Misye 6 - Cebaara Bible 2010

Yawe n tìgi wi syɛ́ɛnbèle na

¹ Koro na, ye gi lóʔo, gee Yawe nyuu lè, wi n jo: «Yìri mi pye kútiiw na nyanbeleyi yɛ́ʔɛ ma, dǎndamayi í mɔ joomi lóʔo!»

² Ye Yawe kútiiw kéele lóʔo nyanbeleyi, ní tári kàpɔɔnbēle, yele ye nyɛ beè lè làla o làla! Níì cán kútii i nyɛ Yawe ma ní wi syɛ́ɛnbèle ní, wi i caa bi pye kàkabaga na ní Isirayɛli ye ní.

³ «Mii syɛ́ɛnbèle, nyàʔá mii pye yele na? Nyàʔá ní mii yele fɔ̀rɔ? Ye syɛɛnlurugori kaan mii ma!

⁴ Níì cán mii n yele yirige Ezyipiti tári ni, mii n yele syɔɔ n yirige púlori kpaʔa ni, níì Mowizi, ní Aarɔn, ní Miriyami tórigo be pye yele yɛ́ɛgi na.

⁵ Mii syɛ́ɛnbèle, ye sɔ̀ngi ye taa gee na Mowabi fànʔafɔw Balaki da tímana lè, ní syɛɛnlurugori na, dee Beyɔɔri jáaw Balaami da kaan wi ma lè, n séli yaà Syitimi na fwɔɔ n sáà nan Giiligali na, koro ga pye yele í ní Yawe sínni kapyegèlē kéele cán.»

Gee Yawe caa syɔɔn í da kpéʔele lè

⁶ Nyàʔá ní mii a kári sa yére Yawe yɛ́ʔɛ ma, bi sa kpùmɔnɔ Kolocɔlɔɔ yɛ́ʔɛ ma wi nyɛ lè Pe Myɛ Nyúngo na? Mii í kári lé wi yɛʔɛ̀ ma ní sáriga-sórigoo, ní yɛɛlɛ nibin náapiiye ní?

⁷ A Yawe a fɔ̀lɔ lé bàpɔɔlɔ saala kagunɔ kagunɔbèlē saʔa na, wàlá bi fɔ̀lɔ bàndimana sìnlo-nɛʔɛgɛ na? Mii í mii pìiseliw kaan lé mii kakologi kéele na bi mii láagi pìiseeo kaan lé mii tiimaa kapeeli kéele na?

⁸ Ee Syɔɔn, gee gi nyɔɔ lè, pe n gi tɛ̀ɛn mɔ na. Gee si Yawe caa mɔ ma lè koro gi nyɛ mɔ í da táanri kányɛɛgi na, mɔ í tàmaga le ní funjǎngi ní, mɔ í da táanri ní nɛ̀ɛjɛrɛgɛ ní ní mɔ Kolocɔlɔw ní.

Yawe a námarafɔbèle ní fungbanyi fɔ̀ɔlɔ wɔʔɔ

⁹ Yawe yákpoli i kěgi yiri, bàā fɛ̀ɛgí mɔ mɛ́ɛgi na, koro i nyɛ sícilimɛ. Ye kpúmɔn-mí-kàrigali kéele joolo lóʔo, ní wee wi joo li kpéʔele lè.

¹⁰ Syɛɛnpeebèle í da námara lɔ́ri caa bàā kpoʔolo be kpáayi ni, sáā báara ní jànváa yakiriyi ní, yi lè yanɔnʔɔyɔ, mii í gbǎn gee bee kpàraco lé?

¹¹ Jànváa cúlobéle ga pye mii ma, ní námara cúlonyingéle ní, gɔ̀nvaʔagi ni, a mii a pye lé dìgire fun?

¹² Kěgi bee lɔ́rɔ fɔ̀ɔlɔ n nyìn tanʔari na, ki syɛ́ɛnbèle i jànvaaw nyuu. Námaraw yagana na pe nyíngèle nyɛ pe nyɔ́ɔyi ni.

¹³ Koro na mii a mɔ kpúmɔn ní wɔʔɔgi ní, mii a mɔ kálagi mɔ kapeegèle kéele na.

¹⁴ Mɔ a ra líi, mɔ si a ra tíngi í, koro a ra mɔ táragi láayi ni, mɔ a ra yáriri kɔngi, yafyɛn si a kɔn bi yaʔa í, yáriree mɔ ga kɔn lè, mii a di kaan ŋɔséew ma.

¹⁵ Mɔ a ra lùguri lúru, mɔ si a ra yaliire lée í, mɔ a ra olivyew pulɔlɔ, mɔ si a ra sìnmɛ taagi í, mɔ a ra dùvɛɛnfɔnw wóo, mɔ si a dùvɛɛn taa gbaa í.

¹⁶ Pe i Omirii làlwaw kèlē có ni gi kpéʔele n yɛlɛ ní Akabi kpáagi wòolo kapyegèlē myɛ ní, yele i táanri ni yɛlɛgi ní be láliiw ní. Koro na mii a mɔ kaan kálagili ma, mii a mɔ syɛ́ɛnbèle pye kataanra yárigéle, yele a mii syɛ́ɛnbèle faʔara tugo.