Ŋúnuyi 106 - Cebaara Bible 2010

Ŋúnuyi 106 Isirayɛli sìnzinmi ní Kolocɔlɔɔ tágala syɛ́ɛnmi

¹ Aleluya! Yaa bariga kaangi Yawe ma, níì cán wi n nyɔɔ, níì cán wi funjǎngi a tée kwɔ́ɔ í!

² Wìí syɔ́ɔn wi a gbǎn Yawe séew kapyegèlē kéele joo? Wìí wi a gbǎn wi sòololi kèlē myɛ joo bi tɛ̀ɛn?

³ Bele be kányɛɛgi kèlē sámaga n cò lè, ní i sínni kèlē kpéʔele làrigèle myɛ ni lè, bele bee i nyɛ dùba pìibēle!

⁴ Ee Yawe, sɔ̀ngi mi taa mii na àmɛɛ mɔ sɔ̀ngí ni taagi mɔ syɛ́ɛnbèle na lè! Ba mii dɛ̀ɛmɛ mɔ syɔɔli báriga ni,

⁵ koro ga pye mii í mɔ syɛɛnnyɛnɛ-wòlobèle ŋɔ́ndaala nyaa, sáā fundaanra kpéʔele mɔ syɛɛnfelegi fundaanra kéele na, bàā muguri ní mɔ kɔ́rigi wòolo ní!

⁶ Wolo n kapeegèlē kpéʔele àmɛɛ wolo tóolɛɛbèle da ge kpéʔele lè, wolo n kolomɔ kele kpéʔele, wolo kapyegèle n pee.

⁷ N wolo tóolɛɛbèle yaʔa Ezyipiti ni, pe da mɔ kakpoloyi kɔ́rɔ cán í, pe ga téè sɔ̀ngi n taa mɔ funjǎngi kapyenɛʔɛgéle na í, pe n céemɛ kpéʔele sólomi lɔ̀ʔɔ nyɔ́ɔ na, Nyɛ́nɛri solomɔ lɔ́ʔɔ nyɔ́ɔ na.

⁸ Kàjáa wi n sèʔê be syɔɔ wiyɛɛ mɛ́ɛgi kéele na koro ga pye bi wiyɛɛ séekpɔɔw tɛ̀ɛn.

⁹ Wi n fúlo Nyɛ́nɛri solomɔ lɔ́ʔɔ na a gi waʔa, níì be yɛ́ɛgi kíni a be tánʔa n foro lòcurugi nínge ni àmɛɛ fìimɛ tára nyɛ lè.

¹⁰ Wi n be yirige be parafɔw kɔ́lɔ ni, wi n be nyúnyi syɔɔ n yirige nigoow kɔ́lɔ ni.

¹¹ Lǒgi n be kàsiitun-nyɛ́nbèle tɔ́n, àlí pe wàa nibin ga syɔɔ í.

¹² A be tága lǎli bee ni wi syɛ́ɛnri na, a be i ŋúu ni wi sòoló.

¹³ Cɛɛri na a be fala n fɛ̀ʔɛ wi kapyegèle na, gee wi kɔ̀rirɔ n tímana lè, pe ga yére n koro sige í.

¹⁴ Ki laànitaagi maa wári be na fìími tára ni, a be Kolocɔlɔɔ pye n wéle lɔ̀ʔɔ fun tári ni.

¹⁵ Wi n be yanyɛɛrigi kaan be ma níì be yaʔa a be waʔa pǐli kàbaan na.

¹⁶ N be yaʔa be tɛɛkòrogi ni, a Mowizi ní Yawe wojanw Aarɔn nyabɛɛnni pye be na.

¹⁷ A tári múgu níì Datan jɔ́ɔ, ti n Abiirami kabigi wòolo tɔ́n.

¹⁸ Naà n cò be syɛ́ɛnmi kánma na, náagi n syɛɛnpeebèle sórigo péw.

¹⁹ Pe n náapiige sámaga Horebi nyanbelegi tìgimɛ ni, a be i tɛɛgbàlaw yafanʔa kpɔ̀ʔɔrɔ́.

²⁰ Pe n be nìjanri fàli nɔ̀ɔ niwirige na, wee wi nyàági káa lè.

²¹ Pe n fɛ̀ʔɛ Kolocɔlɔɔ na, wi lè be Syɔɔfɔw, woro wee wi da kakpoloyi kpéʔele Ezyipiti ni lè.

²² Kakpoloyi, Kami tári ni, bìngaari kapyegèlē Nyɛ́nɛri solomɔ lɔ́ʔɔ na.

