Ŋúnudaangi 7 - Cebaara Bible 2010

(Cébèle ní pìcaabèle)

¹ Lúru maa maa, lúru maa maa, Sulamiti! Lúru maa maa, lúru maa maa, koro ga pye wolo í ba mɔ sámaga wéle. Nyàʔá yele a sámaga wéle Sulamitiw na, àmɛɛ lé kabiya siin yɔ́ɔlɔ nyɛ lè?

(Nìyiliw)

² Mɔ tɔ́lɔyi n tɔ̀nɔ n nyɔɔ mɔ taʔalayi ni, mɔ mɛ́ʔɛfɔlɔ cálipile! Mɔ nígboow i nyɛ kóriro àmɛɛ kɔ́nɔtiriye nyɛ lè, kacánmi fáli kpéʔelefɔlɔ kɔ́lɔ kapyele lii.

³ Mɔ fícɛnni i nyɛ círiri àmɛɛ yagbaala nyɛ lè, lee li lè nùndaanna dùvɛɛn o fɔ̀ngí li ni í. Mɔ céri i nyɛ àmɛɛ yaliigboolo nyɛ lè, lee sìnbirigi nyàáfyɛɛnrɛ màʔa lè.

⁴ Mɔ yíregèle siin i nyɛ àmɛɛ pìipiiye siin nyɛ lè, mɔ a jo wogaà ŋǎnbéle bɛɛ.

⁵ Mɔ yatiigi i nyɛ àmɛɛ sogànʔana kpaataʔa-tɔ́nɔgɔ nyɛ lè. Mɔ nyapiigèle i nyɛ àmɛɛ Hɛsyibɔn lǒgi wéeye nyɛ lè, Bati-Arabimi kpàánweeli nyɔ́ɔ na. Mɔ fínaani i nyɛ àmɛɛ Liban kpaataʔa-tɔ́nɔgi nyɛ lè, gee gi kpáaw wéle lè Damasi kàbangi na.

⁶ Mɔ nyúngi i nyɛ cáw àmɛɛ Karimɛli nyanbelegi nyɛ lè. Mɔ nyundiingi téegéle i nyɛ àmɛɛ fàninyɛɛɔn nyɛ lè, ke nyɛ́ʔɛni i fànʔafɔlɔ có.

⁷ Mɔ n tɔ̀nɔ n nyɔɔ, mɔ kéeli n tɔ̀nɔ n syɔɔn dɛ́nɛ, mii tàmagi, mii fúngi kanidaangéle!

⁸ Mɔ yéreganmi i nyɛ àmɛɛ sɛʔɛtiige nyɛ lè, mɔ yíregèle si i nyɛ jɔnjɔnyi.

⁹ Mii n jo: «Fwɔɔ mii í lúgu sɛʔɛtiigi ni, mii a gi yasanyi cò.» Mɔ yíregèle n yɛlɛ ge pye àmɛɛ ɛrɛzɛn jɔnjɔnyɔ nyɛ lè, Mɔ ŋɔ́ngari nùndaanna si pye àmɛɛ pɔ́mi wólo nyɛ lè,

¹⁰ mɔ nyɔ́ɔgi si pye àmɛɛ dùvɛɛncàɔn nyɛ lè, wi i tíri zìnmɛ na mii nànnidaanmaw ma, wi i fóo ni tíri ŋúnɔfɔbèle nyɔ́ɔwara na.

(Pìcaaw)

¹¹ Mii i nyɛ mii nànnidaanmaw wóo, mii láagi gi tɔ̀nɔ́ nyɛ wi na.

Bi wàa dɛ́nɛ, koro fundaanri (Pìcaaw)

¹² Da maa, mii nànnidaanmaw, wo kári sìnbirigi ni, wo sa ra syɔ̀ɔ́n kèpiigèle ni!

¹³ Nyǐngi nyɔ́ɔ na pɛɛn pɛɛn, wolo a ra yirigi bàā syée ɛrɛzɛn séyi ma, bi sa ra gi wéle kapye a ɛrɛzɛn tíriri kɔ́ ni wâburo yirigi, a fyɛ́ɛnri cabara, kapye a girenadi tíiri kɔ́ ni fyɛ́ɛnrɛ kpéʔele. Nɛɛ bee mii a ra mɔ nyaana.

¹⁴ Mandiragɔriw i wi nùndaanni yirigi, yasanri di tɛ́nɛ n sɔ̀lɔ lè, dee bee myɛ i nyɛ wolo kpaaweegèle na, tiisanri wovɔnrɔ, ní di wolɛɛri, mii nànnidaanmaw, mii n di kɔn mɔ kéeli na.