Ŋúnuyi 107 - Cebaara Bible 2010

SƐBƐKAGUNƆ WOW ( 107—150 ) Ŋúnuyi 107 Bariga kaanna Kolocɔlɔɔ ma wi lè Syɔɔfɔw

¹ Yaa bariga kaangi Yawe ma, níì cán wi n nyɔɔ, níì cán wi tàmagi a tée kwɔ́ɔ nyáana í!

² Yawe wozyɔɔbèle n yɛlɛ bàā koro nyuu, poro bele nyúnyo wi syɔɔ n yirige be kàsiitun-nyɛ́nw kɔ́lɔ ni lè,

³ n be kpóʔoro n yirige yaà tátɛɛyi myɛ ni n be yirige yaà canʔafolomɔ, ní canʔajeemɛ ma, ní solomɔkulo ní wòrogulo kàbangi na!

⁴ Pe maa ni curugu ni máari fìími tára ni, táwaara kóbeʔe ni, pe ga kàʔa taa bi tɛ́ɛn í.

⁵ Pe maa ni káagi kateegi ní lògbaagi kɔ́yɔ ni. A be fúnyi fànʔa kwɔ́ɔ.

⁶ N be yaʔa be fɔ̀rɔgi ni, a be yákpogèle wáa Yawe kurugo, a wi be syɔɔ pe wɔʔɔyi ma.

⁷ Wi n be yɛ́ɛgi kíni kôzíngi ni jàngó be sa nan kàʔa na, gee ni pe a tɛ́ɛn lè.

⁸ Ki n yɛlɛ paa Yawe kpɔ̀ʔɔrɔ́ wi funjǎngi kéele na, ní wi bìngaari kèlē kéele na, gele wi kpéʔele syɔɔn ye ma lè!

⁹ Níì cán wee fànʔa ki da kwɔ́ɔ lè lògbaalaagi báriga ni, wi n wee bee tín lǒgi na, níì kateèjaa-fúngi nyìn yacanri na.

¹⁰ Pèle maa pye wodɛ́ɛnbéle ní yébilimi ni, ní kùúw nyínmɛ ni, pe maa pye kàsolebéle, foomɔ wòolo ní, nyɔ̀ʔɔdiriyi na,

¹¹ níì cán pe maa Kolocɔlɔɔ syɛ́ɛnri cée níì cán wee wi nyɛ lè Pe Myɛ Nyúngo na, pe maa woro láliiw faʔa.

¹² A wi si be fúnyi tìrige táàma ní wɔʔɔlɔ ní. Pe n too, dɛ̀ɛmɛfɔlɔ ga taa be na í.

¹³ N be yaʔa be fɔ̀rɔgi ni, a be yákpogèle wáa Yawe kurugo, a wi be syɔɔ pe wɔʔɔyi ma.

¹⁴ Wi n be yirige yébilimi, ní kùúw nyínmɛ ni, níì be yapwɔɔri cɛnɛ.

¹⁵ Ki n yɛlɛ paa Yawe kpɔ̀ʔɔrɔ́ wi funjǎngi kéele na, ní wi bìngaari kèlē kéele na, gele wi kpéʔele syɔɔn ye ma lè!

¹⁶ Níì cán wi n kanyɛɛnri kɔ̀riyɔ kabagi, wi n túnmɔri gbóʔoroyo kabagi.

¹⁷ Nilabalabèle maa wɔʔɔlɔ cáan peyɛɛ na pe tánʔabeemi, ní be kolomi báriga ni.

¹⁸ Yaliire faala da ní ni tàán be nyɔ́ɔyi na í, pe maa tángi n kwɔ́ɔ kùúw kpàánweegéle na.

¹⁹ N be yaʔa be fɔ̀rɔgi ni, a be yákpogèle wáa Yawe kurugo, a wi be syɔɔ pe wɔʔɔyi ma.

²⁰ Wi n wi syɛ́ɛnri tórigo n be pɔʔɔ, níì be syɔɔ weecurugi ma.

²¹ Ki n yɛlɛ paa Yawe kpɔ̀ʔɔrɔ́ wi funjǎngi kéele na, ní wi bìngaari kèlē kéele na, gele wi kpéʔele syɔɔn ye ma lè!

