Misye 7 - Cebaara Bible 2010

Kanyaajoow káyaʔa nyɛnigɛ

¹ Wɔʔɔlɔ i nyɛ mii na! Níì cán mii i nyɛ àmɛɛ yasanjɔɔɔ nyɛ lè, ní àmɛɛ ɛrɛzɛnkɔrɔ caafɔlɔ nyɛ lè ɛrɛzɛnw cɛnɛgwɔɔlɔ kadoʔo ma, ɛrɛzɛn-jɔnjɔnyɔ ga níì kòro yaà syɔɔn í lìi í, děsyaanvɔ́ngi bee láa gi nyɛ mii na lè, ki ní o yaà í.

² Tágala syɛ́ɛnbèle n kwɔ́ɔ n yiri tári ni, syɛɛnsiɔn ní o beè í, pe myɛ n làra ni sige jàngó bàā sìsyaanw ŋuu, pe myɛ nibin nibin i karinyanya nii be senyɛ̀nnɛ na.

³ Pe kɔ́yi n wári kapeʔe pyele kurugo, fànʔafɔbili i yariraa caa fànʔa na, kútiijoow i fáliw pingi yakaanra kéele na, syɛɛnkpɔɔw wɔ́ɔ i wi fúngi yanidaanmaga caa, kánmi bee na pe myɛ wɔ́ɔ kanijanna na.

⁴ Wee wi nyɛ lè be ni wobɔrɔw, wi i nyɛ àmɛɛ wúuro tírire nyɛ lè, wee wi sín be ni lè, woro n pee n sɔ̀lɔ wúuro tiipiige na. Cángi kéele mɔ kɔrɔsiifɔbèle da joo n tɛ̀ɛn lè koro gii, lǎli n nan keele í tɛ́ʔɛ mɔ na. Pe n curugo tɔ́ɔliw ni.

⁵ Yele a kɔ́ tága kètɛ́ɛnnyɛnnɛ na í, yele a kɔ́ yeyɛɛ daʔa tàannyɛnnɛ na í. Céwee wi sìnɛ́ mɔ taana lè, fàan mɔ nyɔ́ɔgi na wi kàbangi na.

⁶ Níì cán nànbili i li tóow faari, calipili i yìrigí li nɔ́ɔw kánma na, céw i yìrigí wi nǎnw nɔ́ɔ kánma na. Syɔɔn narigbaagi wòolo a ba kàri wi nigoolo.

⁷ Mii si na, Yawe má mii wéle, mii n mii sɔ̀ngumi taʔa Kolocɔlɔɔ na, wi lè mii syɔɔli fɔ́lɔ. Mii Kolocɔlɔw a lóʔo mii ma.

Syɛ́ɛnbèle sɔ̀ngumɔ tɛɛtaʔaga ní be nyɛ́ɛrigi

⁸ Mii nigoow, mɔ a kɔ́ ra fundaanra kpéʔele mii kéeli na í! Alí mii ga too, mii a ní yìri. Mii ga tɛ́ɛn yébilimi ni, Yawe wi nyɛ mii gbɛ̀ɛ́nmi.

⁹ Mii a Yawe fundanʔari kpàraco àmɛɛ mii kapeele pye wi na lè, bi taa wi ba mii kéeli cɔɔnri si tànʔa kaan mii ma. Wi a mii yirige gbɛ̀ɛ́nmi na, mii si wi sínni sámaga wéle.

¹⁰ Mii nigoow a gi nyaa, fɛ̀ɛrɛ si wi tɔ́n, woro wee wi da ni gi nyuu mii ma lè níì jo: «Sán Yawe mɔ Kolocɔlɔw nyɛ?» Mii nyapiigèle a taʔa nigoow na. Tɔ́ɔliw ni pe n wi tánʔana ní tɔ́lɔyi ní àmɛɛ kàlari-kóloyi fáriga nyɛ lè.

¹¹ Cángee na pe ga ní ni mɔ gúnbiiyi faanri lè cángi bee na mɔ láʔagèle a lúrugo kàdoʔo ma.

¹² Cángi bee na pe a ra yìrigí Asirii, ní Ezyipiti kěyi ma bàā maa mɔ ma, bàā yìrigí bi séli Ezyipiti ma fwɔɔ bi sa nan cábigi na, bàā yìrigí sólomi lǒgee ma bi sa nan gee na, ní nyanbelegee ma bi sa nan gee na, bàā maa mɔ ma.

¹³ Tári a kálagi di syɛ́ɛnbèle kéele na, koro a pye be kapyegèle tɔ̀nɔ kéele na.

¹⁴ Da mɔ banaʔa-kpeeli téeri maa mɔ syɛ́ɛnbèle nàʔá, poro bele be nyɛ lè mɔ kɔ́rigi yaweegboolo, loro lee li kòró lè li nibin kɔ́ligi ni, tíiri séʔe nínge ni! Ki n yɛlɛ paa nàʔá Basyan na, ní Galaadi tɛ́nɛmi ni, àmɛɛ booma cányi pye lè.

¹⁵ Mii a kakpoloyo tɛ̀ɛn be na, mɔ a jo àmɛɛ ki da pye lè nlaa mɔ canyiriyi na Ezyipiti tári ni.

¹⁶ Syɛɛnfeleyi a gee bee nyaa, fɛ̀ɛrɛ a yi taa, àlí yi séew ní gi myɛ ní. Yi a kɔ́yi tɔ́n nyɔ́ɔyi na, yi líiweegèle a dùnɔ̄.

¹⁷ Yi a ra támiigi laala àmɛɛ wàbigi nyɛ lè, àmɛɛ yáriri nyɛ, dee di fulolo tári na lè. Yi a ra cɛ̀lɛ́ da yirigi yi kèniriyi ni bàā maa Yawe wolo Kolocɔlɔw ma. Fyáara a yi cò, yi a ra fɛ̀ɛgí mɔ na.

¹⁸ Wìí wi nyɛ Kolocɔlɔɔ àmɛɛ mɔ nyɛ lè, wee wi kolomi kùsulugo syoo lè, ní i wi kɔ́rigi wogorobéle kakoloyo yaari? Wi o wi fundanʔari kɔngi ni yaari ki kòro nya làla o làla í, níì cán funjǎngi kéele n wi dɛ́nɛ.

¹⁹ Wi a ní nyinimɛ taa wolo na, wi a tɔ́lɔyi tɛ́ʔɛ bi wolo kolomi kèlē tánʔana. Mɔ a be kapeegèle myɛ wáa sólomi lɔ̀ʔɔ fúngo ni.

²⁰ Mɔ a gi tɛ̀ɛn Zyakɔbi na àmɛɛ mɔ nyɛ lè tágala syɔ́ɔn, bi gi tɛ̀ɛn Abirahami na àmɛɛ mɔ nyɛ lè funjàngafɔlɔ, àmɛɛ mɔ da gi joo ní kàliga ní wolo tóolɛɛbèle ma lè booma ni yaà.