Ŋúnudaangi 6 - Cebaara Bible 2010

(Calipiigèle)

¹ Sán mɔ nannidaanmaw kári, ee cébèle myɛ wojaɔn? Kàbangìí na mɔ nannidaanmaw kolo n fala, wolo si pínɛ ní mɔ ní wo sa wi caa?

(Pìcaaw)

² Mii nànnidaanmaw n tìgi yaà wi nángwɔɔw ma, nùndaanni fílɛɛri gboolo ma, bi sa wi yaweeri kaan di lìi nángwɔɔbèle ni, si sìnbirigi nyàáfyɛɛnraa kúun.

³ Mii i nyɛ mii nànnidaanmaw wóo, a mii nànnidaanmaw i nyɛ mii wóo. Wi i wi yaweeri nàʔá sìnbirigi nyàáfyɛɛnrɛ nínge ni.

Pìcaanidaanmaw kánma tɛɛnnɛ (Nìyiliw)

⁴ Mɔ n tɔ̀nɔ n nyɔɔ, mii pínɛnyɛnjew àmɛɛ Tiirisa nyɛ lè. Mɔ n tɔ̀nɔ n nyɔɔ àmɛɛ Zyerusalɛmi nyɛ lè, ní i nyɛ fyáara yáriga àmɛɛ kapɛɛnkpumɔnbéle kabiya nyɛ lè pe dìrapobèle láara ni.

⁵ Mɔ nyapiigèle yirige mii ni, níì cán ke i mii fúngi nyáʔami. Mɔ njoori i nyɛ àmɛɛ sikegboolo nyɛ lè, bele be fé ni tíri Galaadi tìgimi ni lè.

⁶ Mɔ gangèle i nyɛ àmɛɛ bàcàala gboolo nyɛ lè, bele be yìri tɛɛgbaagi ma ni lúru ni syée lè. Pe myɛ nibin nibin senyɛnjabala i nyɛ ŋǎnbéle, pe wàa ga fɔ̀n wi woò ni í.

⁷ Mɔ bɛɛnyi i nyɛ àmɛɛ girenadi tílaga nyɛ lè, mɔ nyundɔn-fàniw láara ni.

⁸ Fànʔafɔjaala togoye taanri i yaà, n fàra cefàra-mí-láabèle togoye sicɛrɛ na, ní córomɔ fun picaala.

⁹ Mii kàtoli i nyɛ nibin pée, li lè mii wonyɔɔ-mí-forow. Wi i nyɛ pìininbinge wi nɔ́ɔw ma, wee kéele li kpɔ́ʔɔ céwee má wi wi see lè. Cepiibèle i wi nyaagi, ní i wi yiri dùbaw pyà. Fànʔafɔjebèle ní cefàra-mí-láabèle wɔ́ɔ i gee bee nyuu, ní i wi sòoló níì jo:

¹⁰ «Céw wi wiyɛɛ dèé lè wee àmɛɛ nyǐnjerigi nyɛ lè, wìí wi woro, woro wee wi nyɔɔ àmɛɛ yégi nyɛ lè, ní i daragi àmɛɛ cángi nyɛ lè, ní si i nyɛ fyáara yáriga àmɛɛ kapɛɛnkpumɔnbéle kabiya nyɛ lè pe dirapobèle láara ni?»

¹¹ Mii i tíri nuwa tíiri nángwɔɔ ma bi sa gòrógoroweegi yafiinvɔ́nrɔ wéle, bi gi wéle kapye ɛrɛzɛntíriri i wâburo yirigi, kapye girenadi tíiri i fyɛ́ɛnrɛ kpéʔele.

¹² Mii ga níì kàa cán í, kàjáa gee láa gi nyɛ mii na lè, ki i mii kàragí àmɛɛ mii syɛ́ɛnbèle mɛ́ɛyɛ fɔɔlɔ wotorobéle nyɛ lè.