Ŋúnudaangi 3 - Cebaara Bible 2010

Pìcaaw n ŋúnɔ n gi nyaa woro i syée wi tɛɛcaagi ni (Pìcaaw)

¹ N mii yaʔa mii yasinɛgi na yébiligi làla ni, wee kéele li mii dɛ́nɛ mii fúngi ni lè, a mii wi caa, mii n wi caa, mii si ga wi caa n nyaa í.

² Koro na mii a yìri, mii a kěgi nyaari foro, kàlari-kóloyi, ní kadàlayi na. Wee kéele li mii dɛ́nɛ mii fúngi ni lè, mii a wi caa. Mii n wi caa, kàjáa mii ga wi caa n nyaa í.

³ Kpaàwelebèle n mii fàra n nyaa, poro bele be kěgi nyaari ni máari lè, a mii jo: «Wee kéele li mii dɛ́nɛ mii fúngi ni lè a yele wi nyaa lé?»

⁴ Mii tɛ́nɛ̀ sɔ̀lɔ be na lè terire, wee kéele li mii dɛ́nɛ mii fúngi ni lè, a mii fala n wi nyaa. A mii wi cò, mii si a ní wi yaʔa í, bi taa mii í kári ní wi ní sa lége mii nɔ́ɔw kpaʔa ni, wee wi mii fícɛnni taa lè woro kpaafungi ni.

⁵ Zyerusalɛmi calipiigèle, mii i yele nyɛ́ɛri gbanʔama wogebèle ní sìnbirigi sɔ̀ɔbēle báriga ni, yele a kɔ́ gi yìrige í, yele a kɔ́ tàmagi yìrige ŋúnɔmi na í, bi taa wi ba ra gi caa.

⁶ Nyàʔá gi yìri yaà gee fìími tára ma ni maa àmɛɛ wíritɔnɔyɔ nyɛ lè, ní àmɛɛ míiri nùndaanna wírile ní nùndaanna míige nyɛ lè, ní nùndaanni yáriga latikɔli féleye myɛ ní?

⁷ Salomɔn láali kòlo lii, á sanbalipɔɔlɔ togoye taanri li màʔa, pe n pye Isirayɛli sànbali-tèlebèle pèle.

⁸ Pe myɛ i nyɛ ní ŋɔséebéle ní, níì gbàn kapɛɛnni kpúmɔnganma na. Pe myɛ nibin nibin ŋɔséebéle i nyɛ be cèsiinyunyi na, yébiligi fyáara yanyaaya kéele na.

⁹ Fànʔafɔw Salomɔn n syɛɛn-láa-kòlo sámaga wiyɛɛ wólo ní Liban tíire ní.

¹⁰ Wi n li gàángèle sámaga wálifiio wòʔolo níì tɛɛsalagi pye tɛɛ̀ wóʔo, níì kǒli sámaga ní fàninyɛɛɔn ní. Zyerusalɛmi calipiigèle n li fungomaw súu ní tàmaga ní.

¹¹ Ye yiri, Siyɔn calipiigèle, ye sa fànʔafɔw Salomɔn sámaga ye wéle ní fànʔafɔ-nyùndɔnni ní, lee wi nɔ́ɔw tɔ́n wi na lè wi cèpɔrigi canʔa na, cángee na wi pye lè fundaanra na wi fúngi ni.