Misye 1 - Cebaara Bible 2010

¹ Yawe syɛ́ɛnri di nan Misye na lè wi lè Moresyɛti ye wów, Zyuda fànʔafɔbèle be lè Yotami, ní Akazi, ní Ezekyasi, poro lǎli ni. Yanyaʔa, Samarii ní Zyerusalɛmi kéeli na.

Yawe n tìgi wi syɛ́ɛnbèle na

² Yele syɛɛnfeleyi myɛ, ye lóʔo! Líiyi cáan tári, n fàra yáriree na di nyɛ mɔ na lè! Ki n yɛlɛ Kàfɔw Yawe í pye séera yele kánmi na, Kàfɔw wi yìri wi kpɔ̀ʔɔrɔli kpaacanga ma ni maa lè!

³ Níì cán Yawe i yirigi wee wi tɛɛkòrogi ni, wi i tíri, wi i táanri tári dǎndamaya na.

⁴ Nyanbeleyi i pegi ni tíri wi láari ni, jǐnlɔyi i wòʔorí àmɛɛ sékuro nyɛ naà yɛ́ʔɛ ma lè, ní àmɛɛ lɔ̀ʔɔ fóo ni tíri tɛɛkòlo-dìgige na lè.

⁵ Koro myɛ si n taa Zyakɔbi kapeegi kéele na, Isirayɛli kpáagi wòolo kapeegéle kéele na! Zyakɔbi kapeegi gi nyɛ gìí? Koro ban gi nyɛ Samarii ì? Zyuda sáriga-wòlo-tɛ́ɛyi yi nyɛ yìí? Yoro ban yi nyɛ Zyerusalɛmi ì?

⁶ Mii a Samarii kàriga kàdɛnɛgbooro séʔe, gi pye ɛrɛzɛn tírire tɛɛ̀cɔ́rɔgɔ. Mii a wi kàdɛnɛri fàari bi wáa jǐnlɔgi ni, mii a wi kàpɔɔnbèle múgu yaʔa.

⁷ Wi ǹdedanyi myɛ a tɔ́nʔɔnɔ, wi sàranɔnʔɔw myɛ a sórigo náagi ni, mii a wi yasunyi myɛ cɔ̀nʔɔ cɔ̀nʔɔ, yoro yee wi taa lè nànjaari sàra báriga ni, yi a ní lúru pye nànjaara sàra.

Wɔʔɔli n nan Zyerusalɛmi na

⁸ Gee bee na mii a ra nyaan, mii a ra nyaan bàā peele, mii a ra táanri taʔalaya fun, ní cepyá, mii a ra yákpoli wáa àmɛɛ gbàʔa nyɛ lè, bàā cɛ́ɛn àmɛɛ sòʔolobèle nyɛ lè.

⁹ Níì cán wi námigi i nyɛ naminaa-sìnbɔʔɔgɔ, ki n cariga fwɔɔ n sáà nan Zyuda na. Ki n nan mii syɛ́ɛnbèle kpàánweele na fwɔɔ n sáà nan Zyerusalɛmi na.

¹⁰ Yele a kɔ́ gi jáari Gati ni í, yele a kɔ́ nyɛni Ako ni í! Da kòlogí támiigi ni, Bɛti-Leyafira ni.

¹¹ Da sɔ̀lɔ́ Syafiiri ye cɔ́ɔ, níbori ní fɛ̀ɛrɛ wóo ní! Saanan ye céw ga fɔ̀lɔ bi yiri í. Bɛti-Yayesɛli kùu káyaagi n yele kún ki dɛ̀ɛmɛni na.

¹² Marɔti ye céw i cɛ̀lɛ́, wi i caa woro í kacànna taa, níì cán wɔʔɔli n yìri Yawe ma n tìgi fwɔɔ n baa nan Zyerusalɛmi kpàánweeli na.

¹³ Lakiisyi ye céw, wòtorow pwɔɔ syɔ́ɔnyi na, mɔ wi pye kapeeli sélimɛ, calipili Siyɔn ma, níì cán mɔ ni Isirayɛli kapeeyi nyaa.

¹⁴ Koro na mɔ a wàli Moresyɛti-Gati na. Akizibi kpáayi a Isirayɛli fànʔafɔbèle jànváa.

¹⁵ Mii a ní pan ní wàa ní, wee wi a ba mɔ jáa lè, Maresya ye céw, Isirayɛli nìjanri a kári sa nan fwɔɔ Adulami na.

¹⁶ Mɔ njoori kɔ́nɔgi, nyùnjɛɛli kpoori mɔ piinidaanmabèle kéele na! Ki n yɛlɛ mi tɔ̀nɔ mi miyɛɛ kàriga nyùngbowaala fɔ́lɔ àmɛɛ kàcɔʔɔgɔ nyɛ lè, níì cán pe a be cò bi kári púlori na bi léeli mɔ na.