Ŋúnuyi 101 - Cebaara Bible 2010

Ŋúnuyi 101 Fànʔafɔw n kàli Kolocɔlɔɔ yɛ́ʔɛ ma n jo woro a ra táanri kányɛɛgi na

1 Davidi ŋúnugi.

¹ Davidi ŋúnugi. Mii a ra funjǎngi ní kútiisinw kéele ŋúu. Ee Yawe, mɔ kpɔʔɔrɔli kéele mii a ra ŋúu.

² Mii a ra táanri kajoolo fun syɛ́ɛnbèle kólogo ni. Làlìí ni mɔ a pan ba mii wéle? Mii a ra táanri ní fûnzinge ní mii kpáagi ni.

³ Mii a tée yapeʔe faala tɛ́ʔɛ niyɛɛ yɛ́ʔɛ ma bàā gi nyaagi í. Syɛɛnnaa-sìnzinbèle kapyere n mii bɛɛn, ti a tée tára mii na í.

⁴ Námara fúngi a léeli mii na. Mii a tée fɔ̀lɔ kapeʔe faala na í.

⁵ Wee wi wi syɛɛnnyɛnw mɛ́ʔɛ kálagi lè làrama ni, mii a wee bee nyɔ́ɔ tɔ́n. Syɔ́ɔnwee wi wi yɛ́ɛgi yìrige n taʔa lè, á kpɔ́ɔmi wi nyìn, mii a tée wee bee kéele kpàraco í.

⁶ Mii nyɛ́nɛ a pye tágala syɛ́ɛnbèle na be nyɛ lè tári ni, koro ga pye be tɛ́ɛn mii taana. Wee wi táanri kajoolo fun syɛ́ɛnbèle kólogi ni lè, wee bee fɔ́lɔ a ra báara mii ma.

⁷ Námarafɔlɔ a tée tɛʔɛ taa mii kpáagi ni bi tɛ́ɛn í. Jànvaafɔlɔ a tée kòro mii yɛ́ʔɛ ma í.

⁸ Canʔa o canʔa nyɛʔɛ nyɔ́ɔ na mii a ra tári syɛɛnpeebéle myɛ nyɔ́ɔyɔ tɔ́ngi, koro ga pye mii í kakolobyebèle myɛ kwɔ́ɔ yirige Yawe kěgi ni.