²³ Wi maa ni nyuu be kálagili kéele na, kàjáa Mowizi wi lè wi syɛɛnnyɛnɛ-wòlow, a woro baa yére wi ní be níngi ni, níì wi fundanʔari kàriga n láʔa be na, koro ga pye wi a kɔ́ be kálagi í.

²⁴ Táree ti a be nyɔɔ lè, pe n di kéeli faʔa. Pe ga tága Yawe syɛ́ɛnri na í.

²⁵ A be i kabala ni nyuu be fànikpaayi ni, pe ga lóʔo Yawe ma í.

²⁶ A wi si wi kɔ́gi yìrige n kàli be kéeli na, bi be kpóo cáan fìími tára ni,

²⁷ bi be yòdaʔayi kpóo cáan syɛɛnfeleyi nínge ni, bi be cariga tátɛɛyi ni.

²⁸ Pe maa peyɛɛ daʔa Baali-Peyɔɔri na, ní i kolocɔlɔ-kúuyi sáriga líi.

²⁹ Pe n Yawe fúngi tanʔa ní be kapyegèle ní, a yaabeemɛ jée be ni.

³⁰ Lǎli bee ni a Fineyasi yìri n yére, n kéeli bee cɔɔnri, a yaabeemi fala n kwɔ́ɔ.

³¹ A kéeli bee córo wi ma sínnɛ yìrigèle myɛ syɛ̀ɛnnɛ ma, ni syée yaà làla o làla.

³² Pe n Yawe fúngi tanʔa Meriba lǒgi taana. A kapeʔe Mowizi taa be kéeli na.

³³ Níì cán pe n wi fúngi yìrige fwɔɔ a syɛɛnnaa-sìnjooro fòʔo n yiri wi nyɔ́ɔgi ni.

³⁴ Syɛɛnfeleyee Yawe da be pye be kálagi lè, pe ga yi kálagi í.

³⁵ Fwɔɔ a be peyɛɛ nyáʔami syɛɛnfeleyi ni, ní i yi kapyeri kpéʔele.

³⁶ Ní i yi kolocɔlɔbèle kpɔ̀ʔɔrɔ́, a poro pye be cǒli karinyanga.

³⁷ A be i be nànbiigèle ní be calipiigèle wóo sáriga màdebèle ma.

³⁸ Pe n tɛɛlɛ fun sìsyaanw wo, wi lè pe nanbiigèle ní be calipiigèle sìsyaan, pe n ge wòlo sáriga Kanaan syɛ́ɛnbèle yasunyo ma, a sìsyaanw tári nɔ́nʔɔ.

³⁹ Pe n peyɛɛ nɔ́nʔɔ ní be kapyegèle ní, pe n peyɛɛ kàriga kanɔnʔɔbyebèlē pe nàʔami báriga ni.

⁴⁰ A Yawe fúngi tanʔa wi syɛ́ɛnbèle kurugo, a wi kɔ́rigi láa tɔ̀nɔ n wòlo wi ni péw.

⁴¹ A wi be le syɛɛnfeleyi kɔ́yɔ ni, a be parafɔbèle tɛ́ɛn be nyúngi na.

⁴² Pe nigoobèle n fǎngi gbàn be na, a be kòro be kɔ́yi ni.

⁴³ Wi n be syɔɔ tɔlɔyɔ saʔa. Koro ní ki myɛ ní pe maa sèʔê kòro niceebéle, ní i jǐn ni syée be kolomi ni.

⁴⁴ Lǎli ni wi ga be wɔʔɔgi nyaa lè, wi n sèʔê wéle be ma.

⁴⁵ Wi n sɔ̀ngi n taa wi joogaanni na be kéeli na, wi n nyinimɛ taa n yɛlɛ ní wi funjǎngi ní,

⁴⁶ níì gi yaʔa bele pe be cò n kári púlori na lè, a poro myɛ nyinimɛ taa be na.

⁴⁷ Wolo syɔɔ, Yawe mɔ wi lè wolo Kolocɔlɔw! Wolo kpóʔoro mi yirige syɛɛnfeleyi nínge ni, koro ga pye wolo í ba ra mɔ mɛ́ɛcǎngi kpɔ̀ʔɔrɔ́, wolo si wolo nìjanri le mɔ soololi ni.

⁴⁸ Yawe Isirayɛli Kolocɔlɔw n yɛlɛ waa wi kpɔ̀ʔɔrɔ́ làrigèle myɛ ni, kwɔ́ɔmɔ fun! Syɛ́ɛnbèle myɛ n yɛlɛ be jo: «Amiina!» Aleluya!