Ŋúnudaangi 5 - Cebaara Bible 2010

(Nìyiliw)

¹ Mii i jǐn mii nángwɔɔw ni, ni senyɛnjaà, ni pìcaa. Mii a cɔɔ mii míiriw, ní mii nùndaanni yárira ni, mii i mii ségbabigi líi ní mii sárigi ní, mii i mii dùvɛɛnw ní mii nɔ́nɔw gbo. Yaa líi, ni tàannyɛ̀nnɛ, yaa gbo, yaa tàmagi gbo kaa yele cáan!

(Tàannyɛnbèle) Pìcaaw n wi kɔ̀rigi múgu wi ma kàjáa lǎli n sɔ̀lɔ (Pìcaaw)

² Mii maa ni ŋúnɔ mii fúngi si i nyɛ nyɛ̀nɛ na, mii i kɔ̀rigi kólomɔ lúro mii nànnidaanmaw ma, a wi jo: «Ki múgu mii ma, ni senyɛnjaà, ní ni pínɛnyɛnjaa, mii kàtoli, ní mii wonyɔɔ-mí-forow! Níì cán kásagi n mii nyúngi tɔ́n, yébiligi lòsɔ̄lɔgéle n mii ǹjoori nyíngi.»

³ Mii n mii búrogi wòlo, mɛ̀ɛ́ si mii a ní gi le bi sɛ́ɛ? Mii n mii tɔ́lɔyi jée, mɛ̀ɛ́ si mii a ní yi nɔ́nʔɔ bi sɛ́ɛ?

⁴ Mii nànnidaanmaw n wi kɔ́gi lége kɔ̀rigi wéele ni, a mii fúngi yárira i nyaʔami mii ni wi kéeli na.

⁵ A mii yìri bi kɔ̀rigi múgu mii nànnidaanmaw ma. Mii kɔ́yi si maa ni míiriw ŋuu, mii kabegèle maa ni míiriw sɔlɔ ni cáan gbóʔorogi yacogo na.

⁶ A mii kɔ̀rigi múgu mii nànnidaanmaw ma. Kàjáa mii nànnidaanmaw maa kàdoʔo kaan, wi maa sɔ̀lɔ n fala. Wi syɛ́ɛnri maa ni mii pǐli yirigi mii ni. A mii wi caa, mii si ga wi nyaa í. A mii wi yeri, wi ga syɔɔ mii ma í.

⁷ Kěgi kpaàwelebéle be kěgi nyaari ni máari lè, a poro mii fàra n nyaa. Pe n mii kpúmɔn, pe n mii kpàli, tǒw kpaàwelebéle n mii fàniwáaw syɔɔ mii na.

⁸ Zyerusalɛmi calipiigèle, mii i yele nyɛ́ɛri gbanʔama, yele ga mii nànnidaanmaw fàra n nyaa, nyàʔá yele a joo wi ma? Ki n yɛlɛ ye wi pye tàmagi n yaama cáan mii na.

(Calipiigèle)

⁹ Nyàʔá gi tɔ̀ʔɔ́ nyɛ mɔ nannidaanmaw ma n sɔ̀lɔ wàa na, ee, cébèle myɛ wojaɔn? Nyàʔá gi tɔ̀ʔɔ́ nyɛ mɔ nànnidaanmaw ma n sɔ̀lɔ wàa na, á mɔ si i wolo nyɛ́ɛri nya gbanʔama kánmi naa na?

(Pìcaaw)

¹⁰ Mii nànnidaanmaw i daragi, wi i nyɛ sólosolo, wi i cángi ni wɛ̀ɛ́ selebingéle kagunɔ nínge ni.

¹¹ Wi nyúngi i nyɛ tɛɛteleo, wi ǹjoori i yóo, níì wɔ́ɔ àmɛɛ kàanrigi nyɛ lè.

¹² Wi nyapiigèle i nyɛ àmɛɛ kàtogèlē nyɛ lè lònyɔɔ na, móō ke n wéli nɔ́nɔ ni, á ge sámaga n tɛ́ɛn.

¹³ Wi bɛ̀ɛ́nyi i nyɛ àmɛɛ nùndaanna fílɛɛri gboolo nyɛ lè, nùndaanna nyàányunyo. Wi nyɔɔwari i nyɛ àmɛɛ sìnbirigi nyàáfyɛɛnrɛ nyɛ lè, beè míiriw ŋuu ni caragi lè.

¹⁴ Wi kɔ́yi i nyɛ àmɛɛ tɛɛ̀ vèʔebēle nyɛ, bele ni be kirizoliiti le lè. Wi céri i nyɛ àmɛɛ sogǎn-wɔlɔgɔlɔ nyɛ lè, lee be tɔ́n ní safiiri ní lè.

¹⁵ Wi kàsanayi i nyɛ àmɛɛ kàdɛnɛjàn-vìire gàángéle nyɛ lè, gele be taʔala tɛɛcàndeleo yataʔaya na lè. Wi kánmi i nyɛ àmɛɛ Liban nyanbelegi nyɛ lè, wi i nyɛ cáw àmɛɛ sɛdiri tíiyi nyɛ lè.

¹⁶ Wi nyɔ́ɔgi syɛ́ɛnrɛ i nyɛ tàanma yagana, wi kánmi myɛ tɔ̀nɔ́ i nyɛ syɔɔn yanidaanmaga. Kánmi bee na mii nànnidaanmaw nyɛ, kánmi bee na mii tànnyɛnw nyɛ, Zyerusalɛmi calipiigèle!