Matye 7 - Cebaara Bible 2010

Ki ga yɛlɛ waa kútiiw kúunri bele na í

¹ «Ki ga yɛlɛ yele í da kútiiw kúunri yeyɛɛ na í, jàngó Kolocɔlɔɔ a wɔ́ɔ kɔ́ kútiiw kúun yele na í.

² Níì cán kánmee na yele kútiiw kúunri bele na lè, kánmi bee na wi a wɔ́ɔ kútiiw kúun yele na. Yalegee ni yele yáriri kíri ni kaangi syɛ́ɛnbèle ma lè, gee bee félege ni Kolocɔlɔɔ a wɔ́ɔ yele wóri kíri bi kaan yele ma.

³ Nyàʔá na mɔ kànyaʔabili wéle mɔ senyɛnw nyápile ni, mɔ si o kàganagbɔɔgi córo, gee gi nyɛ mɔ wóli ni lè í?

⁴ Ba mɛ̀ɛ́ mɔ a mɔ senyɛnw pye: ‹Tíi mii í kànyaʔabili cò bi yirige mɔ nyapili ni,› bi gi taa kàganagbɔɔgi i nyɛ mɔ wóli ni?

⁵ Syɛɛnjóotɛɛyɛ siin joofɔlɔ wi mɔ. Mi kàganagbɔɔgi cò mi yirige mɔ nyapili ni gbɛnʔɛnɛ, koro ga pye mɔ a náa sámaga nyaa bi kànyaʔabili yirige mɔ senyɛnw wólo ni.

⁶ Gee be màra Kolocɔlɔɔ kpɔ̀ʔɔrɔli kéele na lè, ki ga yɛlɛ yele í da gi kaangi pɔ́nbèle ma í. Ki ga wɔ́ɔ̀ yɛlɛ yele í da yele lúluw cáan gbòyooyi taana yaa tánʔana si kɔ́ kàri baa yele nɔngi í.

Yaa nyɛ́ɛri, yaa caa, yaa kɔ̀rigi kólo

⁷ «Yaa nyɛ́ɛri, ye a ra taagi. Yaa caa, ye a ra nyaagi. Yaa kɔ̀rigi kólo, Kolocɔlɔɔ a gi múgu yele ma.

⁸ Níì cán syɔɔn o syɔɔn wi nyɛ́ɛri lè, wi i taagi. Wee wi caa lè, wi i nyaagi. Wee wi kɔ̀rigi kólo lè, Kolocɔlɔɔ a gi múgu wi ma.

⁹ Wìí wi nyɛ yele ni, wi jaà ga wi nyɛ́ɛri búru na, wi n kàdɛnɛgɛ kaan wi ma?

¹⁰ Ba wi ga wɔ́ɔ̀ fyáa nyɛ́ɛri wi ma, wi a wàbiga kaan lé wi ma?

¹¹ Koro na àmɛɛ yele pee lè ní sèʔê gi cán ki n yɛlɛ yele í da yacanri kaangi yele pìíbèle ma, yele Tóow wi lè nyɛ̀ʔɛni na, wi a ra yacanri kaangi wi nyɛ́ɛrifɔbèle ma bi sɔ̀lɔ yele kaanganmi na ì?

¹² Koro na yariga o yariga yele caa syɛ́ɛnbèle í da kpéʔele yele ma lè, ki n wɔ́ɔ̀ yɛlɛ yaa gee bee wonijanga kpéʔele be ma. Níì cán koro gi nyɛ Mowizi làlwaw, ní kanyaajoobèle syɛ́ɛnrɛ kɔ́rɔ.

Tɛɛ̀jeepili

¹³ «Ki n yɛlɛ ye jée tɛɛ̀jeepili ni. Níì cán tɛɛ̀jeegee nyɔ́ɔ gi kpɔ́ʔɔ lè, a gi kólogi wɔ́ɔ̀ kpɔ́ʔɔ, gee bee gi syée kálagili ma, a gi jéefɔbèle nɛʔɛ.

