Nehemii 9 - Cebaara Bible 2010

Kapeegèle joo-mí-tɛ̀ɛnnɛ kpóʔorolo

¹ Yégi bee wonijanga ni, ki canya toko ní sicɛrɛ wógi na, a Isirayɛli ye gɔ̀nvaʔaya le buroyo, níì támiigi wo peyɛɛ na, níì kpóʔoro sún lele kéele na.

² Bele pe da pye lè Isirayɛli yòdaʔayi wòolo, a poro wàli n láʔa nibɔnbèle myɛ na, níì peyɛɛ gbóʔoro n baa yére be kapeegèle, ní be toolɛɛbèle kolomɔ ni.

³ A be yìri n yére be tɛɛ̀yéreyi ni n lɛ́ɛribéle taanri kwɔ́ɔ pe si i wéle Yawe be Kolocɔlɔw làlwa sɛ́bɛ ni ni nyuu be ma. Koro kadoʔo ma, a be yére be kapeegèle ni n lɛ́ɛribèle pèle taanri kwɔ́ɔ, níì too n be yɛ́ɛyi cíbele Yawe be Kolocɔlɔw yɛ́ʔɛ ma.

⁴ A Zyozuwe, ní Binuyi, ní Kadimyɛli, ní Syebanya, ní Bunii, ní Syerebya, ní Banii, ní Kenanii lúgu Levii ye yafaangi na, níì yákpogèle wáa gbanʔama Yawe be Kolocɔlɔw kurugo.

⁵ Levii ye be lè Zyozuwe, ní Kadimyɛli, ní Banii, ní Hasyabinya, ní Syerebya, ní Hodiya, ní Syebanya, ní Petahiya, a poro gi joo níì jo: «Ye yìri ye yére yáā Yawe yele kwɔ́ɔmɔ fun Kolocɔlɔw kpɔ̀ʔɔrɔ́. «Mɔ nijangbɔɔri mɛ́ʔɛ n yɛlɛ kaa kpɔ̀ʔɔrɔ́, koro gee gi sɔ̀lɔ lè dùbaw myɛ, ní sòololi myɛ na.

Nyɛ́ɛrigi kéele

⁶ Mɔ nibin wi nyɛ Yawe. Mɔ wi nyɛ̀ʔɛgèle sámaga, nyɛ̀ʔɛgèle myɛ ǹjoʔo ma nyɛ̀ʔɛgēle, ní ge yáriri myɛw, ní tári, ní yáriree myɛ di nyɛ di na lè, ní sólomi lòyo, ní yáriree myɛ di nyɛ yi ni lè. Mɔ wi sìíw kaangi toro myɛw ma. Nyɛ̀ʔɛni yárira myɛ i tíri ni tuun mɔ yɛ́ʔɛ ma.

⁷ Mɔ wi nyɛ Yawe, wi lè Kolocɔlɔɔ, mɔ wi Abirami nyɛ́nɛ n wòlo, níì wi yirige Uri ni, ki lè Kalide ye wógi, níì wi mɛ́ɛgi le Abirahami.

⁸ Amɛɛ mɔ gi nyaa a wi fúngi fílige mɔ yɛ́ʔɛ ma lè, a mɔ joogaanni kpéʔele ní wi ní bi Kanaan tári, ní Hɛti ye, ní Amɔri ye, ní Perezi ye, ní Yebusi ye, ní Giirigasi ye tári kaan wi yòdaʔayi ma. Mɔ n wɔ́ɔ̀ mɔ syɛ́ɛnri foro, níì cán mɔ n sín.

⁹ Mɔ n wolo tóolɛɛbèle wɔʔɔgɔ nyaa Ezyipiti ni, ní wɔ́ɔ̀ be sùpiigèle lóʔo Nyɛ̀nɛri Solomɔ lɔ́ʔɔ nyɔ́ɔ na.

¹⁰ Mɔ n fɛ̀ɛbēle ní kakpoloyo kpéʔele Faraɔnw ní wi syɛɛnkpolobèle myɛ, ní wi tári syɛ̀ɛnnɛ myɛ kánma na, níì cán mɔ maa gi cán nyùnwaagee felege ní pe da wolo tóolɛɛbèle cò lè, a mɔ mɛ́ɛkpɔʔɔ taa, gee gi nyɛ mɔ na lè, àlí n baa nan níjanʔa na.

¹¹ Mɔ n sólomi lɔ̀ʔɔ tíla pe yɛʔɛ̀ ma, a be foro sólomi lɔ̀ʔɔ nínge ni, táwaara na. Kàjáa bele pe da taʔa be na ni nɛnɛ lè mɔ n poro wáa weecurugi ni àmɛɛ pe kàdɛnɛgɛ wáa lè lòkpɔʔɔ ni.

¹² Mɔ maa ni be yɛ́ɛgi kínigi ní fàfaantɔnɔgɔ ní cángi làla ni, ní i be yɛ́ɛgi kínigi ní naà-tɔ́nɔgɔ ní yébiligi làla ni, gee ki da ni gbɛ̀ɛnmɛ yirigi be ma pe kôgárigi ni lè.

