Ŋúnuyi 105 - Cebaara Bible 2010

Ŋúnuyi 105 Kolocɔlɔɔ tágala syɛ́ɛnmi kapyegèlē joolo

¹ Yaa Yawe kpɔ̀ʔɔrɔ́, yaa wi mɛ́ɛgi yiri! Kakpoloyi wi kpéʔele lè yaa yi kéeli nyuu syɛɛnfeleyi nínge ni!

² Yaa ŋúu wi ma, yaa wi kpɔ̀ʔɔrɔli ŋúnuyo ŋúu! Yaa sɔ̀ngí wi bìngaari kèlē myɛ na!

³ Yaa kpɔɔmɔ kpéʔele ní wi mɛ́ɛcǎngi kéele ní! Yawe caafɔbèle n yɛlɛ paa fundaanra kpéʔele!

⁴ Ye lúru yaa Yawe ní wi fǎngi caa, ye kòro yaa wi caa nyaama!

⁵ Ye sɔ̀ngi ye taa bìngaari kèlē na wi kpéʔele lè, ní wi kakpolo-kpèleyi, ní wi nyɔ́ɔgi kútiicerio na,

⁶ yele ye nyɛ lè wi falipyew Abirahami yòdaʔayi, Zyakɔbi jáabèle, wi syɛɛnnyɛnɛ-wòlobèle.

⁷ Woro wi nyɛ Yawe, wi lè wolo Kolocɔlɔw, wi i wi kútiiw cɛnɛ tári tɛ́ɛyɛ myɛ ni.

⁸ Wi i sɔ̀ngí ni taagi làrigèle myɛ ni wi joogaanni na, ní wi syɛ́ɛnri na yìrigèle saala kagunɔ syɛ̀ɛnnɛ ma.

⁹ Gee bee n jo joogaanni wi kpéʔele ní Abirahami ní lè, ní wi kàligi wi kpéʔele Izaaki ma lè,

¹⁰ wi n li kpéʔele Zyakɔbi ma làlwasɛbɛɔ, bàngwɔɔ joogaanna Isirayɛli ma.

¹¹ Wi n jo: «Mii a Kanaan tári kaan mɔ ma ti pye yele kɔ́rigi lɛɛlɛ.»

¹² Bi gi taa lǎli bee ni yele maa pye syɛ̀ɛnnɛ cɛɛri, yele da pye saʔa í, ní i nyɛ nibɔɔnnɔ tári ni.

¹³ Pe maa ni nyaari ni sɔ̀lɔ́ ni máari syɛɛnfeleyi nínge ni bi wɔ́ɔ yìri fàngaa ma bi kári syɛɛnfelegaa ma.

¹⁴ Kàjáa wi ga fɔ̀lɔ n syɔɔn faala yaʔa wi be wɔʔɔ í, wi maa fúlo fànʔafɔbèle pèle na be kéeli na.

¹⁵ Níì jo: «Yele a tíi si kɔ́ tánga mii syɛɛnnyɛnɛ-wòlobèle na í, yele a tíi si kɔ́ kapeʔe pye mii kanyaajoobèle na í.»

¹⁶ Wi n kateegi yeri n cáan tári na, wi n lìíli myɛ ceri n láʔa be na.

¹⁷ Wi si maa syɔɔnwaa tórigo pe yɛʔɛ̀ ma, woro wi nyɛ Zyozɛfu, wee be pára àmɛɛ puloo nyɛ lè.

¹⁸ Pe maa wi tɔ́lɔyi kpàra ní yasɔʔɔyɔ ní, níì nyɔ̀ʔɔdirige le wi ma yátiigi ni,

¹⁹ fwɔɔ n taa a wi syɛ́ɛnri làrivorolo baa nan, Yawe syɛ́ɛnri n wi sɛʔɛ n wéle.

²⁰ Fànʔafɔw n tun a be sáà wi sánʔa, wee wi da pye lè syɛɛnfeleyi nyúngo na, woro n wi sánʔa n yaʔa.

