Matye 27 - Cebaara Bible 2010

Pe n kári ní Zyezu ní Pilati ma

¹ A nyǐngi ga tali a sáriga-wòlobèle kàfɔɔlɔ myɛ ní Zyefubèle wólɛɛbéle sáà peyɛɛ nyaa n joo n bɛ̀ɛ Zyezu kpóoli kéele na.

² A be wi pwɔɔ n kári n sáà kaan Pilati ma, wi lè fànʔafɔw.

Zyudasi kùúw kéele

³ Zyudasi wi nyɛ lè Zyezu levɔw be kɔ́yi ni, a wi ga gi nyaa a be nyɔ́ɔgi kúun Zyezu na, a gi wi bɛɛn, a wi wálifiiw toko ní kpɔrigɔ lúrugo sáriga-wòlobèle kàfɔɔlɔ ní wolɛɛbèle ma,

⁴ níì jo: «Mii n kapeele pye, níì cán mii n tɛɛlɛ fun sìsyaan le yele kɔ́yi ni.» A be wi yari: «Wolo nyàʔá gi nyɛ gee bee ni? Mɔ kéele li loro.»

⁵ A Zyudasi wálifiiw wáa kpɔ̀ʔɔrɔli kpaʔa ni níì núngo be taana n sáà wiyɛɛ bwɔɔ n kpóo.

⁶ A sáriga-wòlobèle kàfɔɔlɔ wálifiiw bee jóo níì jo: «Bi yɛlɛ ní làlwaw ní, ki ga yɛlɛ wolo í wi le kpɔ̀ʔɔrɔli kpaʔa kásu ni í, níì cán wi i nyɛ sìsyaan lɔ́rɔ.»

⁷ A be joo n bɛ̀ɛ gi na, ní sáà cóofaanw tára syɔɔ ní wáliw bee ní di pye nibɔnbèle nyangbaa.

⁸ Koro na pe tári bee mɛ́ʔɛ yiri Sìsyaanw Tára n baa nan níjanʔa na.

⁹ Lǎli bee ni a syɛ́ɛnri foro, dee kanyaajoow Zyeremii da joo lè níì jo: «Pe n wálifiiw toko ní kpɔrigɔ láa, wi lè syɔɔn lɔ́rɔ, wáliwee nyɔ́ɔ na Isirayɛli pìíbèle da bɛ̀ɛ lè.

¹⁰ A be sáà cóofaanw tára syɔɔ ní wáliw bee ní, àmɛɛ Kàfɔw gi joo mii ma lè.»

Pilati n Zyezu yíbe

¹¹ A Zyezu yére fànʔafɔw Pilati yɛ́ʔɛ ma. A fànʔafɔw wi yíbe níì jo: «Mɔ lé wi nyɛ Zyefubèle fànʔafɔlɔ?» A Zyezu wi yari: «Ɛɛn, mii wii.»

¹² A sáriga-wòlobèle kàfɔɔlɔ ní wolɛɛbèle i kèlē saʔa nyuu ni taari wi na, wi si ga yafyɛn joo í.

¹³ A Pilati wi yari: «Kérigèle naa be nyuu ni taari mɔ na lè, mɔ o ge lúro ì?»

¹⁴ Zyezu si ga yafyɛn joo wi ma kéeli bee làa faala na í, a gee bee fànʔafɔw fúngo wɔ́ɔ gbanʔama.

Pe n Zyezu kpóoli kútii ceri

¹⁵ Ki maa pye fànʔafɔw kalɛɛlɛ, sériw canʔa ga baa nan, syɛ́ɛnbèle ga kàsolewee nyɛ́ɛri wi ma lè, wi n wee bee yirige n yaʔa.

¹⁶ Lǎli bee ni syɛɛnpeewaa maa pye kàsow ni, pe i wi yiri Barabasi.

¹⁷ A syɛ́ɛnbèle ga peyɛɛ gbóʔoro, a Pilati be yíbe níì jo: «Wìí yele caa mii í yirige yaʔa, Barabasi láà, ba Zyezu, wee be yiri lè Kirisi?»

¹⁸ Níì cán wi maa gi cán nyabɛɛnni kéele na pe baa Zyezu le woro kɔ́yi ni.

¹⁹ Lǎli ni wi pye lè wodɛ́ɛɔn ní kútiiceri-koli na, a wi céw tun wi ma níì jo: «Ki ga yɛlɛ mɔ í kɔ́ jée syɛɛnsinw bee kéele ni í, níì cán kèlē saʔa n mii fɔ̀rɔ ŋúnɔgɔ na pìlige ni wi kéeli na.»

²⁰ Kàjáa a sáriga-wòlobèle kàfɔɔlɔ ní wolɛɛbèle syɛ́ɛnmi sɔ́ɔn jàngó be Barabasi nyɛ́ɛri si Zyezu yaʔa pe wi kpóo.

²¹ A fànʔafɔw be pye: «Be syɛ́ɛnbèle siin ni, wìí yele caa mii í yirige yaʔa?» A be jo: «Barabasi.»

