Nahumi 3 - Cebaara Bible 2010

Syɛɛnkpoo-kěgi n kaan kpúmɔngbooli ma

¹ Wɔʔɔlɔ i nyɛ sìsyaanw kàʔa na ki nyìn lè jànvaaw na, n wɔ́ɔ̀ nyìn péemi na. Yanɛnɛ-mí-syɔɔri fóomɔ o yaà í.

² Sapili folomɔ, ní sàkoyi tìngbɔɔmɔ i lúro, syɔ́ɔnyi i fé, kapɛɛnkpumɔn-wòtorobèle i yegi.

³ Syɔ́ɔnyi fɔ̀ɔlɔ i yegi ni jǐn, ŋɔséebèle i nyɛ́ʔɛnɛ, tàbaabèle i daragi. Wogbalibèle n nɛʔɛ! Wogboobèle i nyɛ gbɔ̀ngbɔngɔ! Kúbèle i nyɛ tɛɛ̀laʔala fun! Pe i kpírigi kúbèle na!

Fɛ̀ɛrɛ n Niniivi tɔ́n

⁴ Nànjaacew nànjaabeʔe kéele lii, woro wee wi nyɔɔ n foro lè, ní i nyɛ dɛ̀ɛ́mi kàfɔwaa, woro wee wi da ni syɛɛnfeleyi pára wi nànjaari báriga ni lè, ni narigbaayi pára wi dɛ̀ɛ́mi báriga ni lè.

⁵ Wéle, mii a keele tɛ́ʔɛ mɔ na, Yawe wi lè Nyɛ̀ʔɛni Sùlasiibéle Kafɔlɔ, woro wi jo nya, mii a mɔ búrogi táàma láʔa bi tɔ́n mɔ yɛ́ɛcɔɔli na, mii a mɔ níboriw tɛ̀ɛn syɛɛnfeleyi na, bi mɔ fɛɛri tɛ̀ɛn fǎnyi na.

⁶ Mii a kànyaʔara wáa mɔ na, mii a mɔ céri fánaga, bi mɔ kpéʔele yawelege.

⁷ Kánmi bee na wee wi ga mɔ nyaa lè, wi a fàn bi léeli mɔ na si gi jo si jo: «Niniivi n pye kataʔa, wìí wi a wi kéeli yáa? Sán mii a kpɛʔɛlɛfɔɔlɔ caa taa mɔ na?»

No-Amɔn wógi félege a Niniivi taa

⁸ A mɔ sɔ̀lɔ lé No-Amɔn na, wi da pye lè wodɛ́ɛɔn ní cábiyi nínge ni, á lǒyi wi màʔa? Wi tògbɔɔgi n pye solomɔ lɔ́ʔɔ, solomɔ lɔ́ʔɔ n pye wi tǒw.

⁹ Tɛɛ̀laʔala fun sée n pye Etyopii ma, n wɔ́ɔ̀ fàra Ezyipiti na. Puti ní Libii ye be pye mɔ dɛɛmɛfɔbèle.

¹⁰ A woro si wɔ́ɔ baa cò n kári, wi n cò n kári puloo. Wi yireŋɔribèle myɛ n wɔ́ɔ̀ tɔ́nʔɔnɔ kěgi kobariya myɛ ni. Pe n gɔ̌nw wáa ki mɛ́ɛkpoloyi fɔ̀ɔlɔ kéele na, pe n nyɔ̀ʔɔmɔ le wi syɛɛnkpolobèle myɛ na.

¹¹ Mɔ wɔ́ɔgēle, mɔ yɛ́ɛgi a wɔ́ɔ, mɔ a làra. Mɔ wɔ́ɔgēle, mɔ a ra tɛɛlaraga caa bi làra nigoow na.

Niniivi a gbǎn fànʔa taa bi yére í

¹² Mɔ tɛɛniriyi myɛ i nyɛ děsyaantiire yasanzelilɛɛrɛ. Pe ga di nyàʔara, ti n ni tuun wee nyɔ́ɔ ni wi caa bi di lìi lè.

¹³ Mɔ syɛ́ɛnbèle wéle bele: Pe i nyɛ càbala mɔ níngi ni. Mɔ tári kpàánweegéle i múru ni yaari fáa mɔ nigoobèle ma. Náagi n mɔ gbóʔoroyi sórigo mɛnɛ mɛnɛ.

¹⁴ Lɔ̀ʔɔ kóo mi syɔ́ɔgɔ àmɛɛ pe a ba tɛ́ɛn mɔ taana kapɛɛnni kánma na lè! Mɔ tɛɛniriyi báara! Jée fárigi ni, póori tánʔana! Jùfaaw tɛɛkpariga sámaga cama!

¹⁵ Beè náagi a mɔ líile bi kwɔ́ɔ, ŋɔséew a mɔ kwɔ́ɔ bi yirige yaà, bi mɔ líile àmɛɛ kákerebéle nyɛ lè. Kpoʔolo àmɛɛ kákerebèle nyɛ lè! Kpoʔolo àmɛɛ kúdow nyɛ lè!

Kěgi syɛ̀ɛnnɛ myɛ i kwóo gi ni

¹⁶ Mɔ n mɔ jagiwáabèle nɛʔɛ n sɔ̀lɔ nyɛ̀ʔɛni ŋɔripiigéle na, àmɛɛ kákere wi fókaanyi múru ní i yìrigí lè.

¹⁷ Mɔ kpaàwelebèle i nyɛ àmɛɛ kúdow nyɛ lè, mɔ syɛɛnkpolobèle i nyɛ àmɛɛ yaweepiire dìndinge nyɛ lè, dee di tɛ̀ɛ́n jásaabèle na wéeri làla ni lè, cángi ga yiri ti n yìri n kári, syɔɔn si a ní gi cán tɛ́ɛgee ni ti da pye lè í.

Gàlagíw wi lè wi a ní gbǎn sámaga í

¹⁸ Mɔ banaʔabèle i ŋúnɔ, Asirii fànʔafɔw, mɔ sanbalipɔbèle ní o nyɛ́ʔɛ í, mɔ syɛ́ɛnbèle n cariga n màʔa nyanbeleyi na, syɔɔn faala o be kpóʔoro í.

¹⁹ Kanmaa o yaà bi mɔ kpaligi pɔʔɔ í, mɔ námigi i nyɛ kùu wóʔo. Bele myɛ pe ga mɔ kéeli lóʔo lè, pe a ra kadaagèle kóri mɔ kéeli na. Wìí wi yaà, wee wi lè mɔ péemi da ni nangi wi na sìnyére ni í?