Ŋúnuyi 108 - Cebaara Bible 2010

Ŋúnuyi 108 Mii i caa bi nyǐnjerigi yìrige

¹ Ŋúnugo. Davidi ŋúnugi.

² Mii fúngi n sámaga n tɛ́ɛn, ee Kolocɔlɔɔ! Mii a ra ŋúu, mii a ra kpɔ̀ʔɔrɔli ŋúnugo ŋúu, ee mii nìjanri!

³ Ye yìri ŋúnɔmi na, kɔ̀ríw, ní dǎngboli! Mii a nyǐnjerigi yìrige.

⁴ Yawe, mii a ra mɔ kpɔ̀ʔɔrɔ́ syɛɛnfeleyi nínge ni! Mii a ra ŋúu mɔ kpɔʔɔrɔli kéele na tári syɛɛnfeleye nínge ni.

⁵ Níì cán mɔ funjǎngi n lúgu n sɔ̀lɔ nyɛ̀ʔɛgèle ǹjoʔo na. Mɔ kányɛɛgi n kári fwɔɔ n sáà nan fàfaanyi na.

⁶ Ee Kolocɔlɔɔ, ki n yɛlɛ mi lúgu yaà nyɛ̀ʔɛgèle ǹjoʔo ni! Mɔ nijangbɔɔri í pye tári myɛ ǹjoʔo ni!

⁷ Mɔ kaliigi tɛ́ʔɛ mi syɔɔlɔ kpéʔele, mí lóʔo wolo ma, koro ga pye mɔ syɛɛn-nidaanmabèle í syɔɔ!

⁸ Kolocɔlɔɔ n gi joo wi tɛɛcǎngi ni, níì jo: «Mii má fàndaari nyɛ, mii a Sisyɛmi lɛɛ lɛɛ, mii a Sukɔti jǐnlɔgi tímana.

⁹ Galaadi i nyɛ mii wóo, a Manase í nyɛ mii wóo. Efirayimi i nyɛ mii túnmɔri nyùndɔngɔ. Zyuda si i nyɛ mii fǎngi kàgbeele.

¹⁰ Mowabi i nyɛ lǒgi yalege, gee ni mii wíri lè. Mii n mii taʔalagi wáa Edɔmi na. Mii i fàndaara yákpolo wáa Filisitini ye tári kánma na!»

¹¹ Wìí syɔ́ɔn wi a mii tórigo bi sa lége kènirigi ni? Wìí syɔ́ɔn wi a mii yɛ́ɛgi kíni bi sa nan Edɔmi na?

¹² Ee Kolocɔlɔɔ, mɔ ban wi wolo cée ì? Ee Kolocɔlɔɔ, mɔ ban wi nyɛ wi ní o syée ní wolo kapɛɛnkpumɔnbèle ní í ì.

¹³ Wolo dɛ̀ɛmɛ, mi wolo syɔɔ nigoow ma, níì cán syɔɔn dɛɛmɛni o nyɛ yafyɛn í.

¹⁴ Wolo a ra sànbalimi kpéʔele Kolocɔlɔɔ bárigaw ni. Woro wi a wolo kàsiitun-nyɛ́nbèle tɔ́nʔɔnɔ.