Ŋúnuyi 110 - Cebaara Bible 2010

Ŋúnuyi 110 Fànʔafɔlɔ ní sáriga-wòloo

1 Davidi ŋúnugi.

¹ Davidi ŋúnugi. Yawe n gi joo mii Kàfɔw ma níì jo: «Ba tɛ́ɛn mii kàliige ma bi taa mii í ba mɔ nigoobèle kpéʔele mɔ tɔ́lɔyi yataʔaga.»

² Yawe a mɔ fangi kàgbeele nyáʔana Siyɔn ni. Tɛ́ɛn fǎngi na mɔ nigoobèle nínge ni!

³ Mɔ syɛ́ɛnbèle tɔ̀nɔ́ i cángi sige, gee ni mɔ a mɔ kapɛɛnkpumɔnbèle kpóʔoro lè, fèreri yacanvororo si pye be na nyǐnjerigi na. Mɔ wojáribèle i maa àmɛɛ nyǐnjerige kásaga nyɛ lè!

⁴ Yawe n kàli gi na n jo: «Mɔ i nyɛ sáriga-wòloo làla o làla n yɛlɛ ní Mɛlikizedɛki félegi ní. Wi si a tée wi sɔ̀nguri fàli í.»

⁵ Kàfɔw i nyɛ mɔ kaliige ma, wi a fànʔafɔɔlɔ tɔ́nʔɔnɔ wi fundanʔari canʔa na.

⁶ Wi a kútiiw ceri syɛɛnfeleyi na, tɛ́ɛyi myɛ a nyìn kúbèle na. Wi a tátɛɛyɛ saʔa kundigibéle tɔ́nʔɔnɔ.

⁷ N wi yaʔa kólogi na, lòcoologo na wi a gbaa, koro na wi a ra wi nyúngi yìrigí.