Ŋúnudaangi 1 - Cebaara Bible 2010

¹ Ŋúnudàángi gi lè Salomɔn wógi

Pìcaaw ní nìyiliw Tàmagi levɔɔlɔ jóomɔ ní peyɛɛ ní (Pìcaaw)

² Ki n yɛlɛ waa mii syɔɔnri ní wi nyɔ́ɔgi syɔɔnrigéle ní! Níì cán mɔ tamagi i có n sɔ̀lɔ dùvɛɛnw na.

³ Mɔ nundaanni sìnmɛ núngo n tɔ̀nɔ n tɛ́nɛ. Mɔ mɛ́ɛgi i nyɛ nùndaanna sìnmɛ, bee núngo gi caragi lè. Koro na mɔ kéeli pìcaabèle dɛ́nɛ.

⁴ Da mii kíle maa syée miyɛɛ kurugo! Waa fé! Fànʔafɔw n mii lége wi kpaafunyi ni. Wolo a ra muguri sáā fundaanra kpéʔele mɔ bárigaw ni. Wolo a ra mɔ tamagi kéele kpɔ́ʔɔgi bi sɔ̀lɔ dùvɛɛnw na. Tànʔa i be ma àmɛɛ mɔ kéeli be dɛ́nɛ lè.

⁵ Zyerusalɛmi calipiigèle, mii céri n wɔ́ɔ kàjáa mii si n sèʔê nyɔɔ, mii i nyɛ àmɛɛ Kedaari fànikpaayi nyɛ lè, àmɛɛ Salomɔn kpáagi fàniya nyɛ lè.

⁶ Yele a kɔ́ ra mii céri wɔ́ɔrɔ wéle í, cángi gi mii kàriga wowɔɔɔ ní. Mii nafɔlɔ-na-senyɛnbèle be lè nǎnbèle, pe fúnyi n tanʔa mii kurugo gbanʔama, a be mii kpéʔele ɛrɛzɛn séye kpaàweleo. Ɛrɛzɛn ségi si gi lè mii wógi, mii ga gi kpaà wéle í.

⁷ Mɔ wee kéele li mii dɛ́nɛ mii fúngi ni lè, tɛ́ɛgee ni mɔ mɔ yaweeri nàʔá lè, tɛ́ɛgee ni mɔ di yaari ti i ŋɔ́ngi ni daagi cânvulɛɛli làla ni lè, gi tɛ̀ɛn mii na jàngó mii a kɔ́ pye ninyaari-mí-màʔaga mɔ pínɛnyɛnbèle yaweere kurugo í.

(Bànaʔabèle)

⁸ Kapye mɔ ga koro cán í, ee, mɔ wee wi nyɔɔ n sɔ̀lɔ cesanbèle na lè, yiri mi taʔa yaweeyiligèle túluyo na maa mɔ sikepiigèle nàʔá bànaʔabèle tɛɛkòroyo taana.

(Nìyiliw)

⁹ Mii pínɛnyɛnjew, mii i mɔ tímana ní syɔnʔɔ ní, gee gi pwɔɔ Faraɔnw wòtoro na lè.

¹⁰ Mɔ bɛɛnyi n nyɔɔ líiyi vèʔebēle lariga ni, mɔ yátiigi n nyɔɔ kɔ́nɔtiriyi nínge ni.

(Bànaʔabèle)

¹¹ Wolo a tɛɛ̀ vèʔebēle sámaga mɔ ma, si wálifiio yárigéle le be na.

¹² N fànʔafɔw yaʔa wi lìigbɔɔli na, náariw làtikɔli wi pye mii na lè wi nùndaanni maa ni yirigi.

¹³ Mii nànnidaanmaw i nyɛ mii ma míiri pwɔ̀ɔlɔ, lee li nyɛ mii yíregèle lariga ni lè.

¹⁴ Mii nànnidaanmaw i nyɛ mii ma nùndaanna tiipiige yasanra jɔnjɔngɔ, Ɛn-Gedii ɛrɛzɛn séyi ni.

(Nìyiliw)

¹⁵ Mɔ n tɔ̀nɔ n nyɔɔ, ni pínɛnyɛnjaa, mɔ n tɔ̀nɔ n nyɔɔ! Mɔ nyapiigèle i nyɛ àmɛɛ kàtogèlē nyɛ lè.

(Pìcaaw)

¹⁶ Mɔ n tɔ̀nɔ n nyɔɔ, mii nànnidaanmaw, mɔ kéeli n tɔ̀nɔ n syɔɔn dɛ́nɛ! Wolo yasinɛgi i nyɛ nyàápungo.

¹⁷ Wolo kpaatɔn-tiipalayi i nyɛ sɛdiri tíiye, wolo tiinyiligèle si i nyɛ siipirɛ wòʔolo.