Ŋúnuyi 102 - Cebaara Bible 2010

Ŋúnuyi 102 Wɔʔɔgi ní sɔ̀ngumi tɛɛtaʔaga

¹ Fɔ̀rɔgɔfɔwaa nyɛ́ɛrigɛ. Lǎli ni wi bárigaw kwɔ́ɔ lè, á wi si wi fúngi myɛ joo n fílige Yawe yɛ́ʔɛ ma.

² Yawe, ki n yɛlɛ mi mii nyɛ́ɛrigi lóʔo, mii sùpili n yɛlɛ li nan mɔ na!

³ Mɔ a kɔ́ mɔ yɛ́ɛgi làriga mii na mii wɔʔɔgi canʔa na í! Mɔ líiyi cáan mi lóʔo mii ma, cángee na mii ga mɔ mɛ́ɛgi yeri lè! Wári mi lóʔo mii ma!

⁴ Níì cán mii sìíw canya i kwóo àmɛɛ wírige nyɛ lè, mii kaceleyi i sóori àmɛɛ naà kàjenyungo nyɛ lè.

⁵ Mii fúngi n kpúmɔn níì waʔa àmɛɛ nyàā nyɛ lè, àlí mii i fɛ̀ʔɛ́ mii yaliiri na.

⁶ Mii césaligi n tára mii kaceleyi na mii cɛ́ɛnmi báriga ni.

⁷ Mii i nyɛ àmɛɛ fìimɛ tára kpɔʔɔlɔgɔ nyɛ lè, mii n kataʔa zàngbuloweʔe wíri.

⁸ Mii i syɔ̀ɔ́n nyɛ̀nɛ na, mii i nyɛ àmɛɛ cɔ̀ɔrɔbile nyɛ lè, lee li nyɛ lè li nibin kpaʔa njoʔo ni.

⁹ Mii nigoobèle i mii faari canʔa o canʔa, mii kàsiitun-nyɛ́nbèle fúnyo yi tanʔa lè cama ni, mii mɛ́ɛgi na be kɛ̀ɛ́ ni kaangi peyɛɛ ma.

¹⁰ Mii i cɔ́ɔngi líi yaliiri sìndɛʔɛ ni, mii nyatinmi i nyáʔami mii lògbaagi ni,

¹¹ mɔ fúngi yìrile ní mɔ fundanʔaw báriga ni, níì cán mɔ n mii láa n yìrige níì mii wáa léelige.

¹² Mii sìíw canya i nyɛ àmɛɛ cângwɔʔɔ nyɔ́ɔ kànyinnɛ nyɛ lè, á mii si i waari àmɛɛ nyàā nyɛ lè.

¹³ Kàjáa mɔ Yawe i nyɛ fànʔafɔlɔ làla o làla, pe a ra sɔ̀ngí da taagi mɔ na yìrigèle myɛ syɛ̀ɛnnɛ nínge ni.

¹⁴ Mɔ a ba yìri si nyinimɛ taa Siyɔn na. Níì cán lǎli n nan, lee ni mɔ a nyinimɛ taa wi na lè, lǎli n tɔ̀nɔ n nan.

¹⁵ Níì cán wi kàdɛnɛyi kéele n mɔ falipyebèle dɛ́nɛ, pe i nyinimɛ taagi wi támiigi na.

¹⁶ Lǎli bee ni syɛɛnfeleyi a ra fɛ̀ɛgí Yawe mɛ́ɛgi na, tári fànʔafɔɔlɔ myɛ a ra fɛ̀ɛgí mɔ nijangbɔɔri na.

¹⁷ Yawe a ní tɔ̀nɔ́ Siyɔn faan, wi a ba wiyɛɛ dɛ̀ɛn wi nìjangbɔɔri ni.

¹⁸ Wi a wi yɛ́ɛgi fíige foomɔfɔw nyɛ́ɛrigɛ ma, wi a tée wi nyɛ́ɛrigi faʔa í.

¹⁹ Gee bee n yɛlɛ gi sɛ́bɛ bi kòro bele ma pe a ba yìri lè, syɛɛnfelegee ki a ní séli faan lè ki a ra Yawe sòoló!

²⁰ «Níì cán bi Yawe yaʔa yaà ǹjoʔo ma wi tɛɛcǎngi ni, wi n wi nyúngi jùngu naa. Bi wi yaʔa yaà nyɛ̀ʔɛni na wi i wéle naa tári na.

²¹ Koro ga pye bi kàsolew cɛ́ɛnmɛ lóʔo si be syɔɔ bele be nyɛ lè kùúw tɛ́ʔɛmɛ ni.»

²² Koro ga pye paa Yawe mɛ́ɛgi kéele jáari Siyɔn ni, sáā wi soololi kéele nyuu Zyerusalɛmi ni,

²³ lǎli ni syɛɛnfeleyi ní fǎnyi ga baa yiyɛɛ gbóʔoro lè, bàā báara Yawe ma.

²⁴ Wi n mii bárigaw kwɔ́ɔ n mii yaʔa kólogi na, wi n kàa yirige mii sìíw canya ni.

²⁵ Mii n jo: «Mii Kolocɔlɔw, mɔ a kɔ́ mii láa yirige mii sìíw canya nínge ni í, mɔ wee sìi yɛ̀ʔɛlɛ ke a kòro lè bàā syée nya yìrigèle myɛ syɛ̀ɛnnɛ ma!»

²⁶ Mɔ wi tári kàpɔɔn le làrizelili ni, nyɛ̀ʔɛgèle i nyɛ mɔ kɔ́yi yakpéʔelere.

²⁷ Ti a ba kwɔ́ɔ, mɔ si kòro beè làla o làla. Ti myɛ a ba yɛ́rɛ àmɛɛ burogo nyɛ lè. Mɔ a di kàriga àmɛɛ burogbɔʔɔ nyɛ lè, ti a kàri.

²⁸ Kàjáa mɔ a kòro kanijanmi na, mɔ yɛ́ɛgèle a kwɔ́ɔ bi nyaa í.

²⁹ Mɔ falipyebèle pìibēle a tɛɛ̀tɛ́nɛgɛ taa, pe yòdaʔayi a báriga bi kòro beè mɔ yɛ́ʔɛ ma.