Ŋúnuyi 112 - Cebaara Bible 2010

Ŋúnuyi 112 Tágala syɛ́ɛnbèle ŋɔ́ndaala fundaanra

¹ Aleluya! Syɔ́ɔnwee wi fɛ̀ɛgí lè Yawe na, ní i fundaanra kpéʔele gbanʔama wi kajoodɛɛngèle kéele na, wi i nyɛ dùba pyà.

² Wi yòdaʔayi a pye báriga syɛ̀ɛnnɛ tári ni, syɛɛnsinbèle yìrigēle woolo a dùbaw taa.

³ Kɔlɔ̀ yárira saʔa, ní lɔnɛʔɛrɛ i nyɛ wi kpáagi ni, wi sínni a kòro beè làla o làla.

⁴ Gbɛ̀ɛnmɛ i yirigi yébilimi ni syɛɛnsinbèle ma, ní wee má wi nyɛ lè nyinidaaɔ ní fûnnyinge fɔ́lɔ, níì sín.

⁵ Syɔ́ɔnwee wi nyinimɛ taagi lè, ní i fwɔɔlɔ nii, wee bee i nyɛ dùba pyà, woro wee wi wi kérigèle cɔɔnri ní sínnɛ ní lè!

⁶ Níì cán yafyɛn a tée wi cúngo nyáana í. Sɔ̀ngudaara a pye syɛɛnsinw kéele na làla o làla.

⁷ Syɛɛnpeere lóʔolo o fyáara wáa wi na í, wi fúngi n sámaga n tɛ́ɛn. Wi n wi sɔ̀ngumi taʔa Yawe na.

⁸ Wi zɔ̌nw n sámaga n tɛ́ɛn, wi o fɛ̀ɛgí í bi taa wi ba wi kàsiitun-nyɛ́nbèle toolo nyaa.

⁹ Wi i kaangi saʔa, wi i kaangi foomɔfɔbèle ma. Wi sínni a kòro beè làla o làla. Wi nyúngi a ba yìri ǹjoʔo ma ní nìjanra ní.

¹⁰ Syɛɛnpeew i gee bee nyaagi níì fúngi tanʔa, wi i gǎngèle kúru, wi a nyan bi kwɔ́ɔ, syɛɛnpeebèle yanidaanmara a kálagi.