²² Páā bariga kaanna sáriga wóo Yawe ma, sáā wi kapyegèle kéele ŋúu ní fundaanra yákpogéle ní!

²³ Bele be tánʔani kpéʔele sólomi lɔ̀ʔɔ na lè bàtobèle ni, ní i be fáliw kpéʔele lòkpoloyi ni lè,

²⁴ poro n Yawe kapyegèle nyaa, ní wi bìngaari kèlē wi kpéʔele lòcurugi ni lè.

²⁵ Wi n joo, a káfalakpɔʔɔ yìri ni funu ní zàʔá ní, a gee bee i lǒgi kùnguruyo yìrigí.

²⁶ Pe maa ni lúru ni syée nyɛ̀ʔɛni ma, ní i tíri weecurugi fúngo ni. Pe zɔ̌nbèle maa nyan be ni, wɔʔɔgi báriga ni.

²⁷ Pe yɛ́ɛyi maa wɔ́ɔ a be i fíigi ni máari mɔ a jo singbaadiɔn wii, pe kacánmi myɛ maa kwɔ́ɔ.

²⁸ N be yaʔa be fɔ̀rɔgi ni, a be yákpogèle wáa Yawe kurugo, a wi be syɔɔ pe wɔʔɔyi ma.

²⁹ Wi n káfalakpɔɔgi yérige, a lǒgi kùnguruyo pyèri tábi.

³⁰ A be i fundaanra kpéʔele àmɛɛ di yére lè, wi n kíni be yɛ́ɛgi na n sáà nan pe nyɛnɛ tɛɛ̀yéreli na.

³¹ Ki n yɛlɛ paa Yawe kpɔ̀ʔɔrɔ́ wi funjǎngi kéele na ní wi bìngaari kèlē kéele na, gele wi kpéʔele syɔɔn ye ma lè.

³² Ki n yɛlɛ paa wi kpɔ̀ʔɔrɔ́ wi syɛ́ɛnbèle syɛɛnkpoʔolomɔ ni, bàā wi sòoló wolɛɛbèle kpóʔorojoolo tɛ́ʔɛ ni!

³³ Wi n cábiyi kàriga fìimɛ tára, níì lǒgi púloweegéle kàriga táwaara,

³⁴ níì tátaanri kàriga solomɔ tára tári bee tɛ́ɛnfɔɔlɔ péemɛ kéele na.

³⁵ Wi n fìími tára kàriga lòkpɔʔɔ, níì táwaari tɛ́ʔɛ kàriga lɔ̀ʔɔ púloweegéle.

³⁶ Wi n kateèjaabèle télege yaà, a poro kàʔa faan n tɛ́ɛn.

³⁷ Pe n yaliire lùgu séyi ni, níì ɛrɛzɛn tírire cɔ́rɔ, a yasanra saʔa i taagi.

³⁸ Wi n dùba kpéʔele be ma, a be i nɛʔɛgi gbanʔama, wi a be yaweeri yaʔa di cɛ́rɛ í.

³⁹ Pe kánmi maa baa cɛ́rɛ, a be tìgi táàma bɔ̀nɔw, ní wɔʔɔgi, ní fɔ̀rɔgi kéele na.

⁴⁰ Wi n faʔara wáa mɛ́ɛkpoloyi fɔ̀ɔlɔ na. Wi n be yaʔa a be pùuni ni nyaari ni máari fìimɛ tára ni, kologo fun tɛ́ʔɛ ni.

⁴¹ Wi n fɔ̀ngɔfɔw yìrige n yirige fóomi ni, níì narigbaayi nɛʔɛ a yi pye àmɛɛ bàtoyo nyɛ lè.

⁴² Syɛɛnsinbèle i gee bee nyaagi, a be i fundaanra kpéʔele, kàjáa sìnzinmi myɛ n nyɔ́ɔgi tɔ́n.

⁴³ Syɔ́ɔnwee faala wi cìlige lè, ki n yɛlɛ wi wi sɔ̀ngumi yaʔa kérigèle naa na, sáā sɔ̀ngí Yawe funjǎngi kèlē na.