²¹ Wi maa tɛʔɛ kaan wi ma wi pye woro kpáagi kùndigi, níì wi télege woro kɔ́lɔ yáriri myɛ nyúngo na,

²² koro ga pye waa wi syɛɛnkpolobèle kàragí àmɛɛ ki wi dɛ́nɛ lè, sáā sícilimɛ nii wi wolɛɛbèle ni.

²³ Koro kàdoʔo ma a Isirayɛli pan Ezyipiti tári ma, a Zyakɔbi baa pye nibɔɔn Kami tári ni.

²⁴ Kàfɔw n baa wi syɛ́ɛnbèle kàriga a be nɛʔɛ gbanʔama, wi n be fǎngi pye a gi nɛʔɛ n sɔ̀lɔ be kàsiitun-nyɛ́nbèle wóʔo na.

²⁵ Wi n be fúnyi kàriga, a be wi syɛ́ɛnbèle para, a bele bee jànvaa pye wi falipyebèle na.

²⁶ Wi n wi falipyew Mowizi tun ní Aarɔn ní wi nyɛ́nɛ n wòlo lè.

²⁷ Fɛ̀ɛ́bèle bele wi da kaan be ma lè, a pe be kpéʔele be níngi ni, wi n kakpoloyo kpéʔele Kami tári ni.

²⁸ Wi n yébiliwɔɔlɔ tórigo, a yébilimi tɔ̀nɔ n wɔ́ɔ, pe ga wi syɛ́ɛnri cée í.

²⁹ Wi n be lǒyi kàriga sìsyaan, níì be fábèle kpóo.

³⁰ A be tári nyìn wósɔɔn-jàwaliri na, fwɔɔ n jée be fànʔafɔbèle kpaafun-zínɛyɛ ni.

³¹ Wi n joo, a sísyɔɔnpeeri pan saʔa, á ziniw jée n be tári myɛ nyìn.

³² Wi n zěsolomɔ cáan be ma zěgi sìndɛʔɛ ni, níì naanyìnye lége be tári ni.

³³ Wi n be ɛrɛzɛn tíriri ní be děsyaantiiri kálagi, níì be tári tíire kabagi.

³⁴ Wi n joo, a kúdow pan, n fàra córomɔ fun kábàrari na.

³⁵ A di nyàági myɛ lìi be tári ni, ní wɔ́ɔ̀ be tári yaliifálara lìi.

³⁶ Wi n pìiselibèle myɛ kpóo be tári ni, poro bele be pye lè pe bárigaw myɛ yaselire.

³⁷ Wi n wi syɛ́ɛnbèle yirige yaà ní wálifiio, ní tɛɛ̀ ní, syɔɔn faala da ni lɔ́lɔgi be yòdaʔayi ni í.

³⁸ A be yirili kéele pye Ezyipiti tári ma fundaanra, níì cán be fyáari maa Ezyipiti ye cò.

³⁹ Wi maa fàfanʔa yirige n be tɔ́n, ní i naà gbɛ̀ɛnmɛ yirigi be ma yébiligi ni.

⁴⁰ Pe n wi nyɛ́ɛri a wi gbàrisɛɛyɛ tórigo be ma. Wi n nyɛ̀ʔɛni yaliire kaan be ma, a be lìi n tín.

⁴¹ Wi n fálagi yabi, a lɔ̀ʔɔ yiri gi ni ni fóo. Ki maa kabi ni fóo lɔ̀ʔɔ fun tári ni àmɛɛ cábiga nyɛ lè.

⁴² Níì cán wi maa ni sɔ̀ngí ni taagi wi syɛɛncanri na wi da joo lè Abirahami ma, wi lè wi falipyew.

⁴³ Wi n wi syɛ́ɛnbèle yirige yaà ní fundaangbɔɔrɔ ní, wi syɛɛnnyɛnɛ-wòlobèle, ní fundaanra yákpogéle ní.

⁴⁴ Wi n syɛɛnfeleyi tátɛɛyɛ kaan be ma, pe n syɛɛnfeleyi fáli tɔ̀nɔ taa,

⁴⁵ koro ga pye pe woro tundunri cò, pe woro làlwabèle kɔn. Aleluya!