Matye 6 - Cebaara Bible 2010

Tamana kaanganmi kéele na foomɔfɔbèle ma

¹ «Yaa yeyɛɛ kɔ̀rɔsíi, ye a kɔ́ ra yele sínni kèlē kpéʔele syɛ́ɛnbèle nyɛ́nɛ na jàngó paa yele nyaagi í. Kapye koro ban í yele a tɔ̀nɔ taa yele Tóow ma wi lè nyɛ̀ʔɛni na í.

² Koro na mɔ ga ni yarigaa kaangi foomɔfɔbèle ma, mɔ a kɔ́ ra tòmaʔa wíi ní gee bee ní í, àmɛɛ syɛɛnjóotɛɛyi siin joofɔɔlɔ gi kpéʔele lè sérikpaayi ni ní kàlari-kóloyi ni í. Pe i koro kpéʔele jàngó syɛ́ɛnbèle í da poro mɛ́ɛtaangi yiri. Mii si a gi joo yele ma kányɛʔɛ ni, poro n be tɔ̀nɔw taa n kwɔ́ɔ.

³ Kàjáa mɔ ga ni yarigaa kaangi foomɔfɔbèle ma, gee kàliige kɔ́gi kpéʔele lè, ki ga yɛlɛ kàmɔnɔ kɔ́gi í kɔ́ gi cán í,

⁴ jàngó mɔ yakaangi í pye làrama ni. Ki ga pye nya, mɔ Tóow wi kalaragèle nyaagi lè, woro a gi tɛ́ɛgi lúrugo mɔ ma.

Tamana nyɛ́ɛriganmi kéele na

⁵ «Mɔ ga ni Kolocɔlɔɔ nyɛ́ɛri lǎli ni lè, mɔ a kɔ́ gi pye àmɛɛ syɛɛnjóotɛɛyi siin joofɔɔlɔ nyɛ lè í. Ncan ki n be dɛ́nɛ bàā yèré sáā Kolocɔlɔɔ nyɛ́ɛri sérikpaayi ni ní kobariyi na, jàngó syɛ́ɛnbèle í da poro nyaagi. Mii si a gi joo yele ma kányɛʔɛ ni, poro n be tɔ̀nɔw taa n kwɔ́ɔ.

⁶ Mɔ si na, mɔ ga naà Kolocɔlɔɔ nyɛ́ɛri lǎli ni lè, mi jée mɔ kpaafungi ni mí kɔ̀rigi tɔ́n máā nyɛ́ɛri mɔ Tóow ma wi lè tɛɛlaragi ni. Ki ga pye nya, mɔ Tóow wi kalaragèle nyaagi lè, woro a gi tɛ́ɛgi lúrugo mɔ ma.

⁷ Mɔ ga ni Kolocɔlɔɔ nyɛ́ɛri lǎli ni lè, mɔ a kɔ́ ra syɛɛnnijanri nyuu da taʔala àmɛɛ syɛɛnfeleyi wozanya gi kpéʔele lè í. Ncan pe i gi sɔ̀ngí poro syɛɛnnɛʔɛri a gi yaʔa Kolocɔlɔɔ í naa gbǎn lóʔo poro ma.

⁸ Koro na ki ga yɛlɛ yele í da bele bee tɛ́ɛlɛ í. Níì cán yele Tóow n gi cán gee láa gi nyɛ yele na lè sáni yele í wi nyɛ́ɛri lè.

⁹ Koro na ki yɛlɛ yaa nyɛ́ɛri kánmi naa na yé jo: ‹Wolo Tóow, mɔ wi lè nyɛ̀ʔɛni na, ki n yɛlɛ mɔ mɛ́ɛgi í da kpɔ̀ʔɔrɔ́.

¹⁰ Mɔ fangi sáā maa. Mɔ nyɛ́nɛ kérigèle si wɔ́ɔ ra kpéʔele tári na àmɛɛ ge kpéʔele nyɛ̀ʔɛni na lè.

¹¹ Yaliiri mɔ kaangi wolo ma lè canʔa o canʔa, mi níjanʔa wóri kaan wolo ma.

¹² Mi wolo kapeegèle kùsulugo syɔɔ àmɛɛ wolo bele wòʔolo syoo lè.

¹³ Ki ga yɛlɛ mɔ í yarigaa yaʔa gi wolo kárima bi lége kapeele ni í. Ki n yɛlɛ mɔ í wolo syɔɔ Wobeew ma. [Níì cán fǎngi, ní séew, ní nìjangbɔɔri myɛ i nyɛ mɔ wóro làla o làla. Amiina!]›

¹⁴ Ye gi cán yele ga ni syɛ́ɛnbèle kapeegéle kusulugo syoo, yele Tóow wi lè nyɛ̀ʔɛni na, wi a wɔ́ɔ ra yele wógèle kùsulugo syoo.

¹⁵ Kàjáa yele ga pye yele o syɛ́ɛnbèle kapeegéle kusulugo syoo í, yele Tóow a wɔ́ɔ ra yele wógèle kùsulugo syoo í.

Tamana súnw leganma kéele na

¹⁶ «Yele ga ni súnw nii, ki ga yɛlɛ yele í da yele yɛ́ɛyi taanri àmɛɛ syɛɛnjóotɛɛyi siin joofɔɔlɔ gi kpéʔele lè í. Pe i be yɛ́ɛyi fɛ̀ɛ́, jàngó syɛ́ɛnbèle í da poro nyaagi si gi cán poro i nyɛ sún na. Mii si a gi joo yele ma kányɛʔɛ ni, pe n be tɔ̀nɔw taa n kwɔ́ɔ.

