Nehemii 5 - Cebaara Bible 2010

Nehemii n sìnzinmi kèlē kwɔ́ɔ n yìrige yaà

¹ A nǎnbèle pèle ní be cébèle yákpowáara yìrige gbanʔama syɛɛnfelegi ni, be senyɛnbèle kurugo pe lè Zyefubèle.

² Pe pèle maa ni gi nyuu níì jo: «Wolo, ní wolo nànbiigèle ní wolo calipiigèle n nɛʔɛ. Wolo i bile caa bàā líi si kòro sìi na.»

³ Pe pèle si i gi nyuu níì jo: «Wolo i wolo séyi, ní wolo ɛrɛzɛn séyi, ní wolo kpáayi nii fwɔɔgèle lariga ni, jàngó bàā bilew taagi kateekpɔɔgi làla ni.»

⁴ Pèle si i gi nyuu níì jo: «Wáli fwɔ́ɔgèle wolo kúun lè jàngó bi nyǔnyi lɔ́rɔ kaan fànʔafɔw ma, wolo séyi, ní wolo ɛrɛzɛn séyi n jée gele bee lariga ni.

⁵ Bi gi taa wolo ní wolo senyɛnbèle cére i nyɛ wonijanra, a wolo pìíbèle ní be wóbèle wɔ́ɔ i nyɛ wonijanbéle. Kàjáa wolo i wolo nànbiigèle, ní wolo calipiigèle nii púlori ni. Alí wolo calipiigèle kèle saʔa n jée n kwɔ́ɔ yaà. Wolo fánʔa si a ní taa yafyɛn na í, níì cán wolo séyi ní wolo ɛrɛzɛn séyi i nyɛ n kwɔ́ɔ pèle ma.»

⁶ Lǎli ni mii be yákpowáari ní syɛ́ɛnri bee lóʔo lè, a mii fúngi tanʔa gbanʔama.

⁷ A mii gi kɔ̀rirɔ n tímana bi fúlo mɛ́ɛkpoloyi fɔ̀ɔlɔ, ní kútiijoobèle na, mii n be pye: «Yele í da fwɔ́ɔgèle nii lé yele senyɛnbèle na tɔ̀nɔ kéele na!» A mii be yeri kpóʔorogbɔɔlɔ na.

⁸ A mii be pye: «Wolo n wolo senyɛnbèle nyúnyo syɔɔ n yɛlɛ ní wolo fǎngi kánma ní, pe lè Zyefubèle, poro bele pe da pára lè syɛɛnfeleyi ma. Yele tiimaa si ní ba ra yele senyɛnbèle pára lé, ní caa i be pára naa wolo ma?» A be pyèri, pe ga syɛɛnlurugoro taa n kaan í.

⁹ A mii níì jo: «Gee yele kpéʔele lè, ki ga nyɔɔ í. Wolo Kolocɔlɔw yɛ́ʔɛ fyáara na ban yele yɛlɛ bàā táanri koro ga pye bi syɔɔ syɛɛnfeleyi faʔara ma ì, yi lè wolo nigoobèle ì?

¹⁰ Mii ní mii senyɛnbèle, ní mii falipye-nìgɔcaribèle ní, wolo n wɔ́ɔ̀ wáli, ní bile fwɔ́ɔgéle le be na. Koro na, ki n yɛlɛ wo fwɔ́ɔgèle bee yaʔa be ma.

¹¹ Ye be séyi, ní be ɛrɛzɛn séyi, ní be olivye tíiri, ní be kpáayi lúrugo be ma níjanʔa n fàra wáliw, ní bilew, ní dùvɛɛnfɔnw, ní sǐnmi na yele syɔɔ be ma lè tɔ̀nɔw.»

¹² A be jo: «Wolo a di lúrugo be ma, wolo si a ní da yafyɛn caa be ma í. Wolo a gi pye àmɛɛ mɔ jo lè.» Lǎli bee ni a mii sáriga-wòlobèle yeri, ní baa be pye a be kàli pe yɛ́ʔɛ ma n gi tɛ̀ɛn poro a be nyɔɔsyɛɛnri foro.

¹³ A mii mii búrogi tɛɛkùrugo nyàʔara níì jo: «Syɔ́ɔnwee faala ga baa pye lè wi ga syɛ́ɛnri naa foro í, ki n yɛlɛ Kolocɔlɔɔ í syɔ́ɔnw bee nyàʔara kánmi naa na bi yirige wi kpáagi, ní wi kɔlɔ̀ yáriri ni. Anbée syɔɔnw bee yɛlɛ bi nyàʔara bi yaʔa wowaaɔ ní.» A syɛɛnkpoʔolomi myɛ jo: «Amiina!» A be Yawe kpɔ̀ʔɔrɔ. A syɛ́ɛnbèle syɛ́ɛnri foro.

¹⁴ N fàra gee bee na, nlaa cángee na mii télege lè pe guvɛrinɛɛriw Zyuda tári ni, n séli fànʔafɔw Aritakisɛrikisɛsi fǎngi yɛ̀ʔɛlɛ toko wóli na n sáà nan wi fǎngi yɛ̀ʔɛlɛ toko ní kpɔrigɔ ní siin wóli na, yɛ́ɛgèle kɛɛ ní siin fúngo ni, mii yoo, mii senyɛnbèle yoo, gee gi yɛlɛ ní guvɛrinɛɛri ní lè wolo ga gi kàa lìi í.

¹⁵ Guvɛrinɛɛri-sélibèle be pye mii yɛ́ʔɛ ma lè, poro maa gi gbàn syɛ́ɛnbèle na, ni yaliiri, ní dùvɛɛnw syoo be ma n fàra wálifiio támabéle togoye siin-ziin na. Alí be falipye-nìgɔcaribèle maa ni fǎngi kpéʔele syɛ́ɛnbèle na. Mii si ga koro kàa kpéʔele í, àmɛɛ mii fɛ̀ɛgí Kolocɔlɔɔ na lè.

¹⁶ N fàra gee bee na, a mii báara tǒw naa sámagala na, wolo ga wɔ́ɔ̀ seʔe faala syɔɔ í, á mii falipye-nìgɔcaribèle myɛ kpóʔoro n pye fáliw na.

¹⁷ Zyefubèle ní kútiijoobèle, nànbēle togoye kɔrɔsiin ní kpɔrigɔ si wɔ́ɔ i líi ní mii ní mii tàbaliw na, n fàra bele na pe da ni yìrigí syɛɛnfeleyi ma ni maa wolo ma lè, yoro yee yi wolo màʔa lè.

¹⁸ Mii lìíli pe da ni sámagi lè canʔa o canʔa, ki maa pye náapɛɛlɛ nibin, ní bànyɛ́nɛ-wòlobēle kɔrɔni, ní féjɛɛnyɛ. Canya kɛɛ o canya kɛɛ, dùvɛɛn saʔa maa ni sámagi, wee myɛ wi a yɛlɛ lè. Koro ní ki myɛ ní, gee gi yɛlɛ ní guvɛrinɛɛri ní lè mii ga koro kàa jáari be na í. Níì cán fáliw túgoro maa líbe syɛ́ɛnbèle naa na.

¹⁹ Ee mii Kolocɔlɔw, gee myɛ mii kpéʔele syɛ́ɛnbèle naa ma lè, sɔ̀ngi mi taa, mí kacànna kpéʔele mii na gi kéeli na.