɔli láa n gbàn mii na, ee Yawe! Mɔ lalwaw si i nyɛ mii fundaanri. 175 Mii pǐli n yɛlɛ li pye sìi na sáā mɔ sòoló, mɔ kajoo-mí-cerigèle si mii dɛ̀ɛmɛ. 176 Mii n curugo àmɛɛ bàpuunio nyɛ lè, mɔ falipyew caa! Níì cán mii o fɛ̀ʔɛ́ mɔ kajoodɛɛngèle na í. |
Kolocɔlɔɔ Syɛ́ɛnri © Bible Society of Côte d'Ivoire, 2008.
Bible Society of Côte d'Ivoire