Nehemii 13 - Cebaara Bible 2010

Kérigèle Nehemii ní baa kàriga lè

¹ Lǎli bee ni a be syɛɛnraa wéle Mowizi sɛ́bɛw ni n joo, a syɛ́ɛnbèle lóʔo, a be gi nyaa a gi sɛ́bɛ yaà n jo Amɔn ye wóo, ní Mowabi ye wóo ga yɛlɛ bi jée Kolocɔlɔɔ syɛɛnkpoʔolomi ni nyáana í.

² Níì cán pe da pan n baa Isirayɛli ye fàra ní yaliire, ní lɔ̀ʔɔ ní í, ní àmɛɛ pe da Balaami láa lè sàra na níì jo wi ba be dánga. Kàjáa a wolo Kolocɔlɔw dángaw kàriga dùba.

³ Lǎli ni be làlwaw syɛ́ɛnrɛ lóʔo lè, a be nibɔnbèle myɛ cɔɔnri n yirige Isirayɛli ye ni.

⁴ Sáni gee bee i pye lè, sáriga-wòlow wi lè Eliyasyibi, woro wee má wolo Kolocɔlɔw kpaʔa kpaafunyo da kàlifáa lè, wi maa pye Tobiya syɔ́ɔn.

⁵ Wi maa kpaafungbɔɔgaa sámaga wi ma, gee ni yakaanyi, ní nùndaanni yáriga, ní yayigeleri, ní bilew yáʔa, ní dùvɛɛnfɔnw, ní sǐnmi yáʔa da ni téeri lè, dee di pye lè Levii ye, ní ŋùuvɔbèle, ní kpàánweegèle kɔ̀rɔsiifɔɔlɔ lɛɛgéle, ní sáriga-yirigew wi pye lè sáriga-wòlobèle kéele na.

⁶ Koro myɛ n pye n gi yaʔa mii da pye naa Zyerusalɛmi ni í. Níì cán Babilɔni fànʔafɔw Aritakisɛrikisɛsi fǎngi yɛ̀ʔɛlɛ toko ní kpɔrigɔ ní siin wóli na, mii maa lúru n kári fànʔafɔw ma. A làlaa ga kwɔ́ɔ, á fànʔafɔw fɔ̀lɔ gi na mii í lúru pan,

⁷ a mii lúru n pan Zyerusalɛmi ma, á pe baa kapeegi kéele joo mii ma, gee Eliyasyibi kpéʔele lè Tobiya kéeli na, àmɛɛ wi kpaafungo sámaga wi ma lè Kolocɔlɔɔ kpáagi kadàala ni.

⁸ A gi tɔ̀nɔ n mii bɛɛn gbanʔama. Yáriri myɛ di pye lè Tobiya wóri, a mii di yirige kpaafungi ni n wáa naa kàfugi na.

⁹ A mii be pye a be kpaafunyi jéemununɔ kpéʔele, á mii níì Kolocɔlɔɔ kpáagi yayigelere, ní yakaanyi, ní nùndaanni yáriga tɛ́ʔɛ yaà.

¹⁰ A mii wɔ́ɔ̀ gi lóʔo Levii ye lɛɛgèle da ni kaangi í, a Levii ye ní ŋùuvɔbèle myɛ nibin nibin fàn n kári be seye ma, poro bele má fáliw da kàlifáa lè.

¹¹ A mii fúlo kútiijoobèle na níì jo: «Mɛ̀ɛ́ Kolocɔlɔɔ kpáagi pye ní kɔ́ɔ̀ kòro wowaʔa ní?» A mii Levii ye, ní ŋùuvɔbèle kpóʔoro, ní baa be lúrugo n télege be fali tɛ́ɛyi ni.

¹² Lǎli bee ni a Zyuda ye myɛ i maa yatɛʔɛ-kpáayi ma ní bilew, ní dùvɛɛnfɔnw, ní sǐnmi yáʔa ní.

¹³ A mii yatɛʔɛ-kpáayi kpaàwelere fáli kàlifáa Syelemya ma, wi lè sáriga-wòlow, ní Sadɔki ma, wi lè sɛ́bɛkanw, ní Pedaya ma wi lè Levii wówaa, níì Hanan fàra be na wi lè Zakuuri jáaw, Zakuuri wi lè Matanya jáaw, níì cán pe mɛ́ɛyi maa yiri n jo pe i nyɛ tágala syɛɛnnɛ. A be fáliw wɔ́ɔ̀ pye paa yáriri lee be senyɛnbèle na.

¹⁴ Ee mii Kolocɔlɔw, sɔ̀ngi mi taa mii na kéeli bee na. Sínni kèlē mii kpéʔele lè mii Kolocɔlɔw kpaʔa, ní gi fáliw kéele na, mɔ a kɔ ge kurugo láʔa yaà í.

¹⁵ Lǎli bee ni a mii nǎnbèle pèle nyaa Zyuda ni a be i ɛrɛzɛn fórogi ɛrɛzɛn lógi tɛɛnùgugo ni, cândɛnɛgi canʔa ni. Pèle maa wɔ́ɔ ni bilepwɔɔgèle tugu jòfanibèle na ni légi Zyerusalɛmi ni, n fàra dùvɛɛnw, ní ɛrɛzɛnw, ní děsyaangi, ní túgori féleye myɛ na, cândɛnɛgi canʔa ni. Cángee na pe da ni be yaliiri pára lè, a mii be sàmi.

