Matye 8 - Cebaara Bible 2010

Zyezu n yaanyɛɛnmɛfɔlɔ pɔʔɔ

¹ A Zyezu ga tìgi nyanbelegi na a syɛɛnnɛʔɛmɛ taʔa wi na.

² A yaanyɛɛnmɛfɔlɔ pan wi ma n baa kpùmɔnɔ wi taana níì jo: «Kàfɔw, mɔ ga fɔ̀lɔ mɔ a gbǎn mii kàriga wojaɔn ní.»

³ A Zyezu wi kɔ́gi sánʔa n tánga wi na níì jo: «Mii n fɔ̀lɔ, pɔʔɔ mi nyɔɔ.» Tɛ́ɛgi bee ni a yaanyɛɛnmi fala n láʔa wi na a wi pɔʔɔ.

⁴ A Zyezu wi pye: «Ki n yɛlɛ maa kɔ̀rɔsíi, mɔ a kɔ́ gi joo syɔɔn ma í. Kàjáa da syée mi sa miyɛɛ dɛ̀ɛn sáriga-wòlow na, mí sárigaw wòlo, wee kéele Mowizi da joo lè, jàngó gee bee í pye be ma séera.»

Zyezu n wɔrɔmi ye sùlasiibèle kàfɔwaa nìgwɔɔ pɔʔɔ

⁵ A Zyezu ga jée Kapɛrinayumi ni, a sùlasiibéle dabata kàrigafɔwaa pan wi ma n baa wi nyɛ́ɛri

⁶ níì jo: «Kàfɔw, mii nìgwɔɔw i yaà kpáagi ni wozinɛɔ ní, wi n mɔ́ngɔ, ní tɔ̀nɔ́ i wɔʔɔ gbanʔama.»

⁷ A Zyezu wi yari: «Mii i syée yaà bi sa wi pɔʔɔ.»

⁸ A sùlasiibèle dabata kàrigafɔlɔ wi pye: «Kàfɔw, mii ga nyɔɔ n yɛlɛ mɔ í jée mii kpáagi ni í. Kàjáa mi syɛɛnkanga nibin joo, mii nìgwɔɔw a pɔʔɔ.

⁹ Ncan pèle i mii tiimaa kàragí, mii si wɔ́ɔ i sùlasiibèle pèle kàragí. Mii ga wee pye: ‹Da syée,› wi n ni syée. Níì wee pye: ‹Da maa,› wi n ni maa. Níì mii púlow pye: ‹Gee kpéʔele,› wi n ni gi kpéʔele.»

¹⁰ A Zyezu ga gee bee lóʔo, a wi i káama gi na. Bele be pye wi kurugo lè, a wi gi joo bele bee ma níì jo: «Mii a gi joo yele ma kányɛʔɛ ni, mii ga kɔ́ɔ̀ tágali naa félege nyaa Isirayɛli ye wówaa ma í.

¹¹ Mii a gi joo yele ma si yele pye, syɛ̀ɛnnɛ saʔa a yìri canʔafolomɔ ní canʔajeemɛ ma bi ba tɛ́ɛn Abirahami, ní Izaaki, ní Zyakɔbi taana nyɛ̀ʔɛni fànʔa ni,

¹² pé màʔá fǎngi pìibēle wáa kàfugi na léelige yébilimi ni, tɛ́ɛgee ni syɛ́ɛnbèle a ra sùpiigèle wáa sáā gǎngèle kúru lè.»

¹³ A Zyezu sùlasiibèle dabata kàrigafɔlɔ pye: «Maa syée, ki a kpéʔele mɔ ma bi yɛlɛ ní mɔ tágali ní.» A wi nìgwɔɔw fala n pɔʔɔ lǎli bee wonijanna ni.

Zyezu n yaabèlē saʔa pɔʔɔ

¹⁴ A Zyezu ga sáà jée Pyɛri kpáagi ni, a wi Pyɛri céw nɔ́ɔ nyaa wozinɛɔ ní, cefuuro maa pye wi na.

¹⁵ A Zyezu tánga wi kɔ́gi na, a cefuuri fala n láʔa wi na. A wi yìri ni kpéʔele be ma.

