Ŋúnuyi 10 - Cebaara Bible 2010

Ŋúnuyi 10

¹ Ee Yawe, nyàʔá na mɔ canʔana n yére léelige? Nyàʔá na mɔ làrá wɔʔɔgi làla ni?

² N syɛɛnpeew yaʔa wi nɛ̀ɛnyɛnɛgi ni, wi n yìri fɔ̀rɔgɔfɔbèle kurugo, námara kérigèle be tímana lè, pe n cò ge na.

³ Níì cán syɛɛnpeeo i wiyɛɛ gbɔ́ʔɔgi ní wi ki laànitaagi yárira ní, tɔ̀nɔpeew caafɔlɔ i dánga syɛ́ɛnri nyuu ní i Yawe faari.

⁴ Syɛɛnpeeo i wiyɛɛ gbɔ́ʔɔgi ní i gi nyuu níì jo: «Yíbege o yaà í! Kolocɔlɔɔ o yaà í!» Wi sɔ̀nguri myɛ di nyɛ toro.

⁵ Wi kérigèle i nyɔɔgi làrigèle myɛ ni. Mɔ kútiiw kèlē n tɔ̀nɔ n léeli wi na, ke a nan wi na í, wi i wi kàsiitun-nyɛ́nbèle faari.

⁶ Wi i gi nyuu wiyɛɛ fúngi ni níì jo: «Mii a tée fága í, wɔʔɔlɔ a nan mii na nyáana í!»

⁷ Wi nyɔ́ɔgi n nyìn dángaw syɛ́ɛnrɛ, ní fáanagi, ní jànvaaw na. Péemi, ní sìnzinmi i nyɛ wi nyínni láara ni.

⁸ Wi i làrá ni sige kěyi nyɔ́ɔ na, wi i tɛɛlɛ fun syɛ́ɛnbèle kúu làrama tɛ́ɛyi ni. Wi n nyapiigèle le n yaʔa funnyɛnigɛfɔw ni ni wi kɔ̀rɔsíi làrama ni.

⁹ Wi i làrá ni sige làrama tɛ́ʔɛ ni àmɛɛ càaraɔ nyɛ wi tɛɛlàragi ni lè, wi i làrá jàngó bi ba foomɔfɔw pàla. Foomɔfɔw ga too wi cɔ̀ɔ́w ni lǎlee ni lè, wi n wi kíle n fùlo wiyɛɛ na n cò.

¹⁰ Wi i kògí, ní i tíri ni sìnɛ́, funnyɛniyi fɔ̀ɔlɔ si i tuun wi kajinri ni.

¹¹ Wi i gi nyuu wiyɛɛ fúngi ni níì jo: «Kolocɔlɔɔ o sɔ̀ngí ni taagi gi na í! Wi i wi yɛ́ɛgi làragí, wi o yafyɛn wéle í!»

¹² Ee Yawe, ki n yɛlɛ mi yìri. Ee Kolocɔlɔɔ, mɔ kɔ́gi yìrige, mɔ a kɔ́ fɛ̀ʔɛ fɔ̀rɔgɔfɔbèle na í!

¹³ Nyàʔá na syɛɛnpeew mɔ faari Kolocɔlɔɔ? Nyàʔá na wi gi nyuu wiyɛɛ fúngi ni níì jo: «Mɔ a yíbege kpéʔele gee bee na í?»

¹⁴ Mɔ si n gi nyaa, ncan mɔ i wi wɔʔɔgi, ní wi fɔ̀rɔgi nyaagi, jàngó bi kɔlɔ̀ wáa wi ma. Mɔ má funnyɛnigɛfɔw wiyɛɛ yaʔa, mɔ wi nyɛ círiw dɛ̀ɛmɛfɔlɔ.

¹⁵ Syɛɛnpeew kɔ́lɔ kabi, yíbege kpéʔele syɛɛnpeew ma wi péemi kéele na, wi péemi túlugaa a ní kɔ́ nyaa í.

¹⁶ Yawe i nyɛ fànʔafɔlɔ làla o làla kwɔ́ɔmɔ fun. Syɛɛnfeleyi n kálagi péw n yiri wi tári ni.

¹⁷ Ee Yawe, yárigee láa gi nyɛ màámi fɔ̀ɔlɔ na lè, mɔ i be nyɛ́ɛrigi lúro. Mɔ i lòmaana légi be ni, mɔ i mɔ líiyi cáan ni lúro,

¹⁸ si tànʔa kaan círiw, ní fɔ̀rɔgɔfɔw ma, koro ga pye tári syɔ́ɔnwaa a ní kɔ́ fyáara kaan ti be cò í.