Matye 28 - Cebaara Bible 2010

Zyezu nyán-yirili kéele

¹ Cândɛnɛgi canʔa nyǐndaliga na, koro n pye cégbooli cânzelige nyɛʔɛ nyɔ́ɔ na pɛ́ɛn pɛ́ɛn, a Marii Magidala ye wów, ní Marii siin wów pan ba nyángi wéle.

² A tári fala n cúngo gbanʔama. Níì cán Kàfɔw tundunwaa maa yìri nyɛ̀ʔɛni na n tìgi n baa kàdɛnɛgi kòlogo n láʔa n tɛ́ʔɛ kɔlɔ̀ na níì tɛ́ɛn gi na.

³ Wi maa ni daragi àmɛɛ nyɛ̀ʔɛni nyɛ́ʔɛnɛmɛ gbɛɛnmɛ nyɛ lè, a wi búrogi fílige gbanʔama àmɛɛ lànɛɛzyiw nyɛ lè.

⁴ A kpaàwelebèle fala ni cɛ̀lɛ́ àmɛɛ be fɛ̀ɛgí lè wi na, fwɔɔ níì kàri n pye àmɛɛ kúbéle nyɛ lè.

⁵ A tundunw gi joo cébèle ma níì jo: «Ki ga yɛlɛ yele í fyáa í, mii n gi cán yele n pan ba Zyezu wéle, wee pe da kóri tiiparigi na lè.

⁶ Wi o naa í, níì cán wi n nyán n yiri àmɛɛ wi da gi joo lè. Yaa maa ye ba wi tɛɛ̀sinɛgi wéle gee,

⁷ yáā syée kelekele ye sa gi joo wi pìitamabèle ma yé be pye, wi n nyán n yiri kúbèle nínge ni. Wi i syée yele yɛ́ʔɛ na Galile ma. Yele a sa wi nyaa nɛɛ bee. Ye wéle, toro di da pye mii ma bi joo yele ma.»

⁸ A be núngo nyángi taana funvuugo na, fyáari ní fundaangbɔɔri báriga ni, ni fé ni syée bi sa gi joo wi pìitamabèle ma.

⁹ Wéle, a Zyezu fala n be fàra níì be pye: «Ye o faana.» A be nùuni wi na n wi cò tɔ́lɔyi na níì wi kpɔ̀ʔɔrɔ.

¹⁰ A Zyezu be pye: «Ye a kɔ́ ra fɛ̀ɛgí í. Yaa syée ye sa mii senyɛnbèle pye paa syée Galile ma. Pe a sa mii nyaa nɛɛ bee.»

Kpaàwelebèle syɛ́ɛnrɛ

¹¹ A cébèle ga ni syée, sùlasiibèle pe da ni nyángi kɔ̀rɔsíi lè, a poro pèle jée kěgi ni n sáà ki myɛ joo n tɛ̀ɛn sáriga-wòlobèle kàfɔɔlɔ na àmɛɛ gi kpéʔele n sɛ́ɛ lè.

¹² A sáriga-wòlobèle kàfɔɔlɔ peyɛɛ gbóʔoro ní wolɛɛbèle ní, níì joo n bɛ̀ɛ gi na, níì wálinɛʔɛɔ kaan sùlasiibèle ma,

¹³ níì jo: «Ki n yɛlɛ yaa gi nyuu yé jo: ‹Wi pìitamabèle n pan yébiligi ni n baa wi yùu n wolo yaʔa ŋúnɔmi na.›

¹⁴ Fànʔafɔw ga gi lóʔo, wolo a wi nyúngi kàriga, jàngó yele í syɔɔ wɔʔɔli ma.»

¹⁵ A be wáliw syɔɔ ní sáà gi kpéʔele àmɛɛ be gi joo be ma lè. A syɛ́ɛnri bee cariga Zyefubèle nínge ni fwɔɔ n baa nan níjanʔa na.

Zyezu n wiyɛɛ dɛ̀ɛn wi pìitamabèle na

¹⁶ A pìitamabèle kɛɛ ní nibin fala n kári Galile ma n sáà lúgu nyanbelegi na, gee Zyezu da tɛ̀ɛn be na lè.

¹⁷ A pe ga sáà wi nyaa, a be fala n wi kpɔ̀ʔɔrɔ, kàjáa be pèle si maa sèʔé ni peyɛɛ gábala.

¹⁸ A Zyezu ga nan be na, a wi gi joo be ma níì jo: «Nyɛ̀ʔɛni ní tári sée myɛ n kaan mii ma.

¹⁹ Koro na gi yɛlɛ yaa syée, ye sa ra syɛɛnfeleyi myɛ kpéʔele pìitamabéle, yáā be batize Tofɔw, ní Jaafɔw, ní Pìicǎnni mɛ́ʔɛ na,

²⁰ yáā be tama paa kérigèle myɛ kpéʔele gele mii joo n gbàn yele ma lè. Ye wéle, mii i nyɛ ní yele ní canʔa o canʔa bi taa sa nan gi kwɔ́ɔmi na.»