¹⁶ A ki ga pye cânjeevɔngi na a be i maa ní màdebèle fɔ̀ɔlɔ saʔa ní Zyezu ma. A wi ba ni màdebèle nɛnɛ ni yirigi be ni wi syɛ́ɛnri báriga ni ní i yáabèle myɛ poori,

¹⁷ jàngó syɛ́ɛnri í foro, dee kanyaajoow Ezayi da joo lè níì jo: «Wi n wolo fɔ̀rɔyi túgoro tugo níì wolo yáami láʔa wolo na.»

Bele be caa bi taʔa Zyezu na lè

¹⁸ Amɛɛ Zyezu syɛ́ɛnmi nyaa a bi woro màʔa lè, a wi gi joo n gbàn níì jo pe jeli lǒgi jelige na.

¹⁹ A làlwaw sɛ́bɛwelewaa pan wi ma n baa wi pye: «Tamafɔw, mii a taʔa mɔ na bàā syée ní mɔ ní mɔ tɛɛ̀káriyi myɛ ni.»

²⁰ A Zyezu wi pye: «Weegèlē i nyɛ sɔ́riyi ma, zyàara si i nyɛ féjɛɛngèle ma, kàjáa nyùngo tɛɛ̀légege o nyɛ Syɔɔn-pya ma í.»

²¹ A pìitamawaa nikwɔɔ wi pye: «Kàfɔw, tíi mii í kári sa mii tóow tɔ́n gbɛnʔɛnɛ.»

²² A Zyezu wi pye: «Da maa mii kurugo, mí kúbèle yaʔa paa peyɛɛ dɔ́ngi.»

Zyezu n káfalakpɔɔgi yérige

²³ A Zyezu ga jée kɔ́rɔw ni, a wi pìitamabèle jée wi kurugo.

²⁴ Wéle, a káfalakpɔʔɔ yìri ni funu lòkpɔɔgi na, fwɔɔ a lǒgi kùnguruyo i caa bi kɔ́rɔw tɔ́n. Zyezu si maa ni ŋúnɔ.

²⁵ A be fala n wi yìrige níì jo: «Kàfɔw, mi wolo syɔɔ. Wolo a wáa.»

²⁶ A wi be pye: «Nyàʔá na yele fɛ̀ɛgí? Yele tágali n cɛ́rɛ.» A wi náà yìri n yére níì fúlo káfalagi ní lòkpɔɔgi na. A ti myɛ sámaga n yére.

²⁷ A be i káama gi na níì jo: «Nyàʔá syɛɛnfeleo wi wee naa, àlí káfalagi ní lòkpɔɔgi i lúro wi ma?»

Zyezu n nànbēle siin pɔʔɔ, bele ni madebēle da pye lé

²⁸ A Zyezu ga lòkpɔɔgi jeli n nan Gadara ye tári na, a màdebēle fɔɔlɔ siin yiri kɔ̀ɔnweeyi ni n baa wi fàra. Pe maa tɔ̀nɔ n tanʔa gbanʔama. Alí syɔɔn faala da níì gbàn ni sɔ̀lɔ́ kólogi bee ni í.

²⁹ A be i yákpogèle wáa níì jo: «Nyàʔá gi nyɛ wolo ní mɔ níngi ni, mɔ wi lè Kolocɔlɔɔ Jáaw? A mɔ pan lé ba wolo wɔʔɔ sáni lǎli í nan lè?»

³⁰ Gbòyoonɛʔɛrɛ si maa pye yaà léelige ni líi.

³¹ A màdebèle wi nyɛ́ɛri gbanʔama níì jo: «Mɔ ga wolo nɛnɛ n yirige syɛ́ɛnbèle naa ni, mi wolo yaʔa wolo í sa jée gbòyoonɛʔɛri yaa ni.»

³² A wi be pye: «Yaa syée.» A be yiri n kári n sáà jée gbòyoori ni, a ti myɛ fàn kelekele n tìgi nyanbelegi tìgimɛ ni n sáà too lòkpɔɔgi ni n kùu.

³³ A di nàʔafɔbèle fàn n kári n sáà kérigèle bee myɛ joo kěgi ni, ní gee gi kpéʔele lè màdebèle fɔ̀ɔlɔ na.

³⁴ A kěgi syɛ̀ɛnnɛ myɛ fala n yiri bi sa Zyezu fàra. A be ga sáà wi nyaa, a be wi nyɛ́ɛri gbanʔama níì jo wi yiri poro tɛ́nɛmi ni.