¹³ Mɔ n tìgi n baa tɛ́ɛn Sinayii nyanbelegi na. Mɔ n kòro yaà nyɛ̀ʔɛgèle ǹjoʔo ni níì joo ní be ní, n làlwaw kajoozingéle kaan be ma, ní kányɛɛgi làlwa kèlē, ní kajoodɛɛngèle, ní tundunri di nyɔɔ n foro lè.

¹⁴ Mɔ n mɔ falipyew Mowizi láa n mɔ cândɛnɛjǎngi tɛ̀ɛn be na n fàra tundunro, ní kajoodɛɛngēle, ní làlwa na.

¹⁵ Mɔ n búru yìrige yaà nyɛ̀ʔɛni na n kaan be ma lǎli ni kateegi be jáa lè, níì lɔ̀ʔɔ yirige fálaga ni n kaan be ma lǎli ni lògbaagi be jáa lè, níì be pye pe jée tári ni pe di syɔɔ be taa, dee kéele na mɔ da kàli níì jo mɔ a di kaan be ma lè.

¹⁶ Kàjáa wolo tóolɛɛbèle n nɛ̀ɛnyɛnɛgɛ kpéʔele. Pe n be nyúnyi waʔa, pe ga mɔ tundunri lóʔo í.

¹⁷ Pe ga fɔ̀lɔ bi lóʔo í, pe ga sɔ̀ngi n taa bìngaari kèlē na mɔ da kpéʔele be ma lè í, pe n be nyúnyi waʔa. Pe céemi fúngo ni, a be kùndigi télege peyɛɛ nyúngi na si lúru sa jée be púlori ni. Kàjáa mɔ i nyɛ Kolocɔlɔɔ, wee wi kùsulugi syoo lè, níì nyìn nyínimi, ní fûnnyingi na. Mɔ fúngi o taanri kelekele í, á mɔ nyìn funjǎngi na, mɔ ga be cée n yaʔa í.

¹⁸ Alí lǎli ni be tɛɛ̀ gbàla n náapiige sámaga lè, níì gi joo níì jo: ‹Mɔ kolocɔlɔw wi nyɛ wee naa, woro wee wi mɔ yirige lè Ezyipiti ni!› A be kapeekpɔʔɔ kpéʔele mɔ na kánmi bee na.

¹⁹ Mɔ si na, mɔ nyininɛʔɛmi báriga ni mɔ ga be cée n yaʔa fìími tára ni í. Fàfaantɔnɔgi ga be yɛ́ɛgi kíninɛ yaʔa cángi làla ni pe kôgárigi ni í, wàlá naà-tɔ́nɔgi yébiligi làla ni, bàā gbɛ̀ɛnmɛ yirigi be ma pe kôgárigi ni í.

²⁰ Mɔ n mɔ Piicanni kaan be ma bi be cìlige, mɔ ga mɔ mánɛw láʔa be nyɔ́ɔyi na í, níì lǒgi kaan be ma lǎli ni lògbaagi be jáa lè.

²¹ Mɔ n be gbóo yɛ̀ʔɛlɛ togoye siin fúngo ni fìími tára ni, yafyɛn ga be kólogo í. Pe búroyi ga lɛɛ n sulugu í, pe tɔ́lɔyi ga wɔ́ɔ̀ fɛɛ í.

²² Mɔ n fànya ní syɛɛnfeleye le be kɔ́yi ni, níì be taana tátɛɛyi lɛɛ be na. Pe n Sihɔn tári syɔɔ n taa, wi lè Hɛsyibɔn tári fànʔafɔlɔ, ní Ogi tári, wi lè Basyan fànʔafɔw.

²³ Mɔ n be jáabèle nɛʔɛ a be pye àmɛɛ nyɛ̀ʔɛni ŋɔripiigéle nyɛ lè, níì be lége tári ni, dee kéele mɔ da joo be toolɛɛbèle ma lè níì jo pe jée di ni pe di syɔɔ taa.

²⁴ Pe yòdaʔayi si n baa jée di ni n di syɔɔ n taa. Di syɛ́ɛnbèle pe lè Kanaan ye, mɔ n bele bee tìrige n cáan pe yɛʔɛ̀ ma, n be fànʔafɔbèle, ní di syɛ́ɛnbèle le be kɔ́yi ni, koro ga pye pe be cò bi yɛlɛ ni gi ní àmɛɛ ki be dɛ́nɛ lè.

²⁵ Pe n kèniriye taa, n fàra tácànra na, ní wɔ́ɔ̀ kpaaya taa, yee yi nyìn lɔ́ri féleye myɛ na lè, ní kɔ̀lɔ́dugu-gwɔ́ɔbéle, ní ɛrɛzɛn séye, ní olivye tíire, ní tíiri di sangi lè toro féleye saʔa, a be i líi ni tíngi, n sìnmɛ le. A be ŋɔ́ndaagbɔɔlɔ taa mɔ funjǎngi báriga ni.