¹⁷ Kàjáa mɔ ga súnw le, mi mɔ yɛ́ɛgi jée, mí nùndaanna sìnmɛ tɛ́ʔɛ mi mɔ nyúngi kurugo,

¹⁸ jàngó syɛ́ɛnbèle a kɔ́ gi cán mɔ i nyɛ sún na í, fwɔɔ mɔ Tóow wi lè tɛɛlaragi ni. Koro ga pye mɔ Tóow wi kalaragèle nyaagi lè, woro a gi tɛ́ɛgi lúrugo mɔ ma.

Lɔ́ri kɔnnɔ kéele nyɛ̀ʔɛni na

¹⁹ «Ki ga yɛlɛ yele í da lɔ́ri caa da kɔngi yeyɛɛ ma tári na, beè dɔ́nw ní tátɔɔnw di kálagi lè í, ní beè kàyuubèle kpáayi fúrugu ní i yúu lè í.

²⁰ Fwɔɔ yele í da di caa da kɔngi yeyɛɛ ma nyɛ̀ʔɛni na beè dɔ́nw ní tátɔɔnw o di kálagi lè í. Ní beè kàyuubèle o kpáayi fúrugu ní i yúu lè í.

²¹ Níì cán beè mɔ lɔ́ri ga pye lè, beè mɔ sɔnguri a wɔ́ɔ pye.

Céri fètinnɛ kéele

²² «Nyapili li nyɛ céri fètinnɛ. Koro na mɔ nyapili ga pye wojanna ní, mɔ céri myɛ a pye gbɛ̀ɛnmɛ.

²³ Kàjáa mɔ nyapili ga pye li ga nyɔɔ í, mɔ céri myɛ a pye yébilimɛ. Koro na gbɛ̀ɛ́nmee bi nyɛ mɔ ni lè, pi ga pye yébilimɛ, mi gi cán yébilimi bee a tɔ̀nɔ́ wɔ́ɔ gbanʔama!

Kolocɔlɔɔ wàlá wáliw

²⁴ «Syɔɔn faala a gbǎn báara kùndigibéle siin ma í. Fwɔɔ wàa kéele í wi bɛɛn, wàa wólo si wi dɛ́nɛ. Wi a tan wàa na, si wiyɛɛ láagi yirige wàa ni. Yele a gbǎn pye Kolocɔlɔɔ falipyebèlē, si ní pye lɔ́ri falipyebèlē í.

Bi tága Kolocɔlɔɔ na

²⁵ «Koro na mii a gi joo yele ma, ki ga yɛlɛ yele í kɔ́ ra yele fúnyi curugu yele sìíw kéele na í, si jo nyàʔá yele a lìi, wàlá nyàʔá yele a gbaa í. Yele a wɔ́ɔ kɔ́ ra yi curugu yele céri kéele na si jo nyàʔá yele a le í. Sìíw kéele ga kpɔ́ʔɔ n sɔ̀lɔ yaliiri kéele na ì? Ba céri kéele ga wɔ́ɔ̀ kpɔ́ʔɔ n sɔ̀lɔ fànilew kéele na ì?

²⁶ Ye féjɛɛngèle kéele wéle. Ncan ke o yaliire lúru í, ke si wɔ́ɔ o yaliire lée ni kɔngi gbòdungēle ni í. Yele Tóow wi lè nyɛ̀ʔɛni na, wi si i ge kaangi ke i líi. Yele kéeli si ga kpɔ́ʔɔ n sɔ̀lɔ féjɛɛngèle wólo na ì?

²⁷ Wìí wi naa yele níngi ni, wee wi a gbǎn tètinnɛ tɔnɔganma taʔa lè wiyɛɛ tɔnɔri na wi funjurugori báriga ni?

²⁸ Nyàʔá si na yele yele fúnyi curugu fànilew kéele na? Ye sìnbirigi nyàáfyɛɛnrɛ lɛɛganma wéle. Ti o báara í, ti o wɔ́ɔ̄ jèsee càaná í.

²⁹ Koro ní ki myɛ ní mii a gi joo yele ma, lǎli ni Salomɔn da pye wi nìjangbɔɔri làla ni lè, wi da gbàn n wiyɛɛ vère n nyɔɔ àmɛɛ nyàáfyɛɛnri naa tàa nyɛ lè í.

³⁰ Amɛɛ si Kolocɔlɔɔ sìnbirigi nyàā sámagi kánmi naa na lè, gee gi nyɛ lè gee níjanʔa, nyɛ̀ʔɛna pé gi le náagi ni, wi a yele sámaga bi sɔ̀lɔ koro na ì? Yele tágali n cɛ́rɛ.

³¹ Koro na ki ga yɛlɛ yele fúnyi í da curugu yele na í, si jo: ‹Nyàʔá wolo a lìi, wàlá nyàʔá wolo a gbaa, koro ga jáa nyàʔá wolo a le í?›

³² Níì cán syɛɛnfeleyi i yáriri bee myɛ caa. Yele Tóow wi lè nyɛ̀ʔɛni na, wi n gi cán ncan yáriri bee myɛ láa i nyɛ yele na.

³³ Kàjáa ki n yɛlɛ yele í da wi fǎngi ní wi sínni caa gbɛnʔɛnɛ, yáriri bee myɛ si naa taʔa yaà yele ma.

³⁴ Koro na ki ga yɛlɛ yele fúnyi í da curugu nyɛ̀ʔɛna kéeli na í. Níì cán nyɛ̀ʔɛna funjurugori kèlē a gi yɛlɛ. Canʔa o canʔa kagbangēle n yɛlɛ ní gi ní n kwɔ́ɔ.