Ŋúnuyi 104 - Cebaara Bible 2010

Ŋúnuyi 104 Bariga kaanna Faanfɔw Kolocɔlɔɔ ma

1 Ni pìle, da Yawe kpɔ̀ʔɔrɔ́!

¹ Ni pìle, da Yawe kpɔ̀ʔɔrɔ́! Yawe mii Kolocɔlɔw, mɔ n kpɔ́ʔɔ tɛɛ̀laʔala fun! Mɔ n fǎngi ní nìjangbɔɔri le burogo!

² Mɔ n miyɛɛ mígi ní gbɛ̀ɛ́nmi ní àmɛɛ burogbɔʔɔ nyɛ lè. Mɔ n nyɛ̀ʔɛni cariga àmɛɛ fànikpaʔa nyɛ lè.

³ Mɔ n mɔ kpaafunyi taʔa lǒyi ǹjoʔo ni, mɔ n fàfaanyi kpéʔele mɔ wotoro, mɔ i yìrigí káfalaga fókaanya na.

⁴ Mɔ n nyɛ̀ʔɛni tundunbéle kpéʔele káfalaya, níì mɔ falipyebèle kpéʔele naanyìnye.

⁵ Mɔ wi tári yérige di kàpɔɔnbèle na, ti a tée cúngo nyáana í.

⁶ Mɔ n lòkpɔɔ-cùrugi tɛ́ʔɛ n di tɔ́n àmɛɛ burogbɔʔɔ nyɛ lè, lǒyi maa nyanbeleyi tɔ́n.

⁷ Mɔ n fúlo yi na a yi fàn, mɔ nyɛʔɛvololi kàfulogo báriga ni a yi kári kelekele.

⁸ Yi n sɔ̀lɔ nyanbeleyi ǹjoyo ni, níì tìgi n jée jǐnlɔyi ni n sáà yére tɛ́ɛgi ni mɔ da sámaga yi ma lè.

⁹ Mɔ n láʔala kúun koro ga pye lǒyi a kɔ́ tɛ́ɛli bee kána í, koro ga pye yi a ní kɔ́ pan ba tári tɔ́n í.

¹⁰ Mɔ wi púloweegèle pye ke i púlo jǐnlɔyi ni, a ge i fóo nyanbeleyi lariya ni.

¹¹ Sìnbirigi yaweere myɛ i gbo ke lǒgi na, ségi jòfanibēle myɛ i be lògbaalaagi kwóo yaà.

¹² Nyɛ̀ʔɛni féjɛɛngèlē i tɛ̀ɛ́n yi taana, ní i fúlo káganyi nínge ni.

¹³ Wi i lɔ̀ʔɔ yirigi wi ǹjoʔo ma tɛɛkòroyi ni, ni nyanbeleyi fɔɔnri. Tári myɛ n tín wi kapyegèle yasanra na.

¹⁴ Wi i nyàági fíin yaweeri ma, níì yaliifálari kpéʔele syɔɔn ye kéeli na, kánmi bee na tári lìile yirigi be ma,

¹⁵ ní dùvɛɛnw, wee wi fundaanra kaangi syɔɔn ma lè, n fàra sǐnmi na, bee bi wi yɛ́ɛgi yaʔa ki i daragi lè, ní yaliiri, dee di syɔɔn zɔnw télegi lè.

¹⁶ Yawe tíiyi i sámagi ni tíngi lǒgi na, yi lè Liban sɛdiri tíiyi, yee wi cɔ́rɔ lè.

¹⁷ Féjɛɛngèle i ge zyàári téeri yi ni, siipirɛ tíiyi yi nyɛ karakpáaw tɛɛkòrogo.

¹⁸ Nyanbe-nyundɔnɔyi i nyɛ seʔe sikebèle tɛɛkòrogo, fálakɔriyi si i nyɛ ŋúnubèle tɛɛlaraga.

¹⁹ Wi n yégi kpéʔele làrigèle wàlila kéele na. Cángi n gi làrijeeli cán.

²⁰ Mɔ i maa ní yébilimi ní, a yébiligi i wóo, lǎli bee ni a kɔliyi yaweere myɛ i yìrigí ni nyaari.

²¹ Càarabiigèle i yákpogèle wáa káari kurugo, ni ge yaliiri caa Kolocɔlɔɔ ma.

²² Cángi ga ni yirigi, ke n kári bi sa làra ge tɛɛ̀sinɛyi ni.

²³ Syɔɔn n si yiri n kári wi fáliw ma n sa ni báara bi ba cángi kwɔ́ɔ.

²⁴ Ee Yawe, mɔ kakpéʔelegèle n tɔ̀nɔ n nɛʔɛ! Mɔ n gele bee myɛ kpéʔele ní sícilimɛ ní. Tári n nyìn mɔ yakpéʔeleri na.

²⁵ Sólomi lɔ̀ʔɔ wéle gee, ki n kpɔ́ʔɔ níì cariga n kári kàbanyi myɛ na, ki n nyìn córomɔ fun yáriri na di nyaʔami ni máari lè gi ni yaweeyiliri ní wogbolori.

²⁶ Bàtobèle i nyaari yaà, Levyatan i yaà, woro wee mɔ sámaga lè waa kɔ̀nʔɔ́ gi ni.

²⁷ Yaweeri bee myɛ i wéle mɔ ma jàngó mɔ í da toro yaliiri kaangi toro ma ti làrigaanni ni.

²⁸ Mɔ i di kaangi di ma a ti i di syoo. Mɔ i mɔ kɔ́gi múru di ma, a ti i tíngi yacanri na.

²⁹ Mɔ si ga mɔ yɛ́ɛgi làriga, ti myɛ fúnyo n curugo. Mɔ ga sìíw ŋɔ́ngara yirige di ni, ti n kùu, si lúru kàri támiige.

³⁰ Mɔ i mɔ pili tórogi, ti n faan, mɔ i tári yɛ́ʔɛ kàragí wovɔngɔ ní.

³¹ Yawe nìjangbɔɔri n yɛlɛ bi kòro beè làla o làla! Ki n yɛlɛ Yawe í da fundaanra kpéʔele wi kapyegèle kéele na!

³² Wi i tári wéle, a di i cɛ̀lɛ́, wi i tángi nyanbeleyi na, a yi i wírige yirigi.

³³ N mii yaʔa sìi na, mii a ra ŋúu Yawe ma, n mii yaʔa beè, mii a ra mii Kolocɔlɔw kpɔ̀ʔɔrɔlɔ ŋúnuyo ŋúu.

³⁴ Mii sɔ̀ngumi kèlē n yɛlɛ bi wi dɛ́nɛ! Mii a ra fundaanra kpéʔele Yawe ni.

³⁵ Kapeebyebèle n yɛlɛ be kálagi yiri tári ni, syɛɛnpeebèle a ní kɔ́ pye beè í! Ni fungo, da Yawe kpɔ̀ʔɔrɔ́! Aleluya!