Nehemii 8 - Cebaara Bible 2010

Ɛsidirasi n làlwaw sɛ́bɛ kàla syɛ́ɛnbèle ma

¹ A yeye kɔrɔsiin wógi baa nan, koro n gí taa Isirayɛli ye maa pye be kěyi ni. Lǎli bee ni a syɛ́ɛnbèle myɛ baa peyɛɛ gbóʔoro àmɛɛ nàɔn nibin nyɛ lè, kadàlagi na gi nyɛ lè Lǒgi kpàánweele yɛ́ʔɛ ma. A be sɛ́bɛkanw Ɛsidirasi pye waa maa ní Mowizi làlwaw sɛ́bɛ ni, wee Yawe sɛ́bɛ n kaan Isirayɛli ye ma lè.

² A sáriga-wòlow Ɛsidirasi pan ní làlwaw sɛ́bɛ ní syɛɛnkpoʔolomi yɛ́ʔɛ ma bi pye lè nǎnbèle ní cébèle, ní bele myɛ pe da nan bi gbǎn syɛɛnrɛ lóʔo lè si wɔ́ɔ di kɔ́rɔw cán. Koro n pye yeye kɔrɔsiin wógi cânzelige na.

³ A wi wéle sɛ́bɛw ni n séli nyǐngi nyɔ́ɔ na n taa a cángi baa tɛ́ɛn nyùngo ni, Lǒgi kpàánweele yɛ́ʔɛ ma, nǎnbèle, ní cébèle, ní bele nyɛ́nɛ na pe a gbǎn syɛɛnrɛ lóʔo lè si di kɔ́rɔw cán. A syɛ́ɛnbèle myɛ be yákiriw yaʔa làlwaw sɛ́bɛ syɛ́ɛnrɛ na gbanʔama, dee wi da ni wéle ni nyuu lè.

⁴ A sɛ́bɛkanw Ɛsidirasi yére bwɔ̀ɔ ǹjoʔo ni, wee pe da sámaga lè kéeli bee na. Bele be pye wi taana lè woyérebéle ní, wi kàliige ma, poro be nyɛ Matitya, ní Syema, ní Anaya, ní Urii, ní Hilikiya, ní Maaseya, wi kàmɔnɔ ma wóbèle si i nyɛ Pedaya, ní Misyayɛli, ní Malikiya, ní Hasyumi, ní Hasyibadana, ní Zakarii, ní Mesyulami.

⁵ A Ɛsidirasi sɛ́bɛw múgu a syɛ́ɛnbèle myɛ wi nyaa, níì cán wi maa pye syɛ́ɛnbèle myɛ ǹjoʔo ni. Lǎli ni wi sɛ́bɛw múgu lè, a syɛ́ɛnbèle myɛ yìri n yére.

⁶ A Ɛsidirasi bariga kaan Yawe ma wi lè Kolocɔlɔw, wee wi kpɔ́ʔɔ lè, a syɛ́ɛnbèle myɛ kɔ́yi yìrige níì jo: «Amiina! Amiina!» A be tìgi n too n yɛ́ɛyi cíbele tári na Yawe yɛ́ʔɛ ma.

⁷ Zyozuwe, ní Banii, ní Syerebya, ní Yamɛ, ní Akubi, ní Syabetayi, ní Hodiya, ní Maaseya, ní Kelita, ní Azariya, ní Yozabadi, ní Hanan, ní Pelaya, pe lè Levii ye, a poro i làlwaw kɔ́rɔ tèé syɛ́ɛnbèle na. A syɛ́ɛnbèle kòro woyérebéle ní.

⁸ Pe maa ni Kolocɔlɔɔ làlwaw sɛ́bɛ syɛ́ɛnrɛ wéle ni nyuu ni fíligi, ní wɔ́ɔ i di kɔ́rɔw tèé be na, a be i di kɔ́rɔw cángi.

⁹ Nehemii wi lè guvɛrinɛɛriw, ní Ɛsidirasi wi lè sáriga-wòlow ní sɛ́bɛkanw, ní Levii ye pe da ni syɛ́ɛnbèle tama lè, a poro gi joo syɛ́ɛnbèle myɛ ma níì jo: «Cángi naa i nyɛ cangaa, gee gi yaʔa lè Yawe yele Kolocɔlɔw ma. Yele a kɔ́ gi yaʔa gi pye yele ma kùu kayaʔa ní nyatinmɛ í.» Níì cán lǎli ni syɛ́ɛnbèle myɛ làlwaw syɛ́ɛnrɛ lóʔo lè, pe maa ni nyaan.

