Ŋúnuyi 109 - Cebaara Bible 2010

Ŋúnuyi 109 Wee be córo lè wi n kolo, wi i Kolocɔlɔɔ yiri wi woro dɛ̀ɛmɛ

1 Ŋúnuŋùúbèle kùndigi wóʔo. Davidi ŋúnugi.

¹ Ŋúnuŋùúbèle kùndigi wóʔo. Davidi ŋúnugi. Ee Kolocɔlɔɔ, mɔ wee mii sòoló lè, mɔ a kɔ́ kòro pyèrio í!

² Níì cán pe i nyɔɔpeeyi ní námara nyɔ́ɔyi múru mii kánmi na, pe i nyuu ní mii ní jànvaa nyɔ́ɔyɔ ni.

³ Pe i mii máari ní paraga syɛ́ɛnrɛ ní, ní i túngu ní mii ní nyùngo fun.

⁴ Mii n tàmaga le ní be ní, á be si i kolomi taari mii na. Kàjáa mii i nyɛ nyɛ́ɛrigi na.

⁵ Pe n mii kacǎnni sàra ní kapeele ní n mii tàmagi sàra ní paraga ní.

⁶ Ki n yɛlɛ mi syɛɛnpeeo télege wi nyúngi na, mí dàzɔɔɔn yérige wi kàliige ma!

⁷ Kútiiw ga kúun wi na lǎlee ni lè, ki n yɛlɛ wi kolomɔ taa, wi nyɛ́ɛrigi si kàri kapeele!

⁸ Ki n yɛlɛ wi sìíw canya í cɛ́rɛ. Syɔɔnwaa nikwɔɔ n yɛlɛ bi wi fáliw láa!

⁹ Ki n yɛlɛ wi pìíbèle í ba pye círibéle, wi céw í pye lɔgucaa!

¹⁰ Ki n yɛlɛ wi pìíbèle í pye nicurugo-mí-màʔaya sáā nyɛ́ɛri, pé yiri be gurubɛɛri ni, bi sa ra yaliiri caa tɛɛ̀leelige ni!

¹¹ Ki n yɛlɛ fwɔɔjáariɔ í wi kɔlɔ̀ yáriri myɛ koli, nibɔɔnnɔ si wi fáliw fɔ̀rɔgɔ tɔ̀nɔ láa!

¹² Syɔɔn faala a kɔ́ kacànna pye wi na í, syɔɔn faala a wɔ́ɔ kɔ́ nyinimɛ taa wi círibèle na í,

¹³ Wi yòdaʔayi n yɛlɛ bi kwɔ́ɔ yirige yaà, pe mɛ́ɛyi n yɛlɛ bi kwɔ́ɔ yiri yaà yìrigèle gele syɛ̀ɛnnɛ ni be maa lè,

¹⁴ Ki n yɛlɛ wi tóobèle kolomɔ í kòro sɔ̀ngudaara yáriga Yawe ma, wi nɔ́ɔw kapeele ga yɛlɛ bi kurugo láʔa yaà í!

¹⁵ Ki n yɛlɛ Yawe í da be kapeegèle nyaagi làla o làla, si be mɛ́ɛyi kwɔ́ɔ bi yirige yaà tári ni.

¹⁶ Níì cán wi ga sɔ̀ngi gi na ni funjànga kpéʔele í, fwɔɔ a wi yìri wɔʔɔgɔfɔw kurugo, wi lè foomɔfɔw, ní funnyɛnigɛfɔw, níì jo woro a wi kpóo!

¹⁷ Dángaw kéele maa wi dɛ́nɛ, a dángaw si wi nɛnɛ n taa! Dùbaw kpéʔelele da wi dɛ́nɛ syɔɔn ma í, a dùbaw si léeli wi na!

¹⁸ Wi maa dángaw le àmɛɛ wi burodɔnɔgi nyɛ lè, a dángaw jée wi ni àmɛɛ lɔ̀ʔɔ nyɛ lè, n jée wi kaceleyi ni àmɛɛ sìnmɛ nyɛ lè!

¹⁹ Ki n yɛlɛ wi pye wi na àmɛɛ burogo nyɛ, gee ní wi wiyɛɛ dɔ́ngi lè, si pye wi na làla o làla àmɛɛ sɛntiiri nyɛ lè!

²⁰ Sàraw bee Yawe a kaan mii mɛ́ɛgi kálagifɔɔlɔ ma, poro bele be syɛɛnpeeri nyuu ni wáa mii na lè.

²¹ Mɔ si na, ee Yawe, Kàfɔw, nyɔɔ mii na mɔ mɛ́ɛgi kéele na, níì cán mɔ tamagi n tɔ̀nɔ n kpɔ́ʔɔ. Mii syɔɔ!

²² Mii i nyɛ fɔ̀rɔgɔ fɔ́lɔ, ní i nyɛ foomɔ wóo ní, mii n kpàli mii fúngi ni.

²³ Mii i syée àmɛɛ cângwɔʔɔ nyɔ́ɔ kànyinnɛ nyɛ, lee li tɔnɔgi lè, pe i mii nɛnɛ àmɛɛ kúdo nyɛ lè.

²⁴ Mii yégunyi i pegi súnleri báriga ni, mii céri n waʔa sìnliimi báriga ni.

²⁵ Mii n pye yafaʔala be ma. Pe i mii wéle ní i nyǔnyi kólo.

²⁶ Mii dɛ̀ɛmɛ, Yawe mɔ wi lè mii Kolocɔlɔw! Mii syɔɔ mɔ funjǎngi báriga ni!

²⁷ Koro ga pye pe gi cán mɔ kɔ́lɔ kapyele lii, pe gi cán bi cán mɔ Yawe wi gee bee kpéʔele.

²⁸ Paa syɛ́ɛnbèle dángi, mɔ si na, mɔ a ra dùbaw kpéʔele. Pe ga yìri, fɛ̀ɛrɛ a be taa, mɔ falipyew si a ra fundaanra kpéʔele.

²⁹ Ki n yɛlɛ màámi í pye mii mɛ́ɛgi kálagifɔɔlɔ na burogo, fɛ̀ɛ́ri í pye be na àmɛɛ burogbɔʔɔ nyɛ lè!

³⁰ Mii a ra bariga kaangi Yawe ma ní yákpogbɔɔlɔ ní, mii a ra wi kpɔ̀ʔɔrɔ́ syɛɛnnɛʔɛmi nínge ni.

³¹ Níì cán wi n yére foomɔfɔw kàliige ma, bi wi syɔɔ bele má be kolomi kaangi wi ma lè.