Nahumi 2 - Cebaara Bible 2010

¹ Syɛɛnjóocǎnri joofɔlɔ tɔ́lɔyɔ wéle yee nyanbeleyi na, yɛɛ̀nyingi kéele wi nyuu ni tèé! Da mɔ fɛ́tiibèle kpéʔele, Zyuda, da mɔ nyɔɔfaliyi forogi! Níì cán Sutanafɔw a ní foro mɔ níngi ni í, wi n kálagi n yirige yaà péw.

² Kálagifɔlɔ i maa mɔ kánmi na. Da kènirigi kpáa wéle! Da kólogi kɔ̀rɔsíi! Fànʔa le mɔ sárigèle ni, lòmaana le ní mɔ fangi myɛ ní!

³ Ncan Yawe a ní Zyakɔbi kpɔ́ɔmi lúrugo wi ma àmɛɛ Isirayɛli kpɔ́ɔmi nyɛ lè, níì cán yafuguru-mí-láabèle n be yáriri fuguri n láa níì be ɛrɛzɛn tíriri cɛnɛ n kálagi.

Pe n too Niniivi na, níì wi fuguri

⁴ Wi nànniriyi tunmɔzige-yariya n nyɛ́nɛgɛ, sànbalipɔbèle n buronyɛɛnyɛ le. Kapɛɛnkpumɔn-wòtorobèle túnmɔrɔ i daragi kapɛɛnni canʔa kéele na wi tɛ́ʔɛ lè, tàbaabèle si i fíigi.

⁵ Kapɛɛnkpumɔn-wòtorobèle n cúro ni fùurí ni máari kàlari-kóloyi ni, pe i fé ni máari gbanʔama kadàlayi na. Mɔ ga be nyaa, pe i nyɛ àmɛɛ nìmubwɔɔgéle náa nyɛ lè, pe i syée kelekele àmɛɛ nyɛ̀ʔɛni nyɛ́ʔɛnɛmɛ nyɛ lè.

⁶ Wi sɔ̀ngumi i nyɛ wi sànbalibèle na, kàjáa n be yaʔa be tánʔani na, pe i kpírigi. Pe i syée kelekele kěgi tò ma, dɛ̀ɛmɛni n foro n kwɔ́ɔ yaà.

⁷ Cábiyi kpàánweegéle n múgu, á fànʔafɔ-gbaagi si i tuun!

⁸ Ki n kpéʔele, pe n wi waragi n yaʔa níbori, pe n wi cò n kári. Wi falipyecebèle i cɛ́ɛn àmɛɛ kàtogèlē nyɛ lè, ní i be fìcibiyi kpúmɔn.

⁹ Niniivi maa pye àmɛɛ lòyo tɛɛkɔngɔ nyɛ lè, poro si be fé ni syée bele. Ye yére! Ye yére! Kàjáa wàa faala o kologi ni lúrugu í.

¹⁰ Ye wálifiiw fuguri ye láa! Ye tɛ́ɛw fuguri ye láa! Bàngwɔɔ lɔnɛʔɛrɛ i yaà ní lɔgbanri yárira yaleye féleye myɛ ní.

¹¹ Fuguru-mí-láala, kpúmɔn-mí-kálagila, kálagila! Fúnyi fànʔa i kwóo, yégunyi i pegi, sárigèle myɛ i wɔʔɔ, yɛɛcɔɔgèle myɛ kánma i fɛ̀ɛ́.

Niniivi i nyɛ móō càaraɔ wii, wee be jáa lè

¹² Sán càarabèle tɛɛlaraga nyɛ, ki lè càarabɔ-yɛlɛbèle tɛɛkòrogo, gee càarabɔw, ní càarajew, ní càaraw pyà da ni nyaari ni forogi lè, wàa faala si o be tɔ́ɔrɔ í?

¹³ Càarabɔw maa ni kaacòro sulugu wi pìíbèle ma, ni yaweele còrí wi càarajebèle ma, wi maa ni wi wéeyi nyìngí kaacǒri na, ni wi tɛɛlarayi nyìngí káari na.

¹⁴ «Wéle, mii a keele tɛ́ʔɛ mɔ na,» Yawe wi lè Nyɛ̀ʔɛni Sùlasiibéle Kafɔlɔ, woro wi jo nya. «Mii a wi kapɛɛnkpumɔn-wòtorobèle kàriga wírige. Ŋɔséew a mɔ caarabɔ-yɛlɛbèle káa, mii a mɔ yacori kwɔ́ɔ bi yirige tári ni, syɔɔn a ní mɔ tundunbèle yákpogéle lóʔo í.»