Ŋúnuyi 116 - Cebaara Bible 2010

Ŋúnuyi 116 Syɔ́ɔnwee be syɔɔ kùúw ma lè, woro nyɛ́ɛrigi

¹ Yawe kéeli n mii dɛ́nɛ, níì cán wi i mii yákpoli ní mii nyɛ́ɛrigboloyi lúro.

² Níì cán wi n wi líiyi cáan mii ma, koro na mii a ra wi mɛ́ɛgi yiri mii sìíw canya myɛ ni.

³ Kùúw yapwɔɔrɔ maa mii mígele, a kúbèle tɛɛkòrogo wɔʔɔyɔ nan mii na, wɔʔɔgi ní funjurugori maa nan mii na.

⁴ Lǎli bee ni a mii Yawe mɛ́ɛgi yeri níì jo: «Yawe, mii syɔɔ kùúw ma!»

⁵ Yawe i nyinimɛ taagi, wi n sín, wolo Kolocɔlɔw i nyɛ tàmagafɔlɔ.

⁶ Yawe i kanaa-sìnjánbèle kpáa wéle. Mii bárigaw maa cɛ́rɛ, a wi mii syɔɔ.

⁷ Ni fungo, lúru mi tɛ́ɛn mɔ ŋɔ́ndaali ni, níì cán Yawe n kacànna pye mɔ na.

⁸ Ɔnhɔ́n, mɔ n mii pǐli syɔɔ kùúw ma, níì nyatinmi láʔa mii nyapiigèle na, níì mii tɔ́lɔyi yirige tooli ni.

⁹ Mii a ra táanri Yawe yɛ́ʔɛ ma, niweebèle tára na.

¹⁰ Mii maa tágali cò, àlí lǎli ni mii da ni gi nyuu lè níì jo: «Mii wɔʔɔli n tɔ̀nɔ n gbàn n sɔ̀lɔ!»

¹¹ Mii fúngi maa curugo, a mii i gi nyuu níì jo: «Syɛ́ɛnbèle myɛ i nyɛ jànvaafɔɔlɔ.»

¹² Nyàʔá mii a lúrugo Yawe ma wi kacǎnyi myɛ kéele na, yee wi kpéʔele mii na lè?

¹³ Mii a syɔɔli yagbaala yìrige, si Yawe mɛ́ɛgi yeri.

¹⁴ Mii a mii nyɔɔfaliyi foro Yawe ma wi syɛ́ɛnbèle myɛ nyɛ́nɛ na.

¹⁵ Yawe i wi tágala syɛ́ɛnbèle kùu kéele córo kakpɔɔlɔ.

¹⁶ Nyɔɔ mii na Yawe, mii i nyɛ mɔ falipyeo, mii i nyɛ mɔ falipyeo, ní mɔ falipyecew pyà. Mɔ n mii yapwɔɔri sánʔana.

¹⁷ Mii a ra bariga kaanna sáriga wóo mɔ ma sáā mɔ Yawe mɛ́ɛgi yiri.

¹⁸ Mii a mii nyɔɔfaliyi foro Yawe ma wi syɛ́ɛnbèle myɛ nyɛ́nɛ na,

¹⁹ Yawe kpɔ̀ʔɔrɔli kpaʔa kadàagēle na mɔ níngi ni, Zyerusalɛmi! Aleluya!