Ŋúnudaangi 8 - Cebaara Bible 2010

¹ Ee! Mɔ ga maa pye mii senyɛnnɛ, wee wi ŋɔri mii nɔ́ɔw yíregéle na lè, mii ga maa mɔ fàra n nyaa kàfugi na, mii a dée mɔ wáa mígi, pe si a ra mii faari í.

² Mii a dée mɔ kɔ́ri kári, mii a dée sa mɔ lége mii nɔ́ɔw kpaʔa ni, mɔ si mii tama. Mii si mɔ kaan mɔ í gbaa nùndaanni dùvɛɛn na, wi lè mii girenadiw lɔ̀ʔɔ.

³ Ki n yɛlɛ wi kàmɔnɔ kɔ́gi í pye mii nyúngi láara ni, wi kàliigi si mii wáa mígi!

⁴ Zyerusalɛmi calipiigèle, mii i yele nyɛ́ɛri gbanʔama yele a kɔ́ gi yìrige í, yele a kɔ́ tàmagi yìrige ŋúnɔmi na í, bi taa wi ba ra gi caa.

Tàmagi fànʔa (Calipiigèle)

⁵ Céwee wi yìri fìími tára ma ni maa lè níì wiyɛɛ zígi wi nànnidaanmaw na, wìí wii? Mii n mɔ yìrige ŋúnɔmi na pɔ́mi tíigi láara ni. Beè mɔ nɔ́ɔw mɔ fícɛnni taa lè, beè mɔ seefɔw mɔ fícɛnni taa lè.

(Pìcaaw)

⁶ Mii kéeli taʔa mɔ zɔnw na àmɛɛ be fɛ̀ɛ taari lè. Amɛɛ fɛ̀ɛ nyɛ lè mɔ kɔ́gi na. Níì cán tàmagi fànʔa n nɛʔɛ àmɛɛ kùúw nyɛ lè, yejaagi n gbàn àmɛɛ kúbèle tɛɛkòrogo nyɛ lè. Ki naanyǐngi i nyɛ àmɛɛ naagbanga wóʔo nyɛ lè. Ki i tuun àmɛɛ nyɛ̀ʔɛzalila nyɛ lè.

⁷ Lòkpoloyi a gbǎn tàmagi fígi í, cábiyi a gbǎn gi wáa í. Syɔɔn ga wi kpáagi lɔ́rɔ myɛ kaan bi tàmagi syɔɔ, faʔara yagana wi a taa.

(Senyɛnnǎnbèle)

⁸ Cɔnɔvɔlɔ i nyɛ wolo ma wi ga kɔ́ɔ̀ yiregéle yirige í. Nyàʔá wolo a pye wolo cɔnɔw kéele na cángee na wàa ga wi keele joo lè?

⁹ Wi ga pye tò, wolo a wálifiio yáriya faan wi ǹjogi ni. Wi ga pye kpaaweele, wolo a li tɔ́n ní sɛdiri tiikpakpaʔa ní.

(Pìcaaw)

¹⁰ Mii i nyɛ tò, mii yíregèle si i nyɛ wi kpaataʔa-tɔ́nɔyi. A mii si wɔ́ɔ̀ pye wi nyɛnɛ na cewaa, wee wi yɛɛ̀nyinge taa lè.

¹¹ Ɛrɛzɛn séʔe maa pye Salomɔn ma Baali-Hamɔn ni. A wi ɛrɛzɛn ségi kàlifáa kpaàwelebéle ma. Pe myɛ nibin nibin maa ni wálifiio támabéle saala kagunɔ kagunɔbèlē kaangi yasanri kéele na.

¹² Mii ɛrɛzɛn ségi gi nyɛ lè mii wóʔo, mii nyɛ́nɛ i nyɛ gi na. Wálifiiw saala kagunɔ i nyɛ mɔ wóo Salomɔn, sirakele si a pye wee bee ni yasanri kpaàwelebéle wóo!

(Nìyiliw)

¹³ Mɔ wee wi nyɛ lè nángwɔɔbèle kòrofɔjaa! Tàannyɛ̀nnɛ i líiyi cáan ni mɔ yákpoli lúro. Li yaʔa mii í li lóʔo!

(Pìcaaw)

¹⁴ Da fé, mii nànnidaanmaw! Pye àmɛɛ wogaà, wàlá àmɛɛ sɔ̀ɔbēle pya nyɛ lè nùndaanni yárira nyanbeleye na!