Misye 2 - Cebaara Bible 2010

Bele pe be fǎngi gbàngí ni sɔ̀lɔ́ lè

¹ Wɔʔɔlɔ a pye bele na be sìnzinmi pyeganma sɔ̀ngí lè, ní i kapeegi kpéʔeleganma tímana ni yaari n be yaʔa pe yasinɛyi na! Nyǐngi ga tali, lǎli ni gi kpéʔeleli fànʔa ga pye be ma lè pe n gi foro.

² Pe i nyabɛɛnnɛ kpéʔele seye kéele na, ní i yi nɛnɛ ni syoo, ní kpaaya kéele na, ní i yi syoo fànʔa na. Pe i fǎngi gbàngí kànanbile ní li kpáagi na, n wɔ́ɔ ni gi gbàngí nàɔn ní wi kɔ́rigi na.

³ Gee bee na Yawe syɛ́ɛnri naa joo níì jo: «Wéle, mii i wɔʔɔgɔ tímana narigi bee wòolo kánma na. Yele a gbǎn yele yátiiyi yirige gi ni í. Yele a gbǎn yele nyúnyi yìrige sáā táanri í, níì cán wɔʔɔgɔ lala lii.»

⁴ Cángi bee na, pe a kútii joo ceri yele na, pe a ra funbɛɛnrɛ ŋúnugo ŋúu, bàā gi nyuu si jo: «Wolo n tɔ̀nɔ n kálagi péw! Wi i mii syɛ́ɛnbèle lɛɛlɛ lee! Ee! Wi i li syoo mii ma dɛ́! Wi i wolo séyi kaangi niceeye ma!»

⁵ Koro na mɔ a tée syɔɔn taa Yawe syɛɛnkpoʔolomi ni, wee wi mɛɛnnɛ cáan tálɛɛlɛ na lè í.

Bele be kanyaajoow syɛ́ɛnrɛ kábala lè

⁶ Pe i gi nyuu níì jo: «Ye joonɛʔɛgi yaʔa! Joonɛʔɛgɛ a kɔ́ ra nyuu kánmi bee na í! Tɛʔɛlɛyi a tée kwɔ́ɔ í!»

⁷ Zyakɔbi kpáagi wòolo, kánmi bee na lé yele nyuu? A Yawe fúngi tanʔama dɛ́nɛ lé? Kánmi bee na lé wi gi kpéʔele? Wee wi táanri ní sínnɛ ní lè, mii syɛ́ɛnri a kacànna pye wee bee na ì?

⁸ Nlaa yaà làridɔɔnnɔ ni, pe n yére nigooro na n mii syɛ́ɛnbèle sige, bele be yìri kapɛɛnni ma n lúru ni sɔ̀lɔ́ yɛɛ̀nyinge na lè, yele i burogboloyi wóo be na ni láari yaleree na.

⁹ Yele i mii syɛ́ɛnbèle càbala nɛnɛ ni yirigi pe kpaanidaanmayi ni, nìjanri mii taʔa be pìíbèle na lè yele i di láari be na ki kòro nya làla o làla.

¹⁰ Ye yìri, yaa syée! Níì cán tári naa o nyɛ ŋɔ́ndaala tɛ́ʔɛ í. Ti nɔ́nʔɔri kéele na ti a pan ní wɔʔɔyɔ ní, yi a pye wɔʔɔbeeye.

¹¹ Ki n yɛlɛ nànwaa í da nyuu da wáa káfalagi kurugo, bàā jànvaaw nyuu si jo: «Mii a joo mɔ ma dùvɛɛnw ní singbǎnmi kéele na!» Joonɛʔɛgɛfɔw bee félege wi a tɔ̀nɔ́ yɛlɛ syɛ́ɛnbèle naa na!

Isirayɛli wóbèle pe a kòro sìi na lè Kolocɔlɔɔ a be kpóʔoro

¹² Ee Zyakɔbi, mii a tɔ̀nɔ́ mɔ wobow myɛ kpóʔoro! Mii a Isirayɛli wogorobèle kpóʔoro, mii a be kpóʔoro àmɛɛ bàkpaʔa baala nyɛ lè, ní àmɛɛ yaweere gboolo nyɛ lè yaweenaʔa-tɛ́ʔɛ ni. Syɔɔn ye kàfulogo a pye yaà.

¹³ Wee wi wéegi kúunri lè wi i lúru ni syée be yɛ́ɛgi na. Pe i wéegi kúunri ni sɔ̀lɔ́ ni yirigi gi ni. Pe fànʔafɔw i syée be yɛ́ɛgi na, Yawe si i nyɛ pe nyúngi na.