Ŋúnudaangi 2 - Cebaara Bible 2010

¹ Mii i nyɛ Sarɔn tɛɛfiigi fílɛɛri, ní sìnbirigi nyàáfyɛɛnrɛ ti lè jǐnlɔyi ni.

(Nìyiliw)

² Amɛɛ sìnbirige nyàáfyɛɛnrɛ nyɛ lè wúuro tiipiiye nínge ni, ànbée mii pínɛnyɛnjew nyɛ pìcaabèle nínge ni.

(Pìcaaw)

³ Amɛɛ pɔ́mi tíige nyɛ lè kɔligɔ tíire nínge ni, ànbée mii nànnidaanmaw nyɛ nìgɔcaribèle nínge ni. Ki láagi i nyɛ mii na bi tɛ́ɛn wi nyínmi ni, wi yasangi n tɛ́nɛ mii nyɔ́ɔgi na.

⁴ Wi n mii lége dùvɛɛn fundaanra tɛ́ʔɛ ni. Káfaliw wi sáanri ni tɔ́ngi mii na lè, woro wi nyɛ tàmagi.

⁵ Ye fànʔa le mii ni ní ɛrɛzɛn kàgbalaya ní. Ye pɔ́mipiiye tɛ́ʔɛ ye mii fúngi nyíngi. Níì cán tàmagi kéele i nyɛ mii na yaama.

⁶ Ki n yɛlɛ wi kàmɔnɔ kɔ́gi í pye mii nyúngi láara ni, wi kàliigi si mii wáa mígi!

(Nìyiliw)

⁷ Zyerusalɛmi calipiigèle, mii i yele nyɛ́ɛri gbanʔama wogebèle ní sìnbirigi sɔ̀ɔbēle báriga ni, yele a kɔ́ gi yìrige í, yele a kɔ́ tàmagi yìrige ŋúnɔmi na í, bi taa wi ba ra gi caa.

Woro wi maa (Pìcaaw)

⁸ Mii nànnidaanmaw yákpolo lii! Wi wéle wee, wi i maa, wi i yegi nyanbeleyi na ni maa, ni yegi ni yìrigí dǎndamayi na ni maa.

⁹ Mii nànnidaanmaw i nyɛ àmɛɛ wogaà nyɛ lè, wàlá àmɛɛ sɔ̀ɔ pyà nyɛ lè. Wi wéle wee woyéreo ní wolo gúngi kàdoʔo ma, wi i wéle fɛ̀nɛtiriw na, wi nyapiigèle i nyín cɔ̀ɔ́w na.

¹⁰ Mii nànnidaanmaw n syɛ́ɛnri láa. Wi n mii pye: «Yìri, mii pínɛnyɛnjew, mii cecǎnw, máā maa.

¹¹ Níì cán wéle, wéeri làla n sɔ̀lɔ, zěgi n yére, ki n kári.

¹² Fílɛɛriw n càri tári ni, làriŋuuni n nan, kàtoli ŋùumɔ i lúro wolo tári ni.

¹³ Děsyaantiigi i gi yasanzeliri kpéʔele, ɛrɛzɛn tiipiiri di fyɛ́ɛn lè toro si i di nùndaanni yirigi. Yìri, mii pínɛnyɛnjew, mii cecǎnw, máā maa!

¹⁴ Mii kàtoli, mɔ wi lè fálayi wéeye fúngo ni, tɛɛkòlo-dìgiyi làrama tɛ́ʔɛ ni, ki yaʔa mii í mɔ yɛ́ɛgi nyaa, ki yaʔa mii í mɔ yákpoli lóʔo. Níì cán mɔ yákpoli n tɛ́nɛ, a mɔ yɛ́ɛcɔɔli nyɔɔ.»

(Nafɔw)

¹⁵ Ye sɔ́riyi cò wolo ma, sɔripiiyi yi ɛrɛzɛn séyi kálagi lè, bi gi taa wolo ɛrɛzɛn séyi i fyɛ́ɛn n kwɔ́ɔ.

(Pìcaaw)

¹⁶ Mii nànnidaanmaw i nyɛ mii wóo, a mii i nyɛ wi woò. Wi i wi yaweeri nàʔá sìnbirigi nyàáfyɛɛnrɛ nínge ni.

¹⁷ Sáni cânnyingi káfalala i ba ra funu lè, kànyingèle si kwɔ́ɔ, lúru mi pan! Mii nànnidaanmaw, ki n yɛlɛ mi pye àmɛɛ wogaà wàlá àmɛɛ sɔ̀ɔpile nyɛ lè, nyanbe-wàliyi na.