Ŋúnuyi 103 - Cebaara Bible 2010

Ŋúnuyi 103 Mii i caa bi Yawe pye bariga

1 Davidi ŋúnugi.

¹ Davidi ŋúnugi. Ni fungo, da kpɔʔɔrɔ taari Yawe na! Mii fúngi myɛ n yɛlɛ bàā kpɔʔɔrɔ taari wi mɛ́ɛcǎngi na!

² Ni fungo, da kpɔʔɔrɔ taari Yawe na, mɔ a kɔ́ fɛ̀ʔɛ wi kacànnaa nibin na í.

³ Woro wi mɔ kolomi kèlē myɛ kùsulugo syoo, ní i mɔ yáami myɛ láari mɔ na,

⁴ woro wi mɔ siiw syoo ni yirigi weecurugi ni, ní i funjǎngi ní nyínimi tɔ́ngi mɔ nyúngi ni fànʔafɔ-nyùndɔnnɔ,

⁵ woro wi mɔ tíngi yacanri na wolɛɛgwɔʔɔ ní, ní i mɔ kàragí wojáriɔ àmɛɛ nyɔɔdàdaga nyɛ lè.

⁶ Yawe i sínnɛ kele kpéʔele, wi i wɔʔɔgi fɔ̀ɔlɔ myɛ kútii cɛnɛ kányɛɛgi na.

⁷ Wi n wi katimanagèle tɛ̀ɛn Mowizi na, ní wɔ́ɔ̀ wi kakpolo-kpéʔeleyi tɛ̀ɛn Isirayɛli yòdaʔayi na.

⁸ Yawe i nyɛ funjànga, ní nyinimɛ fɔ́lɔ, wi fúngi o taanri kelekele í, wi nyínimi n tɔ̀nɔ n nɛʔɛ.

⁹ Wi o fúlo ni syée nya làla o làla í, wi o wi fundanʔari kɔngi ni yaari nya kwɔ́ɔmɔ fun í.

¹⁰ Wi o wolo có ni yɛlɛgi ní wolo kapeegèle ní í, wi o wolo sàrá ni yɛlɛgi ní wolo kolomi kèlē ní í.

¹¹ Tàmagee Kolocɔlɔɔ le ní wi yɛ́ɛgi fyáafɔɔlɔ ní lè, kánmee na nyɛ̀ʔɛni léeli tári na lè, kánmi bee na gi fǎngi nyɛ.

¹² Kánmee na canʔafolomɔ léeli canʔajeemɛ na lè, kánmi bee na wi wolo kapeegèle léeli wolo na.

¹³ Amɛɛ tofɔlɔ nyinimɛ taagi wi pìíbèle na lè, kánmi bee na Yawe nyinimɛ taagi wi yɛ́ɛgi fyáafɔɔlɔ na.

¹⁴ Níì cán wi n gi cán yárigee ní woro wolo sámaga lè, wi i sɔ̀ngí ni taagi gi na ncan wolo i nyɛ támiige.

¹⁵ Syɔɔn siiw i nyɛ àmɛɛ nyàā nyɛ lè, wi i leegi àmɛɛ sìnbirigi nyàáfyɛɛnrɛ nyɛ lè.

¹⁶ Káfalaga ga sɔ̀lɔ di na, ti n kwɔ́ɔ, ti a ní nyaa di tɛ́ɛgi ni í.

¹⁷ Kàjáa funjǎngi gi nyɛ Yawe ma wi yɛ́ɛgi fyáafɔɔlɔ kabaan na lè, nlaa yaà booma ni ki a tée kwɔ́ɔ í. Wi sínni si wɔ́ɔ i nyɛ be pìíbèle pìibēle ma,

¹⁸ poro bele be wi joogaanni cò lè, níì be yákirii yaʔa wi tundunri na, ni di kpéʔele.

¹⁹ Yawe n wi fàngoli sámaga n télege nyɛ̀ʔɛni na, wi fǎngi i nyɛ yáriri myɛ nyúngo na.

²⁰ Yaa Yawe kpɔ̀ʔɔrɔ́, yele bele ye nyɛ lè wi nyɛ̀ʔɛni tundunbéle, yele bele ye nyɛ lè fànnɛʔɛgi sànbalibéle, yele bele ye wi syɛ́ɛnri lúro lè, ní i wi nyɛnɛ kérigèle kpéʔele ni forogi.

²¹ Yaa Yawe kpɔ̀ʔɔrɔ́ wi nyɛ̀ʔɛni sùlasiibéle myɛ, yele bele ye nyɛ lè wi falipyebèle ní i wi kanidaangèle kpéʔele!

²² Yaa Yawe kpɔ̀ʔɔrɔ́ wi yafaanri myɛ, wi fǎngi tɛ́ɛyɛ myɛ ni! Ni pìle, da Yawe kpɔ̀ʔɔrɔ́!