²⁶ Kàjáa pe n yìri n sìnloʔomɔ kpéʔele mɔ kánmi na, pe n kàdoʔo wáa mɔ làlwaw ma. Mɔ kanyaajoobèle pe da ni nyuu ní be ní lè níì jo be lúru pan mɔ ma lè pe n poro kpóo, níì kapeekpoloyo kpéʔele.

²⁷ Lǎli bee ni a mɔ be le pe nigoobèle kɔ́yɔ ni, a be fǎngi gbàn be na. Kàjáa pe wɔʔɔgi làla ni, a be yákpogèle wáa mɔ kurugo, n mɔ yaʔa nyɛ̀ʔɛni na, a mɔ lóʔo be ma. Mɔ nyinigbɔɔmi báriga ni, mɔ syɔɔfɔɔlɔ kaan be ma, a poro be yirige pe nigoobèle kɔ́yɔ ni.

²⁸ Lǎli ni pe ŋɔ́ndaali taa lè, a be níì séli ni kapeeyi kpéʔele mɔ yɛ́ʔɛ ma. Lǎli bee ni, a mɔ be wáa n yaʔa pe nigoobèle kɔ́yɔ ni, a poro pye be nyúngi na. A be níì yákpogèle wáa mɔ kurugo, n mɔ yaʔa nyɛ̀ʔɛni na, a mɔ lóʔo be ma. Mɔ n be syɔɔ tɔlɔyɔ saʔa mɔ nyininɛʔɛmi báriga ni.

²⁹ Mɔ n be sàmi jàngó pe ní lúru pan mɔ làlwaw ma, kàjáa a be nɛ̀ɛnyɛnɛgɛ kpéʔele, pe ga fɔ̀lɔ mɔ kajoodɛɛngèle na í. Pe n kapeele pye mɔ làlwaw kajoogéle na, koro gele ge sìi kaangi bele ma pe ge có lè. Pe n bòʔogèle nyɛ́ʔɛ níì céemɛ kpéʔele, pe ga fɔ̀lɔ n lóʔo í.

³⁰ Mɔ n be kpàraco yɛ̀ʔɛlɛ saʔa fúngo ni, níì mɔ kanyaajoobèle láa n mɔ Pili tɛ́ʔɛ n be kɛɛlɛ, kàjáa pe ga lóʔo í, lǎli bee ni a mɔ be le tátɛɛyaa syɛɛnfeleye kɔ́yɔ ni.

³¹ Amɛɛ si mɔ nyínimi nɛʔɛ lè, mɔ ga be kálagi n kwɔ́ɔ í, mɔ ga be wáa n yaʔa í. Níì cán mɔ i nyɛ Kolocɔlɔwee wi fûnnyinge ní nyinimɛ taagi lè.

³² Tɔ́ɔliw ni doò, ee wolo Kolocɔlɔw, mɔ wi lè Kolocɔlɔɔ wogbɔɔw, ní séew fɔ́lɔ, ní fyáara yáriga, mɔ wee wi joogaanni, ní funjǎngi sámaga n cò lè, fɔ̀rɔgbɔɔgee gi nan lè mɔ syɛ́ɛnbèle myɛ na, pe nyɛ lè wolo ní wolo fànʔafɔbèle, ní wolo syɛɛnkpolobèle, ní wolo sáriga-wòlobèle, ní wolo kanyaajoobèle, ní wolo tóolɛɛbèle, nlaa yaà Asirii fànʔafɔbèle làla ni fwɔɔ n baa nan níjanʔa na, mɔ a kɔ́ gi córo kapiipiile í.

³³ Gee myɛ gi wolo taa lè, mɔ n sín gi ni. Níì cán mɔ n tánʔa kányɛɛgi na, á wolo si kapeʔe pye.

³⁴ Wolo fànʔafɔbèle, ní wolo syɛɛnkpolobèle, ní wolo sáriga-wòlobèle, ní wolo tóolɛɛbèle ga tánʔa mɔ lalwaw na í, pe ga wɔ́ɔ̀ yákirii yaʔa mɔ kajoodɛɛngèle, ní kérigèle na mɔ be sàmi lè í.

³⁵ N be yaʔa be fǎngi ni, lɔnɛʔɛri nínge ni, dee mɔ kaan be ma lè, ní tári ni di kpɔ́ʔɔ lè níì nyɔɔ, dee mɔ tɛ́ʔɛ be yɛʔɛ̀ ma lè, pe ga báara mɔ ma í, pe ga wɔ́ɔ̀ wàli n láʔa be kakolobyeri na í.

³⁶ Wolo wéle bele níjanʔa pulobèlē. Tári mɔ da kaan wolo tóolɛɛbèle ma lè jàngó paa di yasanri ní di lɔ́ri líi lè, wolo wéle bele pulobèlē di ni.

³⁷ Fànʔafɔbèle bele kɔ́yɔ ni mɔ wolo le lè wolo kapeebyeri kéele na, ti yasannɛʔɛri n baa pye poro wóro. Gee gi be dɛ́nɛ lè, a be i koro kpéʔele wolo céri, ní wolo yaweeri na. Wolo tɔ̀nɔ́ i nyɛ wɔʔɔgbɔʔɔ ni.»