Ŋúnudaangi 4 - Cebaara Bible 2010

(Nìyiliw)

¹ Mɔ n tɔ̀nɔ n nyɔɔ, ni pínɛnyɛnjaa, mɔ n tɔ̀nɔ nyɔɔ! Mɔ nyapiigèle i nyɛ kàtogèlē mɔ nyundɔn-fàniw láara ni. Mɔ njoori i nyɛ àmɛɛ sikegboolo nyɛ lè, bele be fé ni tíri Galaadi nyanbelegi tìgimɛ ni lè.

² Mɔ gangèle i nyɛ àmɛɛ bàcàala gboolo nyɛ, bele síire be cɛnɛ lè, bele be yìri lǒgi ma n lúru ni syée lè. Pe myɛ nibin nibin senyɛnjabala i nyɛ ŋǎnbéle, pe wàa ga fɔ̀n wi woò ni í.

³ Mɔ nyɔɔwari i nyɛ àmɛɛ mɛɛnnyɛɛnnɛ nyɛ lè, mɔ nyɔ́ɔgi syɛ́ɛnrɛ n tɛ́nɛ, mɔ bɛɛnyi si i nyɛ àmɛɛ girenadi tílaga nyɛ lè, mɔ nyundɔn-fàniw láara ni.

⁴ Mɔ yátiigi i nyɛ àmɛɛ Davidi kpaataʔa-tɔ́nɔgi nyɛ lè, gee wi faan lè n pye kapɛɛnkpumɔn-yárira tɛɛ̀tɛʔɛgɛ. Tunmɔzige-yariya saala kagunɔ i yaà gi ni wojɔrɔyɔ ní, yoro myɛ i nyɛ nànniribēle wóyo.

⁵ Mɔ yíregèle siin i nyɛ àmɛɛ pìifaliya siin nyɛ lè, mɔ a jo wogaà ŋǎnbéle bɛɛ, bele be líi sìnbirigi nyàáfyɛɛnrɛ nínge ni lè.

⁶ Sáni cânnyingi káfalala í ba ra funu lè, kànyingèle si kwɔ́ɔ, mii a kári míiri nyanbelegi ma, ní nùndaanni yáriga dandamaga na.

⁷ Mɔ n tɔ̀nɔ n nyɔɔ n foro mii pínɛnyɛnjew, tɛɛlɛ faala o nyɛ mɔ na í.

⁸ Da maa ní mii ní wo yìri Liban nyanbelegi ma, ni pìcaa! Da maa ní mii ní wo yìri Liban nyanbelegi ma! Da wéle, bi mɔ yaʔa Amana ǹjogi ni, ní Seniiri ní Hɛrimɔn ǹjogi ni, ní bi mɔ yaʔa càarabèle wéeye nyɔ́ɔ na, ní sèdebèle nyanbeleye na.

⁹ Mɔ i mii fúngi yirigi mii ni, ni senyɛnjaà, ni pìcaa, mɔ wéleli nibin i mii fúngi yirigi mii ni, ní mɔ kɔ́nɔtiriyi yatolo nibin wɔ́ɔgēle.

¹⁰ Mɔ tamagi n tɔ̀nɔ n tɛ́nɛ, ni senyɛnjaà, ní ni pìcaa! Mɔ tamagi n tɛ́nɛ n sɔ̀lɔ dùvɛɛn na, mɔ nundaanni sìnmɛ núngo n tɛ́nɛ n sɔ̀lɔ nùndaanni yárira myɛ wóʔo na!

¹¹ Mɔ nyɔɔwari i sárigi sɔlɔ, ni pìcaa. Sárigā ní nɔ́nɔ i nyɛ mɔ nyínni láara ni, mɔ búroyi nùndanna si i nyɛ àmɛɛ Liban nùndaanni nyɛ lè.

¹² Mɔ i nyɛ nángwɔɔ, wee be sùlu lè, ni senyɛnjaà, ní ni pìcaa, ní pùnweele, lee be sùlu lè, ní púloweele, lee na be fɛ̀ɛ taʔa lè.

¹³ Mɔ lókolopiigèle i girenadi tíire séʔe fɔɔnri, gee yasanra di nyɔɔ lè, ní nùndaanna tiipiire, ní náari ní,

¹⁴ náariw ní safiranw, ní nùndaanni nyàákanga, ní kanɛliw, ní nùndaanni yárira tíire myɛw, ní míiriw, ní alowɛsiw, ní nùndaanni làtikɔli myɛ wi pɔ́rɔ n sɔ̀lɔ lè.

¹⁵ Nángwɔɔbéle punweele lii, sìi lɔ́ʔɔ kɔ̀lɔ́ wii, ní lòyo, yee yi fóo ni tíri lè Liban nyanbelegi na.

(Pìcaaw)

¹⁶ Solomɔkulo kàbangi káfalaga, yìri ŋúnɔmi na! Wòrogulo kàbangi káfalaga, da maa! Da mii nángwɔɔw fee, koro ga pye wi nùndaanni yárira núngo í da yirigi! Mii nànnidaanmaw n yɛlɛ wi jée wi nángwɔɔw ni, wi wi nángwɔɔw yasanjanraa lìi!