Ŋúnuyi 113 - Cebaara Bible 2010

Ŋúnuyi 113 Yawe i kérigèle lúrugu ni kàragí ke lè sɔ̀ngumɔ tɛɛtaʔaga fun

¹ Aleluya! Yawe falipyebèle, yaa wi sòoló yaa Yawe mɛ́ɛgi sòoló!

² Yawe mɛ́ɛgi n yɛlɛ kaa kpɔ̀ʔɔrɔ́ lǎli naa ni bàā syée yaà làla o làla!

³ Bi séli canʔafolomɔ ma bi sa nan canʔajeemɛ na, Yawe mɛ́ɛgi n yɛlɛ kaa sòoló!

⁴ Yawe i nyɛ ǹjoʔo ma gbanʔama syɛɛnfeleyi myɛ nyúngo na, wi nìjangbɔɔri i nyɛ nyɛ̀ʔɛgèle ǹjoʔo ni.

⁵ Wìí syɔ́ɔn wi Yawe wíri, wi lè wolo Kolocɔlɔw? Wi i nyɛ wodɛ́ɛɔn ní ǹjogi ni.

⁶ Wi n wi nyúngi jùngu ni nyɛ̀ʔɛgèle ní tári wéle.

⁷ Woro wi fànʔafunvɔw có ni yìrigí támiigi na, ní i foomɔfɔw có ni yìrigí kábogi na,

⁸ koro ga pye bi be pínɛ télege ní mɛ́ɛkpoloyi fɔ̀ɔlɔ ní, pe lè woro tiimaa syɛɛnfelegi mɛ́ɛkpoloyo fɔɔlɔ.

⁹ Wi i cenaa-sìnzeeo télegi kpaʔa ni bi wi pye àmɛɛ pìibēle nɔ́ɔ nyɛ lè wi lè fundaanra na. Aleluya!