Matye 9 - Cebaara Bible 2010

Zyezu n syɛɛnmɔngɔɔ pɔʔɔ

¹ A Zyezu jée kɔ́rɔw ni n lǒgi jeli n sáà jée wi kěgi ni.

² A be syɛɛnmɔngɔɔ láa yasinɛgɛ ni n pan wi ma. A Zyezu ga be tágali nyaa, a wi syɛɛnmɔngɔw pye: «Ni pyà, maa fundaanra kpéʔele. Mɔ kapeegèle kùsulugo n syɔɔ.»

³ A làlwaw sɛ́bɛwelebèle pèle fala ni gi sɔ̀ngí peyɛɛ fúnyi ni níì jo: «Nǎnw naa i Kolocɔlɔɔ mɛ́ɛgi kálagi.»

⁴ A Zyezu fala n be sɔ̀nguri cán, a wi be pye: «Nyàʔá na yele sɔ̀ngubeeri bee sɔ̀ngí yele fúnyi ni?

⁵ Bi jo: ‹Mɔ kapeegèle kùsulugo n syɔɔ,› koro ga jáa bi jo: ‹Yìri maa táanri,› gìí gi wɛ́ʔɛri?

⁶ Koro ga pye yele í gi cán séew i nyɛ Syɔɔn-pya ma tári na bàā kapeegèle kùsulugo syoo.» A wi syɛɛnmɔngɔw pye: «Yìri, mi mɔ yasinɛgi láa maa syée mɔ kpaʔa ma.»

⁷ A wi fala n yìri n kári wi kpaʔa ma.

⁸ A syɛ́ɛnmi ga gee bee nyaa, a bi fyáa ní i Kolocɔlɔɔ kpɔ̀ʔɔrɔ́, woro wee wi séew bee félege kaan lè syɔɔn ye ma.

Zyezu n Matye yeri

⁹ A Zyezu ga núngo nɛɛ bee, a wi sáà nànwaa nyaa wodɛ́ɛɔn ní wálisyɔɔbèle kpaʔa ni. Pe i wi yiri Matye. A wi wi pye: «Taʔa mii na wo kári.» A wi yìri n taʔa wi na.

¹⁰ A Zyezu ga sáà tɛ́ɛn ni líi kpáagi ni, a wálisyɔɔbèle ní kapeebyebèlē saʔa pan n baa tɛ́ɛn ni líi ní wi ní n fàra wi pìitamabèle na.

¹¹ A Farisibèle ga gee bee nyaa, a be wi pìitamabèle pye: «Nyàʔá na yele tamafɔw pínɛ ni líi ní wálisyɔɔbèle, ní kapeebyebèle ní?»

¹² A Zyezu ga gee bee lóʔo a wi jo: «Bele be cólogo lè, pe màko o nyɛ lɔ̀ʔɔtɔrɔ na í, fwɔɔ bele be yáa lè.

¹³ Ki n yɛlɛ ye sa syɛ́ɛnri naa kɔ́rɔ sɛʔɛ ye wéle àmɛɛ gi joo lè: ‹Nyinimɛ mii caa. Mii o sáriga caa í.› Níì cán mii ga pan ba syɛɛnsinbèle yeri í, fwɔɔ kapeebyebèle.»

Zyezu ní súnw lele kéele

¹⁴ Lǎli bee ni a Zyan pìitamabèle pan Zyezu ma n baa wi yíbe níì jo: «Nyàʔá na wolo ní Farisibèle súnw nii, mɔ piitamabèle si o wi nii í?»

¹⁵ A Zyezu be yari: «Cefɔnw fɔ́lɔ ga pye ní cèpɔrigi syɛ̀ɛnnɛ ní, pe a gbǎn ra yɛ́ɛyi taanri lé lǎli bee ni? Làlaa si i maa, lee ni pe a ba cefɔnw fɔ́lɔ yirige lè pe níngi ni. Lǎli bee ni pe a náa súnw le.

¹⁶ Syɔɔn faala o fànifɔɔn téeri ni fànilɛɛɔ tɛɛsulugo jɔli í. Ki ga pye ànbée, fànifɔnw a kùru wiyɛɛ na bi láʔa fànilɛɛw na, tɛɛsulugi si náa pee bi sɔ̀lɔ.

¹⁷ Pe wɔ́ɔ o dùvɛɛnfɔɔn nii saliya kpàbilɛɛbéle ni í. Ki ga pye ànbée, kpàbibèle a fologi cɛnɛ, dùvɛɛnw si wo, kpàbibèle si wɔ́ɔ kálagi. Kàjáa pe i dùvɛɛnfɔɔn nii saliya kpàbifɔnbéle ni, ti myɛ tɛ́ɛyi siin n kòro wojanra ní.»

