Nehemii 6 - Cebaara Bible 2010

Nigoobèle n níì ŋàʔana bi fáliw yérige

¹ Lǎli ni si Sanbala, ní Tobiya, ní Gesyɛmi wi lè Arabuw, ní wolo nigoobèle bele gi lóʔo lè mii n níì tǒw faan n kwɔ́ɔ, weegaa ga níì kòro wi na sìndɔn ni í, lǎli bee ni mii da kɔ́ɔ̀ kpàánweegèle kɔ̀riyɔ le í,

² a Sanbala ní Gesyɛmi tun mii ma níì jo: «Da maa wo ba woyɛɛ nyaa wo joo Kefiirimi ni, Onɔ jǐnlɔgi ni.» Pe maa gi tímana bi kapeʔe kpéʔele mii na.

³ A mii tundunbéle tun be ma ní syɛɛnlurugori naa ní níì jo: «Mii i naa falikpɔɔɔ na bi wi foro, mii a gbǎn tìgi yaà í. Nyàʔá na fáliw yɛlɛ wi yére bi lǎli bee kwɔ́ɔ lǎlee ni mii a wi yaʔa si tìgi yaà yele ma lè?»

⁴ A be tundunri wonijanra tórigo mii ma tɔlɔyɔ sicɛrɛ, a mii wɔ́ɔ̀ syɛɛnlurugori wonijanra tórigo be ma.

⁵ A Sanbala wi falipye-nigɔcariw tórigo mii ma tɔkagunɔ wógi na ní syɛ́ɛnri bee wonijanra ní, lɛ́tiri si i nyɛ wi kɔ́gi ni womúguo ní.

⁶ Ki maa sɛ́bɛ wi ni n jo: «Ki i nyuu ni máari syɛɛnfeleyi nínge ni, àmɛɛ Gasyimu wɔ́ɔ baa gi joo mii ma lè, níì jo, mɔ ní Zyefubèle ní, yele i sɔ̀ngí bi céemɛ kpéʔele, koro na mɔ ní i tǒw faanri. A gi wɔ́ɔ i nyuu níì jo mɔ a ba pye be fànʔafɔw.

⁷ A mɔ caà kanyaajoobéle télege paa gi nyuu mɔ kéeli na Zyerusalɛmi ni, si jo: ‹Fànʔafɔlɔ i nyɛ Zyuda ni,› kéeli bee si a nan fànʔafɔw na. Koro na da maa wo ba woyɛɛ nyaa wo pínɛ wo joo.»

⁸ A mii tun be sa wi yari: «Syɛ́ɛnri bee félege mɔ jo pe i nyuu ni máari lè ti tàa o beè í, mɔ wi koro tímana mɔ nyúngi kurugo!»

⁹ Syɛ́ɛnbèle bee myɛ maa ni caa bi wolo kàriga wolo í da fɛ̀ɛgí, níì jo: «Pe bárigaw a kwɔ́ɔ, fáliw si a ní kpéʔele í.» Tɔ́ɔliw ni, fànʔa le mii kɔ́yi ni ee Kolocɔlɔɔ.

¹⁰ Cangaa mii maa kári Syemayeya kpaʔa ma, wi lè Delaya jáaw, Delaya wi lè Mehetabeyɛli jáaw. Wi maa kpáagi tɔ́n wiyɛɛ na. A wi sáà mii pye: «Wo pínɛ wo kári Kolocɔlɔɔ kpáagi ma, wo sa jée kpɔ̀ʔɔrɔli kpaʔa fúngo ni, wó kpɔ̀ʔɔrɔli kpaʔa kɔ̀riyɔ tɔ́n. Níì cán pe i maa ba mɔ kpóo, yébiligi si ni pe a pan bi ba mɔ kpóo.»

¹¹ A mii wi yari: «Mii félege syɔ́ɔn si fàn lé? Ba nànwìí wi a pye àmɛɛ mii nyɛ lè si jée kpɔ̀ʔɔrɔli kpaʔa ni si ní gbǎn kòro sìi na? Mii a jée yaà í.»

¹² A mii gi cán ncan Kolocɔlɔɔ ban wi wi tun í. Kàjáa wi maa kérigèle nyaa n joo n tɛ̀ɛn kánmi bee na, mii kéeli na, níì cán Tobiya ní Sanbala ye pe da wi syɔɔ wáli na.

¹³ Amɛɛ pe wi syɔɔ wáli na kánmi bee na lè pe maa ni sɔ̀ngí mii a fyáa si taʔa wi syɛ́ɛnri na si kapeele pye. Pe a dée mii mɛ́ɛgi kálagi si faʔara wáa mii na.

¹⁴ Ee mii Kolocɔlɔw, sɔ̀ngi mi taa Tobiya, ní Sanbala, ní be kapyegèle na, n fàra kanyaajoocew Nowadya, ní kanyaajoobèle bele na pe da ni caa bi fyáara lége mii ni lè.

¹⁵ Tǒw n faan n kwɔ́ɔ Eluli yégi canya toko ní kagunɔ wógi na, canya togoye siin ní kpɔrigɔ ní siin fúngo ni.

¹⁶ Lǎli ni wolo nigoobèle myɛ kéeli bee lóʔo lè, syɛɛnfeleyi myɛ yi wolo màʔa lè, a yi fyáa. A yi tɔ̀nɔ n yiyɛɛ nyaa fɛ̀ɛrɛ wóyo ní, ní wɔ́ɔ̀ gi cán fáliw n kpéʔele n foro n yɛlɛ ní wolo Kolocɔlɔw nyɛ́nɛ kéele ní.

¹⁷ Cányi bee ni wɔ́ɔgēle, Zyuda mɛ́ɛkpoloyi fɔ̀ɔlɔ maa ni sɛ́bɛbéle tórogi Tobiya ma tɔlɔyɔ saʔa, a Tobiya wóbèle wɔ́ɔ i maa be ma.

¹⁸ Níì cán Zyuda wóbèle pèle saʔa maa pwɔɔ wi na ní kàliga ní, ncan Syekanya wi lè Ara jáaw, wi maa pye woro pìíw nàɔn, á wi tiimaa jáaw Yohanan Berekiya jáaw Mesyulami pìíw láa wi cɔɔ̀.

¹⁹ Alí pe maa ni wi mɛ́ɛtaangi yiri mii nyɛ́nɛ na, ní wɔ́ɔ i mii syɛ́ɛnri lée n sa ni nyuu wi ma. Tobiya maa ni sɛ́bɛbéle tórogi koro ga pye bi fyáara lége mii ni.