Nehemii 2 - Cebaara Bible 2010

Kologo n kaan Nehemii í lúru kári Zyerusalɛmi ma

¹ Nisan yégi ni, fànʔafɔw Aritakisɛrikisɛsi fǎngi yɛ̀ʔɛlɛ toko wólo na, àmɛɛ dùvɛɛnw pye fànʔafɔw yɛ́ʔɛ ma lè, a mii dùvɛɛnw láa n kaan wi ma. Mii yɛ́ɛgi si da tàli n kɔ́ɔ̀ tanʔa wi yɛʔɛ̀ ma nyáana í.

² A fànʔafɔw mii pye: «Nyàʔá gi mɔ yɛ́ɛgi kaan a gi tanʔa nya? Bi gi taa mɔ o yáa wii í. Yafyɛn ban ki a pye í kapye fungo wɔʔɔgɔ kéele ban í.» A mii fyáa gbanʔama.

³ A mii fànʔafɔw yari: «Ki n yɛlɛ fànʔafɔw í kòro beè sìi na! Kěgee ni mii tóolɛɛbèle kɔ̀ɔngēle nyɛ lè, àmɛɛ gi kálagi lè, á náagi gi kɔ̀riyi sórigo mɛ̀ɛ́ mii yɛ́ɛgi a pye ki si a tanʔa í?»

⁴ A fànʔafɔw mii pye: «Ki si i lè nya nyàʔá mɔ caa?» A mii nyɛ̀ʔɛni Kolocɔlɔɔ nyɛ́ɛri,

⁵ ní náà fànʔafɔw yari: «Ki ga yɛlɛ fànʔafɔw ma, kapye mɔ falipyew kéele n kpɔ́ʔɔ mɔ ma, mii tórigo Zyuda ma, mii tóolɛɛbèle kɔ̀ɔngēle kaʔa ma, jàngó mii í ní sa gi faan.»

⁶ A fànʔafɔw gi joo mii ma, fànʔafɔjew si i nyɛ wi taana wodɛ́ɛɔn ní, níì jo: «Làla jòorí mɔ a sa kwɔ́ɔ yaà mɔ tánʔani na? Làlìí ni mɔ a lúru pan?» A fànʔafɔw fɔ̀lɔ gi na n mii yaʔa mii í kári, á mii lǎli nyɔ́ɔ tɛ̀ɛn wi na.

⁷ A mii níì fànʔafɔw pye: «Ki ga yɛlɛ fànʔafɔw ma, sɛ́bɛbéle n yɛlɛ be kaan mii ma, mii í sa be kaan cábigi jelige tátɛɛyɛ guvɛrinɛɛribéle ma, koro ga pye pe mii yaʔa mii í sɔ̀lɔ bi kári fwɔɔ bi sa nan Zyuda na.

⁸ Sɛ́bɛwaa si kaan Azafi wóo, wi lè fànʔafɔw kɔ́ligɔ kɔrɔsiifɔlɔ, koro ga pye wi tiire kaan mii ma kpɔ̀ʔɔrɔli kpaʔa taana kpaataʔa-tɔ́nɔgɔ kɔriyɔ kéele na, ní kěgi tò, ní kpáagi kéele na beè mii a sa pye lè.» A fànʔafɔw fɔ̀lɔ gi na mii ma, níì cán mii Kolocɔlɔw kɔjànga maa pye mii na.

⁹ A mii kári cábigi jelige tátɛɛyɛ guvɛrinɛɛribéle ma ní sáà fànʔafɔw sɛ́bɛbéle kaan be ma. Fànʔafɔw si maa sùlasiibèle kùndigibèle pèle, ní syɔɔnyɔ fɔ̀ɔlɔ tórigo ní mii ní.

