Misye 3 - Cebaara Bible 2010

Kùndigibèle sàmina kéele

¹ Mii n jo: «Ye lóʔo Zyakɔbi kùndigibèle, ní Isirayɛli kpáagi fànʔafɔbiigéle, yele má ban gi nyɛ bi kútiisinw cán ì?

² Kacǎnni n yele bɛɛn, á yele tàmaga le ní kapeegi ní. Yele i be sáliyi wóo, ní i kaapiremi láari kaceleyi na.

³ Pe i mii syɛ́ɛnbèle cére káa, pe i be césaliyi láʔala, ní i be kaceleyi kabagi. Pe i be cɔ̀nʔɔ́ àmɛɛ yarigaa nyɛ, gee be soori nɛ̀ʔɛdaʔaga ni lè, ní àmɛɛ kaara nyɛ kòdɔɔlɔ ni lè.»

⁴ Lǎli bee ni, pe a ra yákpogèle wáa Yawe kurugo, kàjáa wi a lóʔo be ma í. Wi a wi yɛ́ɛgi làriga be na lǎli bee ni. Níì cán pe n kapeeye kpéʔele.

Joogbanna kanyaajoobèle kánma na pe Isirayɛli ye fáana ni pùuní lè

⁵ Yawe wi syɛ́ɛnri naa joo kanyaajoobèle kéele na, poro bele be mii syɛ́ɛnbèle fáana ni pùuní lè, pe gǎngèle ga yarigaa taa bàā sànʔá, pe n ni yɛɛ̀nyingi kéele nyuu, wee ga pye wi ga yarigaa le pe nyɔ́ɔyi ni lè í, pe n ni kapɛɛnni kéele nyuu ni wáa wee bee na.

⁶ Gee bee kéele na yébiligi a wɔ́ɔ yele ma. Yanyaʔa si a ní nyaa í! Yébilimɛ a pye yele ma, yele a ní da kérigèle wéle bàā nyuu í! Cángi a jée kanyaajoobèle bee ma, gbɛ̀ɛ́nmi a pye yébilimɛ be na.

⁷ Nyaafɔbèle a curugo, fɛ̀ɛrɛ a cɛ́lɛfɔbèle taa, pe myɛ a kɔ́yi tɔ́n pe nyɔ́ɔyi na. Níì cán Kolocɔlɔɔ a ra syɛɛnlurugoro kaangi í.

⁸ Kàjáa mii na, mii n nyìn fǎngi na Yawe pǐli báriga ni, tànʔa ní lòmaana i nyɛ mii ma jàngó bi Zyakɔbi kakologi tɛ̀ɛn wi na, bi Isirayɛli kapeeli tɛ̀ɛn wi na.

Misye i Zyerusalɛmi kálagili kéele nyuu ni yaari

⁹ Koro na ki n yɛlɛ ye dee naa lóʔo, yele Zyakɔbi kpáagi kùndigibéle, yele Isirayɛli kpáagi fànʔafɔbiigéle, yele bele ye kútiisinw kàragí lè yanɔnʔɔgɔ, yele bele ye námaraw kpéʔele kútiisinw myɛ ni lè.

¹⁰ Yele bele ye Siyɔn faanri ní sìsyaanwori ní lè, ní i Zyerusalɛmi faanri ní péemi ní lè.

¹¹ Wi kùndigibèle i kútiiw nyuu námara kpɔ́ʔɔri kéele na wi sáriga-wòlobèle i syɛ́ɛnbèle tama sàra na, wi kanyaajoobèle i kérigèle nyuu ni yaari wáli na. A be si peyɛɛ zígi Yawe na ní i gi nyuu níì jo: «Yawe o nyɛ wolo níngi ni ì? Wɔʔɔgi a nan wolo na í.»

¹² Koro na, yele kéeli na Siyɔn a tɔ̀nɔ́ fála àmɛɛ seʔe nyɛ lè. Zyerusalɛmi a pye kàdɛnɛgboolo, kpɔ̀ʔɔrɔli kpaʔa nyanbelege si pye dǎndamaga, gee kɔligɔ tɔ́n lè.