Nahumi 1 - Cebaara Bible 2010

¹ Joogbanna Niniivi kánmi na. Nahumi wi lè Ɛlikɔsyi ye wów, woro yanyaagi sɛ́bɛ wii.

Yawe i nyɛ fyáakpɔɔrɔ Kolocɔlɔɔ, níì nyɔɔ

² Yawe i nyɛ yejaʔa Kolocɔlɔɔ, wi i kapeegèle gɔ̀lɔ́ wóo. Yawe i kapeegèle gɔ̀lɔ́ wóo, wi n nyìn fundanʔagbɔɔri na. Yawe i wi kàsiitun-nyɛ́nbèle kapeegéle gɔlɔ́ wóo be na, wi n fundanʔara kɔn n yaʔa wi nigoobèle kánma na.

³ Yawe fúngi o taanri kelekele í, wi fǎngi n tɔ̀nɔ n kpɔ́ʔɔ. Wi tɔ̀nɔ́ o kòró wɔʔɔlɔ sindaʔa ni í. Yawe i wi kólogi wóo káfala-sìnjinni ni, ní káfalakpɔɔgi nínge ni, fàfaanyi i nyɛ wi tɔ́lɔyi cíbige.

⁴ Wi i fúlo sólomi lɔ́ʔɔ na ní i gi waari, wi i cábiyi myɛ lòyo syɔɔnri. Basyan ní Karimɛli fǎngi i kálagi ni syée, Liban tiifyɛɛnri i fánagi.

⁵ Wi i nyanbeleyi cɛ̀lɛ́, á dǎndamayi si i nyangi. Tári i tugu ni yìrigí wi yɛʔɛ̀ ma, n fàra dulunyanw, ní wi fúngi wòolo myɛ na.

⁶ Wìí wi a gbǎn soro yére bi wi fundanʔagbɔɔri sige? Wìí wi a gbǎn yére bi wi fundanʔari naagbanga sige? Wi fundanʔari i caragi àmɛɛ naà nyɛ lè, wi i fálayi jabagi.

⁷ Yawe n nyɔɔ, wi i nyɛ tɛɛlaraga wɔʔɔgi canʔa na. Bele be làrá wi taana lè, wi i be kɔ̀rɔsíi.

⁸ Lǎli ni lǒgi kùnguruyo ga kabi lè wi a yi tɛ́ʔɛ bi tɛ́ɛgi bee kálagi péw, wi si a wi nigoobèle kɔ́ri láa fwɔɔ bi sa lége yébilimi ni.

Tundunri di taʔala tiyɛɛ na Zyuda ní Niniivi kéeli na lè

⁹ Nyàʔá yele déē tímana Yawe kánmi na? Woro wi kálagila kpéʔele ni kwóo mɛnɛ mɛnɛ. Wɔʔɔgi a ní pye tɔziin í.

¹⁰ Alí pe ga pye àmɛɛ wúuro tiipiire nyɛ, dee di fala tiyɛɛ ni lè, níì be yɛ́ɛyi wɔ́ɔ ní be sínmi ní, pe a ba sógi mɛnɛ mɛnɛ àmɛɛ nyàáwaʔa nyɛ lè.

¹¹ Wàa n yiri mɔ ni, wee wi kapeʔe tímana Yawe kánmi na lè, wee fúngo ni gbanzan katimanara da pye lè.

¹² Yawe wi syɛ́ɛnri naa joo níì jo: «Alí pe ga foro, pe nɛʔɛni ní gi myɛ ní, pe a ba kɔni ní kɔnigɔ ní ki kwɔ́ɔ nya. Mii i caa bi mɔ cɛ́rɛ, jàngó mii a ní kɔ́ ba jo mii a mɔ cɛ́rɛ í.

¹³ Mii a wi zúuw kabi tɔ́ɔliw ni bi láʔa mɔ na, mii a mɔ yapwɔɔri cɛnɛ bi láʔa mɔ na.»

¹⁴ Tundunri di nyɛ dee naa, dee Yawe joo n gbàn mɔ kéeli na lè, wi n jo: «Mɔ a ní yòdaʔaya taa, yee na mɔ mɛ́ɛgi a taʔa lè í. Mii a ǹdedanyi, ní tunmɔgbalari yasunyo kálagi yirige mɔ kolocɔlɔbèle kpaʔa ni. Mii a mɔ nyángi sámaga yaʔa, níì cán mɔ ní o nyɛ yakpɔɔlɔ mii ma í.»