Nehemii 1 - Cebaara Bible 2010

¹ Nehemii wi lè Hakaliya jáaw, woro syɛ́ɛnri. Yɛ̀ʔɛlɛ toko wóli na, Kisilevi yégi ni, mii maa pye fàngegi ni ki lè Suzi,

Pe n baa Zyerusalɛmi kéeli joo Nehemii ma

² Hananii wi lè mii senyɛnwaa, a woro ní nǎnbèle pèle yìri yaà Zyuda ma n baa nan. A mii be yíbe Zyefubèle kéele na pe da taa n syɔɔ lè, poro bele pe da kòro púlori wòolo ni lè, ní Zyerusalɛmi kéeli na.

³ A be mii yari: «Bele be kòro púlori wòolo ni lè, pe i yaà tári ni, fɔ̀rɔgi, ní faʔari si tɔ̀nɔ́ i nyɛ be na, a Zyerusalɛmi tǒw wɔ́ɔ̀ wálagi n too, a náagi kpàánweegèle kɔ̀riyɔ sórigo.»

Nehemii nyɛ́ɛrigi Zyefubèle kéele na

⁴ Lǎli ni mii syɛ́ɛnri bee lóʔo lè, a mii tɛ́ɛn n nyɛni, a gi pye mii ma kùu káyaʔa n canya saʔa kwɔ́ɔ. A mii súnw le ní i nyɛ́ɛri nyɛ̀ʔɛni Kolocɔlɔɔ yɛ́ʔɛ ma.

⁵ A mii jo: «Ee Yawe mɔ wi lè nyɛ̀ʔɛni Kolocɔlɔɔ, Kolocɔlɔɔ, mɔ wee wi kpɔ́ʔɔ lè ní i nyɛ fyáara yáriga, mɔ wee wi joogaanni ní funjǎngi kɔngi lè bele kàbaan na mɔ kéeli dɛ́nɛ lè, á be mɔ kajoodɛɛngèle kɔn,

⁶ ki n yɛlɛ mi mɔ líiyi cáan, mí mɔ nyapiigèle múgu mi mɔ falipyew nyɛ́ɛrigɛ lóʔo. Mii i nyɛ nyɛ́ɛrigɛ na mɔ yɛ́ʔɛ ma lǎli naa ni, canʔa ní yébilige, mɔ falipyebèle Isirayɛli ye kéeli na. Mii n yére Isirayɛli ye kapeegèle ni, kapeegèle wolo pye mɔ na lè. Mii ní mii kpáagi wòolo n kapeele pye.

⁷ Wolo n tɔ̀nɔ n kapeʔe pye mɔ na. Kajoodɛɛngèle, ní làlwaw kèlē, ní làlwaw kajoogéle mɔ kaan mɔ falipyew Mowizi ma lè, wolo ga di cò í.

⁸ Sɔ̀ngi syɛ́ɛnri naa kéele na mɔ da joo mɔ falipyew Mowizi ma lè níì jo: Yele ga baa kolo, mii a yele cariga bi tórigo syɛɛnfeleyi nínge ni.

⁹ Kàjáa yele ga lúru n pan mii ma níì mii kajoodɛɛngèle kɔn ní i ge kpéʔele, lǎli bee ni àlí yele ga nɛnɛ n tórigo yaà nyɛ̀ʔɛni láʔala ma, mii a yele kpóʔoro yaà beè bi lúrugo pan tɛ́ɛgi ma, gee mii nyɛ́nɛ n wòlo lè, bi mii mɛ́ɛgi yaʔa gi pye yaà beè.

¹⁰ Pe i nyɛ mɔ falipyebèlē, ní mɔ syɛɛnfelege, gee mɔ syɔɔ n yaʔa lè ní mɔ fangbɔɔgi, ní mɔ séekpɔɔw kɔ́lɔ báriga ní.

¹¹ Ee! Kàfɔw, koro na ki n yɛlɛ mi mɔ líiyi cáan mí mɔ falipyew nyɛ́ɛrigɛ lóʔo, ní mɔ falipyebèle bele be caa bàā fɛ̀ɛgí mɔ mɛ́ɛgi na lè, poro nyɛ́ɛrigi. Mii i mɔ nyɛ́ɛri, mɔ falipyew yaʔa wi kataanna taa níjanʔa, mí gi yaʔa nǎnw naa í nyɔɔ wi na.» Mii si maa pye lǎli bee ni fànʔafɔw yagbaʔa kaanfɔlɔ.