Ŋúnuyi 115 - Cebaara Bible 2010

Ŋúnuyi 115 Kolocɔlɔɔ nibin na kpɔ́ʔɔri yɛlɛ

¹ Wolo na ban í, Yawe, wolo na ban í, kàjáa kpɔ́ʔɔri taʔa miyɛɛ mɛ́ɛgi na mɔ funjǎngi ní mɔ kányɛɛgi báriga ni.

² Nyàʔá na syɛɛnfeleyi yɛlɛ bi kɔ́ ra gi nyuu si jo: «Sán si be Kolocɔlɔw nyɛ?»

³ Wolo Kolocɔlɔw i nyɛ nyɛ̀ʔɛni na. Gee myɛ ki wi dɛ́nɛ lè, koro wi kpéʔele.

⁴ Pe yasunyi i nyɛ wálifiio ní tɛɛ̀, syɔɔn ye kɔ́yi fáli wii.

⁵ Nyɔɔyɔ i nyɛ yi na, yi si o nyuu í, nyapiigèlē i nyɛ yi na, yi si o nyaagi í.

⁶ Líiye i nyɛ yi na, yi si o lúro í, fínaagéle i nyɛ yi na, yi si o yafyɛn núngo taagi í.

⁷ Kɔyɔ i nyɛ yi na, yi si o yafyɛn có í, tɔlɔyɔ i nyɛ yi na, yi si o táanri í, yi yákpodiriyi o syɛɛnkanga yirigi í.

⁸ Yi kpéʔelefɔbèle i nyɛ yi felege, ní bele myɛ be peyɛɛ daʔa yi na lè.

⁹ Isirayɛli kpáagi wòolo, ye yeyɛɛ daʔa Yawe na! Woro wi nyɛ pe dɛ̀ɛmɛfɔw ní be tunmɔzige-yárigi.

¹⁰ Aarɔn kpáagi wòolo, ye yele sɔ̀ngumi taʔa Yawe na! Woro wi nyɛ be dɛ̀ɛmɛfɔw ní be tunmɔzige-yárigi.

¹¹ Yele bele ye fɛ̀ɛgí Yawe na lè, ye yeyɛɛ kàlifáa Yawe ma! Woro wi nyɛ be dɛ̀ɛmɛfɔw ní be tunmɔzige-yárigi.

¹² Yawe i sɔ̀ngí ni taagi wolo na, wi a dùba taʔa wolo na, wi a dùba taʔa Isirayɛli kpáagi wòolo na, wi a dùba taʔa Aarɔn kpáagi wòolo na.

¹³ Wi a dùba taʔa bele na be fɛ̀ɛgí woro Yawe na lè, n woyilibèle fàra wogbolobèle na.

¹⁴ Ki n yɛlɛ Yawe í yele kaan yele í nɛʔɛ, yele ní yele pìíbèle.

¹⁵ Yawe í dùbaw taʔa yele na, woro wee wi nyɛ̀ʔɛni ní tári faan lè.

¹⁶ Nyɛ̀ʔɛni i nyɛ Yawe nibin wólo, kàjáa wi n tári kaan syɔɔn ye ma.

¹⁷ Kúbèle ban be Yawe sòoló í, poro bele be tíri ni syée kàfulogo fun tɛ́ɛgi ni lè.

¹⁸ Kàjáa wolo na, wolo a ra bariga kaangi Yawe ma tɔ́ɔliw naa ni bàā syée yaà làla o làla. Aleluya!