¹⁶ Tiiri wóbèle pèle maa wɔ́ɔ̀ pye naa wodɛ́ɛnbéle ní, a poro ba ni fábèle, ní jàgi yáriri féleye myɛ pára cândɛnɛgi canʔa ni, Zyuda ye, ní Zyerusalɛmi ye ma.

¹⁷ A mii fúlo Zyuda wogbolobèle na níì be pye: «Nyàʔá gi nyɛ kapeegi naa nyúngo, gee yele kpéʔele lè ni cândɛnɛgi kálagi kánmi naa na?

¹⁸ Kánmi bee na ban yele tóolɛɛbèle da gi kpéʔele ì, á koro gi kaan a wolo Kolocɔlɔw wɔʔɔyi naa myɛ cáan wolo ní kěgi naa na ì ? A yele si ní i cândɛnɛgi kálagi bi ní kàa fàra wi fundanʔari na Isirayɛli ye kurugo.»

¹⁹ N fàra koro na, a mii be pye lǎli ni wɔɔmɔ ga tɛ́nɛ̀ jée lè Zyerusalɛmi kpàánweegèle ni, sáni cândɛnɛgi í séli lè, ki n yɛlɛ be kɔ̀riyi tɔ́n, pe si a kɔ́ yi múgu í bi taa cândɛnɛgi í sɔ̀lɔ. A mii mii falipye-nìgɔcaribèle pèle télege kpàánweegèle taana jàngó paa syɛ́ɛnbèle yéregi, wàa a kɔ́ sɔ̀lɔ bi jée ní tugoro ní cândɛnɛgi canʔa ni í.

²⁰ Lǎli bee ni a jàgiwáabèle ní yapárari féleye myɛ párafɔɔlɔ syɔ́ɔn Zyerusalɛmi kàjegi ni, yébilige nibin, àlí yébiliye siin.

²¹ A mii be sàmi níì be pye: «Nyàʔá na yele syɔ̀ɔ́n tǒw taana? Yele ga níì koro kàa pye, mii a kɔlɔ̀ taʔa yele na.» Nlaa lǎli bee ni pe ga níì pan cândɛnɛgi canʔa ni í.

²² A mii Levii ye pye pe peyɛɛ jéemununi fáli kpéʔele, pé pan pe ba ra kpàánweegèle kɔ̀rɔsíi, koro ga pye be cândɛnɛgi sámaga nyɔɔ. Ee mii Kolocɔlɔw, sɔ̀ngi mi taa mii na kéeli bee na wɔ́ɔgēle, mí nyinimɛ taa mii na mi yɛlɛ ní mɔ nyininɛʔɛmi ní.

²³ Lǎli bee wonijanna ni, a mii Zyefubèle pèle nyaa, bele pe da Asidɔdi ye, ní Amɔn ye, ní Mowabi ye càbala pɔri lè.

²⁴ A be pìíbèle tílawaa i Asidɔdi ye syɛ́ɛnri nyuu, pe ga gbàn ni Zyefuuri nyuu í, fwɔɔ a be i syɛɛnfelegee wàlá gee wóro nyuu.

²⁵ A mii i fúlo be na ní i be dángi. A mii i be pèle kpúmɔn, ní i be ǹjoori kíle ni kɔ́nɔgi, ní i be kɔ́ri pe i kɛ̀ɛ́ Kolocɔlɔɔ mɛ́ɛgi na, níì be pye: «Yele a kɔ́ ra yele pìíbèle pɔri bàā kaangi pe jáabèle ma í, yele a wɔ́ɔ kɔ́ ra be pìíbèle pɔri bàā kaangi yele jáabèle ma í, wàlá bàā be pɔri yele càbala í.

²⁶ Kéeli bee félege ban li da Isirayɛli ye fànʔafɔw Salomɔn lége kapeeli ni ì? Syɛɛnfele-nɛʔɛyi ni, wi fànʔafɔ-vélege da pye yi ni í. Wi kéeli maa wi Kolocɔlɔw dɛ́nɛ. Kolocɔlɔɔ maa wi télege a wi pye Isirayɛli ye myɛ fànʔafɔw. Táraa nikwɔɔ càbala si n baa wi kɔ́ri n lége kapeeli ni.

²⁷ A gi si yɛlɛ lé bi lóʔo pe jo yele n wɔ́ɔ̀ kapeekpɔɔgi naa félege kpéʔele, n táraa nikwɔɔ càbala pɔri n kapeele pye wolo Kolocɔlɔw na?»

²⁸ Yoyada wi lè sáriga-wòlobèle kàfɔlɔ Eliyasyibi jáaw, woro pìiwaa maa pye Horɔn ye Sanbala pyà nàɔn. Koro na mii wi nɛnɛ n núngo niyɛɛ daana.

²⁹ Ee mii Kolocɔlɔw, sɔ̀ngi mi taa be na, níì cán pe n sáriga-wòlobèle, ní Levii ye sáriga-wòlori fáli, ní joogaanni nɔ́nʔɔ.

³⁰ A mii be jée n mùnu n nibɔnbèle kánma myɛ láʔa be na, níì sáriga-wòlobèle ní Levii ye télege be fáliw na, wee pe myɛ nibin nibin yɛlɛ paa kpéʔele lè.

³¹ A mii kàjeri yakanʔa kéele cɔɔnri n yɛlɛ ní làrigèle ní ge kɔ̀rirɔ n tímana di kaanni kéele na lè, n wɔ́ɔ̀ fàra yaliiseliri kéele na. Ee mii Kolocɔlɔw, sɔ̀ngi mi taa mii na, mí kacànna kpéʔele mii na.