¹⁴ Kàjáa tɛɛ̀jeegee nyɔ́ɔ gi cɛ́rɛ lè, a gi kólogi wɔ́ɔ̀ cɛ́rɛ, gee bee gi syée sìíw ma. Ki nyaafɔbèle si ga nɛʔɛ í.

Tíigi ní gi yasanri

¹⁵ «Ki n yɛlɛ yaa yeyɛɛ kɔ̀rɔsíi kanyaajoo-fáanabèle na, bele be bàsaliyi nii lè ni maa yele ma, bi gi taa be fúnyi i nyɛ àmɛɛ solomikaara fúnyo nyɛ lè, dee kateegi sámaga n jáa lè.

¹⁶ Yele a be cán pe kapyegèle báriga ni. A syɔɔn i ɛrɛzɛn yasanra coo lé wúuro tíige ni? Ba pe i děsyanʔa coo lé solovinge tíige ni?

¹⁷ Kánmi bee na tiicanga o tiicanga i yasanjanra sangi. Tiipeʔe o tiipeʔe si wɔ́ɔ i yasanbeere sangi.

¹⁸ Tiicanga a gbǎn ra yasanbeere sangi í. Tiipeʔe si a wɔ́ɔ gbǎn ra yasanjanra sangi í.

¹⁹ Tiige o tiige gi lè ki o yasanjanra sangi í, pe a gi kpúmɔn wáa náagi ni.

²⁰ Koro na yele a be cán pe yasanri báriga ni.

Bàā gi nyuu si wɔ́ɔ ra gi kpéʔele

²¹ «Bele myɛ be mii yiri lè ‹Kàfɔw, Kàfɔw,› pe myɛ a jée nyɛ̀ʔɛni fànʔa ni í, fwɔɔ wee wi ga ni mii Tóow nyɛ́nɛ kèlē kpéʔele lè, wi lè nyɛ̀ʔɛni na.

²² Pèle saʔa a ba gi joo mii ma cángi bee na si jo: ‹Kàfɔw, Kàfɔw, wolo da ni Kolocɔlɔɔ syɛ́ɛnri nyuu mɔ mɛ́ɛgi na ì, ní i màdebèle nɛnɛ ni yirigi mɔ mɛ́ɛgi na ì, ní wɔ́ɔ i kakpoloyi saʔa kpéʔele mɔ mɛ́ɛgi na ì?›

²³ Mii si a gi joo be ma lǎli bee ni si be pye: ‹Mii ga yele cán nyáana í. Ye núngo mii taana, yele kakolobyebèle.›

Kpáayi siin

²⁴ «Syɔɔn o syɔɔn wi mii syɛ́ɛnri naa lúro lè, ní i gi kpéʔele àmɛɛ mii jo lè, wi a pye àmɛɛ sícilio nyɛ lè, wee wi wi kpáagi faan lè fálaga njoʔo ni.

²⁵ A zěgi ga ni tuun, a cábiyi nyìn ni fóo, a káfalagi i funu gbanʔama ní i kpáagi bee ŋɔrɔgi, ki si ga too í, níì cán ki kàpɔɔnw i nyɛ fálagi ǹjoʔo ni.

²⁶ Syɔɔn o syɔɔn wi mii syɛ́ɛnri naa lúro lè, wi si o gi kpéʔele àmɛɛ mii jo lè í, wi a pye àmɛɛ nilabalaɔ nyɛ lè, wee wi wi kpáagi faan lè táminyɔɔ ǹjoʔo ni.

²⁷ A zěgi ga ni tuun, a cábiyi nyìn ni fóo, a káfalagi i funu gbanʔama ní i kpáagi bee ŋɔrɔgi, a ki myɛ too n cariga.»

Zyezu fǎngi

²⁸ Lǎli ni Zyezu syɛ́ɛnri bee joo n kwɔ́ɔ lè, a syɛ́ɛnmi i káama wi tamani na.

²⁹ Níì cán wi maa ni be tama ní séew ní. Wi tamani da pye àmɛɛ poro làlwaw sɛ́bɛwelebéle wólo nyɛ lè í.