Matye 3 - Cebaara Bible 2010

Zyan Batisiti maa ni Kolocɔlɔɔ syɛ́ɛnri nyuu

¹ Lǎli bee ni a Zyan Batisiti pan n ba ni nyuu Zyude fìími tára ni,

² níì jo: «Ye kàdoʔo wáa ye kapeegèle ma, níì cán nyɛ̀ʔɛni fànʔa n nùuni.»

³ Wee kéele kanyaajoow Ezayi da joo lè, woro wi nyɛ Zyan. Ezayi maa gi joo níì jo: «Wàa i yákpolo wáa fìími tára ni, ni gi nyuu níì jo: ‹Yaa Kàfɔw kólogo sámagi yáā wi kozɔ̀lɔyi síngi.› »

⁴ Zyan búrogi maa pye a be gi tìin ní fàlibaʔa síire ní, saliga sɛntiiri si i nyɛ wi na wobwɔɔɔ ní sárigèle ni. Wi yaliiri ti da pye kúdow ní tiiweeyi sárigā.

⁵ Lǎli bee ni a Zyerusalɛmi kěgi syɛ̀ɛnnɛ, ní Zyude tári myɛ, ní Zyuridɛnw tɛ́nɛmɛ syɛɛnnɛ myɛ i yirigi ni syée wi ma.

⁶ A wi sa ni be batize Zyuridɛnw cábiga ni. Pe si maa ni yèré be kapeegèle ni.

⁷ A wi ga Farisibèle ní Sadusebèle pèle saʔa nyaa a pe i maa woro ma, woro í ba be batize, a wi be pye: «Yele màátɔnw jàala, wìí wi yele sàmi níì jo yele í fàn fundanʔari na dee di maa lè?

⁸ Koro na kapyegèle ke a gi tɛ̀ɛn yele n kàdoʔo wáa yele kapeegèle ma lè, yaa gele bee kpéʔele.

⁹ Yele a kɔ́ ra gi sɔ̀ngí yele fúnyi ni bi jo, Abirahami wi nyɛ yele tóow í. Níì cán mii a gi joo yele ma, Kolocɔlɔɔ fánʔa i nyɛ bi gbǎn kàdɛnɛri naa kàriga taa pìibēle sii be pye Abirahami wòolo.

¹⁰ Ye wéle, pe n kpánagi tɛ́ʔɛ n kwɔ́ɔ tíiyi taana. Koro na tiige o tiige gi lè ki o yasanjanra sangi í, pe a gi kpúmɔn wáa náagi ni.

¹¹ Mii tɔ̀nɔ́ i yele batize lǒgi ni kàdowaari kéele na kapeegèle ma. Kàjáa wee wi maa mii kàdoʔo ma lè, wi séew n kpɔ́ʔɔ n sɔ̀lɔ mii wów na. Mii ga caa wɔ́ɔ̀ nyɔɔ n yɛlɛ bàā wi taʔalayi có í. Woro wi a ba ra yele batize ní Pìicǎnni, ní náagi ní.

¹² Wi ségbanni i yaà wi kɔ́gi ni. Wi a wi yaliiri sámaga pɛ́ɛ wi kàsyɔɔgi na si di fɛɛ bi sa kɔn wi gbòdunni ni, si yaliisigiri le bànvigi náagi ni bi di sórigo.»

Zyezu batɛmiw kpéʔelele kéele

¹³ Lǎli bee ni a Zyezu yìri Galile ma n pan Zyuridɛn ma Zyan ma, jàngó wi ba woro batize.

¹⁴ Kàjáa Zyan ga fɔ̀lɔ gi na í, níì jo: «Mɔ wi yɛlɛ bi mii batize, á mɔ si níì pan mii ma!»

¹⁵ A Zyezu wi yari: «Mi fɔ̀lɔ gi na tɔ́ɔliw ni, níì cán kánmi bee na wolo yɛlɛ wolo í gi kpéʔele bi sínni kèlē myɛ foro.» A Zyan náà fɔ̀lɔ gi na.

¹⁶ A Zyezu ga batize n kwɔ́ɔ níì yiri lǒgi ni terire, wéle, a nyɛ̀ʔɛni fala n múgu, a wi Kolocɔlɔɔ Pǐli nyaa li i tíri ni maa wi ma àmɛɛ kàtolo nyɛ lè.

¹⁷ A be yákpolo lóʔo nyɛ̀ʔɛni na, a li jo: «Wee naa wi nyɛ mii Pìinidaanmaw, wee kéele li mii dɛ́nɛ lè gbanʔama.»