Zyefubèle sérikpaʔa kafɔlɔ jáa ní céw wi tánga Zyezu búrogi na lè

¹⁸ Lǎli ni Zyezu pye ni kérigèle bee nyuu be ma lè, a Zyefubèle sérikpaʔa kafɔwaa pan n baa kpùmɔnɔ wi taana níì jo: «Mii calipili n kùu tɔ́ɔliw ni. Koro ní ki myɛ ní maa maa mi ba mɔ kɔ́gi taʔa wi na, wi a nyán.»

¹⁹ A Zyezu ní wi pìitamabèle yìri n pínɛ ni syée ní wi ní.

²⁰ Cewaa si maa pye ní lòwelige ní, a gi kwɔ́ɔ wi na yɛ̀ʔɛlɛ kɛɛ ní siin, a wee bee taʔa Zyezu na n sáà tánga wi búrogi kàgomɔ na.

²¹ Níì cán wi maa ni gi sɔ̀ngí wiyɛɛ fúngi ni n jo: «Alí mii ga tánga wi búrogi yagana na, mii a pɔʔɔ.»

²² A Zyezu ga kàri n wéle n wi nyaa, a wi wi pye: «Ni pyà, mɔ a kɔ́ ra fɛ̀ɛgí í, mɔ tágali n mɔ pɔʔɔ.» Lǎli bee ni a céw fala n pɔʔɔ.

²³ A Zyezu ga sáà jée sérikpaagi kàfɔlɔ kpaʔa ni, a wi maawiibèle nyaa, ní wɔ́ɔ̀ syɛ́ɛnmi nyaa a bi fúnyi curugo bi na.

²⁴ A wi be pye: «Yaa yirigi yaà, níì cán pìcaapili ga kùu wii í, a li ŋúnɔ wii.» A be i peyɛɛ nyɛ́nɛ wi na.

²⁵ A be ga syɛ́ɛnmi yirige, a Zyezu jée kpáagi fúngo ni n sáà pìcaapili cò kɔ́gi na n yìrige.

²⁶ A kéeli bee fala n cariga tári bee myɛ ni.

Zyezu n fúunbéle siin paʔa

²⁷ A Zyezu ga yiri nɛɛ bee ni syée, a fúunbéle siin taʔa wi na ní i yákpogèle wáa wi kurugo níì jo: «Davidi jáaw, nyinimɛ taa wolo na.»

²⁸ A wi ga sáà jée kpáagi ni, a fúunbèle bee nùuni wi na. A Zyezu be yíbe níì jo: «A yele tága lé gi na ncan mii fánʔa i nyɛ gee bee na bi gbǎn gi kpéʔele?» A be wi pye: «Ɛɛn, Kàfɔw.»

²⁹ A wi fala n tánga be nyapiigèle na níì jo: «Ki n yɛlɛ gi kpéʔele yele ma bi yɛlɛ ní yele tágali ní.»

³⁰ A be nyapiigèle fala n múgu. A Zyezu gi joo n gbàn be ma níì be pye: «Ki n yɛlɛ ye kɔ̀rɔsíi, ki ga yɛlɛ syɔɔn faala í kɔ́ gi cán í.»

³¹ A be ga yiri nɛɛ bee terire, a be sèʔé sa ni wi kéeli jáari tári bee myɛ ni.

Zyezu n bobonaɔn pɔʔɔ

³² Lǎli ni fúunbèle yiri ni syée lè, a pèle pan ní boboo ní Zyezu ma. Màdeo maa pye wi ni.

³³ A wi ga màdew nɛnɛ n yirige, a boboow fala ni nyuu. A syɛ́ɛnmi i káama gi na níì jo: «Gee naa kàa félege ga kɔ́ɔ̀ nyaa Isirayɛli tári ni í.»

³⁴ Kàjáa a Farisibèle jo: «Màdebèle kàfɔlɔ báriga ni wi màdebèle nɛnɛ ni yirigi syɛ́ɛnbèle ni.»

Syɛ́ɛnmi nyínimɛ i nyɛ Zyezu na

³⁵ A Zyezu fala ni syée kèkpoloyi ní kèpiigèle myɛ ma n sa ni be tama pe sérikpaayi ni, ní i Kolocɔlɔɔ fǎngi syɛɛnjóocànra nyuu, ní i yáami féleye myɛ láari syɛ́ɛnbèle na.

³⁶ A wi ga syɛ́ɛnmi nyaa, a bi nyínimi wi taa gbanʔama, níì cán bi fúnyi maa tɔ̀nɔ n curugo bi na, a bi yɛ́ɛyi wɔ́ɔ àmɛɛ bànaʔaɔ fun bàala nyɛ lè.

³⁷ Lǎli bee ni a Zyezu wi pìitamabèle pye: «Yaliilɛɛgwɔɔri n tɔ̀nɔ n nɛʔɛ séyi ni, kàjáa ti láafɔbèle ga nɛʔɛ í.

³⁸ Koro na gi yɛlɛ yaa séyi Kàfɔlɔ nyɛ́ɛri jàngó waa yaliilaabèle kɔ́ri waa tórogi wi séyi ma.»