¹⁰ Sanbala wi lè Horɔn ye wów, ní Amɔn ye Tobiya, wi lè syɛɛnkpɔɔwaa, a poro ga kéeli bee lóʔo, a gi tɔ̀nɔ n be bɛɛn gbanʔama, àmɛɛ nànwaa pan lè n ba ni Isirayɛli yòdaʔayi wòolo nyɔɔmɔ caa.

Nehemii n tǒw kánma saanri n wéle

¹¹ A mii sáà nan Zyerusalɛmi na níì canya taanri kwɔ́ɔ yaà.

¹² Koro kàdoʔo ma a mii yìri yébiligi ni n nǎnbèle pèle pínɛ ní niyɛɛ ní. Gee si mii Kolocɔlɔw lége mii fúngi ni bi kpéʔele Zyerusalɛmi kéeli na lè, mii ga gi joo n tɛ̀ɛn syɔɔn faala na í. Yaweeyee na be lúru lè ki kàa da níì pye ní mii ní í, kapye mii nibin wógi ban í.

¹³ A mii foro Jǐnlɔgi kpàánweele ni, yébiligi ni, Diragɔnw Pùnweele zinmɛ na, ní Kábogi kpàánweele kabaan na n Zyerusalɛmi tǒw saanri n wéle, a mii wi nyaa a wi wálagi n too, a náagi wi kpàánweegèle kɔ̀riyɔ sórigo.

¹⁴ A mii sɔ̀lɔ Pùnweeli kpàánweele kabaan na ní fànʔafɔw lɔ̀ʔɔ wéʔe kabaan na, yaweegi na mii lúgu lè ki tɛɛsɔ̀lɔgɔ ga taa í.

¹⁵ A mii sɔ̀lɔ yébiligi ni gòrógoroweegi ma n tǒw saanri n wéle, níì lúru n baa foro Jǐnlɔgi kpàánweele ni. Kánmi bee na mii lúru n pan.

¹⁶ Beè mii da kári lè, ní gee mii sáà kpéʔele lè kútiijoobèle da gi cán í. Nlaa n baa nan lǎli bee na, mii da kɔ́ɔ̀ yafyɛn joo n tɛ̀ɛn Zyefubèle na í, wàlá sáriga-wòlobèle, ní mɛ́ɛyi fɔ̀ɔlɔ, ní kútiijoobèle, n fàra wozanbèle bele na pe da ni faliwaa faala kpéʔele lè í.

¹⁷ Lǎli bee ni a mii be pye: «Yele n gi nyaa wɔʔɔgee ni wo nyɛ lè! Zyerusalɛmi n kálagi, a náagi gi kpàánweegèle kɔ̀riyɔ sórigo. Yaa maa wo ní wo ba Zyerusalɛmi tǒw faan, jàngó wolo a kɔ́ kòro faʔari ni í.»

¹⁸ Kánmee na mii Kolocɔlɔw kɔjànga da pye mii na lè, ní syɛ́ɛnree fànʔafɔw joo mii ma lè, a mii gee bee joo n tɛ̀ɛn be na. A be jo: «Ye yìri waa faanri!» A be fànʔa le peyɛɛ ni falicanw bee pyele na.

¹⁹ Sanbala wi lè Horɔn ye wów, ní Amɔn ye Tobiya, wi lè syɛɛnkpɔɔwaa, ní Gesyɛmi wi lè Arabuw, a poro ga kéeli bee lóʔo, a be i peyɛɛ nyɛ́nɛ wolo na ní i wolo faari. Pe n jo: «Nyàʔá ye kpéʔele gee? A yele a fànʔafɔw cée lé wii?»

²⁰ A mii syɛɛnlurugori naa kaan be ma, níì jo: «Nyɛ̀ʔɛni Kolocɔlɔɔ wi a wolo yaʔa wo fànʔa taa. Wolo wo nyɛ lè wi falipyebèle, wolo a yìri bàā faanri. Yele si na, lɛɛlɛ, ní tànʔa, ní sɔ̀ngudaara kéele o nyɛ yele ma Zyerusalɛmi ni í.»