Nehemii 4 - Cebaara Bible 2010

¹ Kàjáa lǎli ni Sanbala, ní Tobiya, ní Arabubèle, ní Amɔn ye, ní Asidɔdi ye gi lóʔo lè Zyerusalɛmi tǒw fáli i syée yɛʔɛ̀ ma, ncan pe n séli ni wi tɛɛ̀walagiyi tɔ́ngi, a be fúnyi tanʔa gbanʔama.

² A be myɛ pínɛ n bɛ̀ɛ nibin na bi ba too Zyerusalɛmi na bi wi nyáʔami.

³ A wolo si wolo Kolocɔlɔw nyɛ́ɛri, níì kɔ̀rɔsiifɔɔlɔ télege be kánmi na, canʔa ní yébilige, paa be kpáaw wéle wolo na.

⁴ Lǎli bee ni a Zyuda ye i gi nyuu níì jo: «Tugolaabèle fànʔa i kwóo, á kànyaʔari si nɛʔɛ, wolo a gbǎn ra tǒw faanri í.»

⁵ Wolo nigoobèle maa ni gi nyuu níì jo: «Pe a yarigaa cán í, pe si a wɔ́ɔ yafyɛn nyaa í, bi taa wolo í sa foo jée be níngi ni. Lǎli bee ni wolo a be kpóo, si fáliw sàa kánmi bee na.»

Nehemii n kapɛɛnkpumɔn-yárira kaan bele má be báara lè

⁶ Zyefubèle bele si be pye yaà wodɛ́ɛnbéle ní be taana lè, a poro pan n baa wolo sàmi tɔlɔyɔ kɛɛ, níì jo: «Pe i yìrigí be tɛɛkòroyi myɛ ma ni maa.»

⁷ Koro na mii syɛ́ɛnbèle télege tɛɛmariyi ni, tǒw kàdoʔo ma, ní tɛɛwaayi na. Mii maa be télege nariduluyo nariduluyo, pe ŋɔséebèle, ní be tàbaabèle, ní be sedeyi si i nyɛ be ma.

⁸ A mii ga gee bee wéle, a mii yìri n gi joo mɛ́ɛyi fɔ̀ɔlɔ, ní kútiijoobèle, ní syɛɛnsanbèle ma níì jo: «Yele a kɔ́ ra fɛ̀ɛgí be na í, ye sɔ̀ngi ye taa Kàfɔw kéele na, woro wee wi kpɔ́ʔɔ lè ní i nyɛ fyáara yáriga, yáā kapɛɛnni kpúmɔn yele senyɛnbèle, ní yele nànbiigèle, ní yele calipiigèle ní yele cébèle ní yele kpáayi kéele na.»

⁹ Lǎli ni wolo nigoobèle gi lóʔo lè ncan pe n wolo sàmi, á Kolocɔlɔɔ be katimanani kálagi, a wolo myɛ lúru tǒw fáli ma, a wo myɛ nibin nibin fala wo fali tɛ́ɛyɛ ma.

¹⁰ Nlaa cángi bee na, mii falipyebèle tíla maa pye fáliw na, á tílagee si i nyɛ ní tàbaabèle, ní tunmɔzige-yáriyi, ní sedeyi ní, n fàra túnmɔri búroyo na. Kùndigibèle maa pye Zyuda syɛ́ɛnbèle myɛ na.

¹¹ Bele pe da ni tǒw faanri lè, ní bele pe da ni túgori lée lè, ní be tugofɔbèle maa ni báara ní kɔyɔ nibin nibin ní, kapɛɛnkpumɔn-yáriri si i nyɛ kɔ́yee ni.

¹² Bele pe da ni tǒw faanri lè, poro maa be ŋɔséebèle pwɔɔ n cáan be cèsiinyunyi na. A pe i báara kánmi bee na, búruw wìifɔlɔ si i nyɛ mii taana.

¹³ A mii mɛ́ɛkpoloyi fɔ̀ɔlɔ, ní kútiijoobèle, ní syɛɛnsanbèle pye: «Fáliw n kpɔ́ʔɔ, a wi tɛ́ɛyi caʔana yiyɛɛ na, á wolo cariga tǒw kurugo n léeli woyɛɛ na.

¹⁴ Yele ga tòmaagi wìimɛ lóʔo tɛ́ɛgee ni lè, ye kpóʔoro yaà beè wolo ma. Wolo Kolocɔlɔw a ra kapɛɛnni kpúmɔn bàā kaangi wolo ma.»

¹⁵ A wolo i fáliw kpéʔele kánmi bee na ni sélegi nyǐnjerigi na fwɔɔ n ba ni nangi ŋɔripiigèle làriyirile na, wolo tílagee n si pye ní tàbaabèle ní kɔ́yi ni.

¹⁶ Lǎli bee wonijanna ni a mii wɔ́ɔ̀ gi joo syɛ́ɛnbèle ma níì jo: «Syɔɔn o syɔɔn n yɛlɛ waa syɔ̀ɔ́n Zyerusalɛmi ni ní wi falipye-nìgɔcariɔ ní, jàngó wo pye kɔ̀rɔsiifɔɔlɔ yébiligi ni, wáā fáliw kpéʔele cángi làla ni.»

¹⁷ Wolo si da ni wolo búroyi wóo í, mii ní mii senyɛnbèle, ní mii falipye-nìgɔcaribèle, ní kɔ̀rɔsiifɔbèle bele pe da taʔa mii na lè. Syɔɔn o syɔɔn maa pye ní wi kapɛɛnkpumɔn-yáriga ní, àlí lǒgi ma.