¹⁰ A Ɛsidirasi be pye: «Yaa syée kpaaya ma ye sa lìi ní kaara ní, yé yagbaataanya gbaa, syɔ́ɔnwee wi lè wi ga gbàn n yafyɛn sámaga í, ye yaliiraa tórigo wee bee ma, níì cán níjanʔa i nyɛ cangaa, gee gi yaʔa kɔlɔ̀ na lè wolo Kàfɔw ma. Yele a kɔ́ ra funbɛɛnrɛ kpéʔele í, níì cán Yawe fundaanri di nyɛ yele fǎngi.»

¹¹ A Levii ye i syɛ́ɛnbèle myɛ kpɛʔɛlɛ ní i gi nyuu be ma níì jo: «Ye pyèri! Níì cán cángi naa i nyɛ canjànga, yele a kɔ́ ra funbɛɛnrɛ kpéʔele í.»

¹² A syɛ́ɛnbèle myɛ kári be kpaaya ma bi sa lìi si gbaa, si wɔ́ɔ lɛɛgéle tórigo, si fundaangbɔɔrɔ kpéʔele. Níì cán syɛ́ɛnri ti da joo be ma lè, pe maa di kɔ́rɔw cán.

Kpáagèle Láara Tɛ́ɛnnɛ séri kpéʔelele

¹³ Canziin wógi na, a syɛ́ɛnbèle myɛ narigbaaya kundigibéle, ní sáriga-wòlobèle, ní Levii ye kári sɛ́bɛkanw Ɛsidirasi ma bi ní sa làlwaw syɛ́ɛnrɛ sámaga tama.

¹⁴ A be gi nyaa wozɛbɛgɛ ní làlwaw sɛ́bɛ ni ncan Yawe maa gi tɛ̀ɛn Mowizi na a wi gi joo níì jo, Isirayɛli ye maa yɛlɛ paa tɛ̀ɛ́n kpáagèle láara ni, yéyi kɔrɔsiin wóʔo séri làla ni,

¹⁵ á gi wɔ́ɔ̀ yɛlɛ pe gi joo be lóʔo, pe kéeli bee jáari be kěyi myɛ, ní Zyerusalɛmi ni si jo: «Ye yiri ye kári nyanbelegi ma, ye sa olivye wáraa, ní sìnbirigi olivye wáraa, ní miiriti wáraa, ní sɛʔɛwaraa, ní tiitɔnyi wáraa kúun yaa maa ye ba kpáagèle sámaga àmɛɛ gi sɛ́bɛ lè.»

¹⁶ Lǎli bee ni a syɛ́ɛnbèle yiri n sáà di kúun n pan n baa kpáagèle sámaga peyɛɛ ma, a pe myɛ nibin nibin ge sámaga be kpáayi ǹjoyo ni, ní be kàcoogèle ni, ní Kolocɔlɔɔ kpáagi kàcoolo ni, ní Lǒgi kpàánweele kadàlaga na, ní Efirayimi kpàánweeli kadàlaga na.

¹⁷ Syɛɛnkpoʔolomi wóbèle bele myɛ pe da yìri púlori na n lúru n pan lè, a be kpáagéle sámaga n tɛ́ɛn gele bee láara ni. Nlaa yaà Nun jáaw Zyozuwe cángi na fwɔɔ n baa nan cángi naa na, Isirayɛli ye da ní kɔ́ɔ̀ gee bee félege kpéʔele í. A gi tɔ̀nɔ n pye fundaangbɔɔrɔ.

¹⁸ A be i wéle Kolocɔlɔɔ làlwaw sɛ́bɛ ni canʔa o canʔa n séli cânzeligi na fwɔɔ n sáà nan canzangi na. A be sériw pye canya kɔrɔsiin fúngo ni, canya kɔrɔtaanri wógi na, a koro pye kpóʔorojànna n yɛlɛ ní kalɛɛli ní.