Ŋúnuyi 118 - Cebaara Bible 2010

Ŋúnuyi 118 Bi pye sìi na sáā Yawe kapyegèle kéele nyuu da tèé

¹ Yaa bariga kaangi Yawe ma níì cán wi n nyɔɔ, wi funjǎngi a tée kwɔ́ɔ í!

² Isirayɛli kpáagi wòolo n yɛlɛ bàā gi nyuu si jo: Wi funjǎngi a tée kwɔ́ɔ í!

³ Aarɔn kpáagi wòolo n yɛlɛ bàā gi nyuu si jo: Wi funjǎngi a tée kwɔ́ɔ í.

⁴ Bele be fɛ̀ɛgí Yawe na lè, ki n yɛlɛ paa gi nyuu si jo: Wi funjǎngi a tée kwɔ́ɔ í!

⁵ N mii yaʔa mii funjurugori ni, a mii Yawe mɛ́ɛgi yeri, a Yawe lóʔo mii ma, níì mii tɛ́ʔɛ ŋɔ́ndaala ni.

⁶ Yawe i nyɛ ní mii ní, mii o fɛ̀ɛgí yafyɛn na í, nyàʔá syɛ́ɛnbèle a gbǎn kpéʔele mii na?

⁷ Yawe i nyɛ ní mii ní, wi i nyɛ mii dɛ̀ɛmɛfɔbèle ni, mii a ba mii parafɔbèle toolo nyaa.

⁸ Bi miyɛɛ daʔa Yawe na, koro n pɔ́rɔ n sɔ̀lɔ bi miyɛɛ kàlifáa syɔɔn ma.

⁹ Bi miyɛɛ daʔa Yawe na, koro n pɔ́rɔ n sɔ̀lɔ bi miyɛɛ kàlifáa mɛ́ɛyi fɔ̀ɔlɔ ma.

¹⁰ Syɛɛnfeleyi myɛ maa mii màʔa, a mii yi cɔ̀nʔɔ n wo Yawe mɛ́ɛgi na.

¹¹ Yi maa mii màʔa, yi maa mii le nínge, a mii yi cɔ̀nʔɔ n wo Yawe mɛ́ɛgi na.

¹² Yi maa mii màʔa àmɛɛ sémuugo nyɛ lè, a yi fígi àmɛɛ wúuro náa nyɛ lè. Mii n yi cɔ̀nʔɔ n wo Yawe mɛ́ɛgi na.

¹³ Mɔ maa ni mii ŋɔrɔgi gbanʔama bi cáan. Kàjáa a Yawe mii dɛ̀ɛmɛ.

¹⁴ Yawe wi nyɛ mii bárigaw, ní mii ŋúnugi, woro wi baa pye mii syɔɔli.

¹⁵ Fundaanra yákpogéle, ní syɔɔlɔ yákpogéle i yirigi syɛɛnsinbèle fànikpaaya ni ni gi nyuu níì jo: «Yawe kàliigi i séew kèlē kpéʔele!

¹⁶ Yawe kàliigi i nyɛ woyirigege ní! Yawe kàliigi i séew kèlē kpéʔele!»

¹⁷ Mii a kùu í, mii a kòro sìi na, sàā Yawe kapyegèle kéele jáari.

¹⁸ Yawe n mii kpúmɔn gbanʔama, kàjáa wi ga mii kaan kùúw ma í.

¹⁹ Ye sínni kpàánweegéle múgu mii ma, koro ni mii a jée, mii a ra bariga kaangi Yawe ma.

²⁰ Yawe kpàánweeli li nyɛ lee naa, loro ni syɛɛnsinbèle jǐn.

²¹ Mii a ra bariga kaangi mɔ ma, níì cán mɔ n lóʔo mii ma, níì cán mɔ wi baa pye mii syɔɔli.

²² Kàdɛnɛgee kpaafaanbèle da cée lè, koro ki baa pye kpáagi jɛ̀ɛ́nnɛ kadɛnɛzelige.

²³ Gee bee i nyɛ Yawe kapyele, li si i nyɛ wo ma kakpɔɔlɔ.

²⁴ Cángee Yawe sámaga lè, koro gi nyɛ gee naa, waa muguri wáā fundaanra kpéʔele gi ni!

²⁵ Yawe, wo syɔɔ! Yawe, fànʔa kaan wo ma!

²⁶ Wee wi maa lè Yawe mɛ́ɛgi na, ki n yɛlɛ dùba í pye wi ma! Wolo i dùba kpéʔele yele ma n wolo yaʔa Yawe kpáagi ni.

²⁷ Yawe i nyɛ Kolocɔlɔɔ, wi i gbɛ̀ɛnmɛ yirigi wolo ma. Ye sárigaw yaweele pwɔɔ ní mɛɛngéle ní, ye sa nan sáriga-wòlo-yafaangi nyɛ́ngéle na!

²⁸ Mɔ wi nyɛ mii Kolocɔlɔw, mii a ra bariga kaangi mɔ ma. Mii Kolocɔlɔw! Mii a ra mɔ kpɔ́ʔɔgi.

²⁹ Yaa bariga kaangi Yawe ma, níì cán wi n nyɔɔ, wi funjǎngi a tée kwɔ́ɔ í!