²² A Pilati be yari: «Nyàʔá si mii a kpéʔele Zyezu na, wee be yiri lè Kirisi?» A pe myɛ jo: «Wi kóri tiiparigi na.»

²³ A Pilati be pye: «Nyàʔá na? Nyàʔá kapee-félile wi kpéʔele?» A be ní i yákpogèle wáa n sɔ̀lɔ tɔzeligi na níì jo: «Wi kóri tiiparigi na.»

²⁴ A Pilati ga gi nyaa woro fánʔa a taa be na í, á kàfulogi si i nɛʔɛgi ni maa, a wi lɔ̀ʔɔ láa n kɔ́yi jée syɛ́ɛnmi nyɛ́nɛ na níì jo: «Mii n mii kɔ́yi jée n yirige syɛɛnsinw naa sìsyaan wolo kéele ni. Yele má gi nyɛ.»

²⁵ A syɛ́ɛnbèle myɛ gi joo wi ma níì jo: «Wi sìsyaanw yàkɛɛ n yɛlɛ wi kòro wolo ní wolo pìíbèle na.»

²⁶ Lǎli bee ni a Pilati Barabasi yirige n yaʔa be ma, níì Zyezu kpúmɔn ní sapile ní, níì wi kaan be ma pe sa wi kóri tiiparigi na.

Sùlasiibèle i peyɛɛ nyɛ́nɛ Zyezu na

²⁷ A fànʔafɔw sùlasiibéle Zyezu kɔ́ri n lége fànʔafɔw tɛɛkòrogo ni, níì kabigi wozanbèlē myɛ kpóʔoro wi na,

²⁸ níì wi waragi níì burogbɔɔ-nyɛ̀nʔɛ le wi na,

²⁹ níì wúuro mígele fànʔafɔ-ǹdɔnnɔ n tɔ́n wi nyúngi ni, níì kàgbeele le wi kàliige kɔ́gi ni. A be fala ni kpùmɔnɔ wi yɛʔɛ̀ ma ní i peyɛɛ nyɛ́nɛ wi na, níì jo: «Mɔ o faana, Zyefubèle fànʔafɔlɔ!»

³⁰ Ní i tɛ́ɛri wáa wi na níì kàgbeeli syɔɔ wi ma n tɛ́ʔɛ ni wi kpúmɔn nyǔngi ni.

³¹ A pe ga peyɛɛ nyɛ́nɛ wi na n kwɔ́ɔ, a be burogbɔɔ-nyɛ̀ɛ́ngi wòlo wi na níì wi tiimaa búroyi le wi na, níì wi kɔ́ri n kári bi sa kóri tiiparigi na.

Zyezu kórili kéele tiiparigi na

³² Lǎli ni pe yiri ni syée lè, a be Sirɛni tári nànwaa nyaa, pe i wi yiri Siimɔn. A be wi kɔ́ri, a wi Zyezu tiiparigi tugo.

³³ A pe ga sáà nan tɛ́ɛgi na be yiri lè Gɔligota, ki kɔ́rɔw wi nyɛ, nyùngbokɔrigɔ tɛ́ɛgi,

³⁴ a be dùvɛɛn pínɛ yasorogo ni n kaan wi ma wi gbaa, a wi ga gi pye n wéle, wi ga fɔ̀lɔ n gi gbaa í.

³⁵ A pe ga wi kóri tiiparigi na n kwɔ́ɔ, a be gɔ̌nw wáa wi yaleri kéele na n di tíla peyɛɛ na.

³⁶ Koro kàdoʔo ma a be tɛ́ɛn yaà ni wi kɔ̀rɔsíi.

³⁷ A be wi kpóoli nyúngo sɛ́bɛ n táriga tiiparigi na wi nyúngi ǹjoʔo ni. A sɛ́bɛw jo: WEE NAA WI NYƐ ZYEZU, WI LE ZYEFUBELE FANʔAFƆLƆ.

³⁸ A be kàyuu-fànʔafɔɔlɔ siin kóri tiipariyaa na wi taana. Wàa maa pye wi kàliige ma, wee si i nyɛ wi kàmɔnɔ ma.

³⁹ A kozɔ̀lɔbèle i wi teeri ní i nyǔnyi kólo,

⁴⁰ níì jo: «Mɔ wee wi jo lè mɔ a kpɔ̀ʔɔrɔli kpaʔa cáan si ní gi faan canya taanri nínge ni, mi miyɛɛ zyɔɔ. Kapye mɔ wi nyɛ Kolocɔlɔɔ Jáaw, mi tìgi tiiparigi na.»

⁴¹ A sáriga-wòlobèle kàfɔɔlɔ, ní làlwaw sɛ́bɛwelebéle, ní wolɛɛbèle wɔ́ɔ i peyɛɛ nyɛ́nɛ wi na kánmi bee na, ní i gi nyuu níì jo:

⁴² «Wi n pèle nikwɔɔlɔ syɔɔ, woro tiimaa si a gbǎn wiyɛɛ zyɔɔ í! Wi si i nyɛ lè Isirayɛli ye fànʔafɔw, ki n yɛlɛ wi tìgi tiiparigi na tɔ́ɔliw ni, wolo si tága wi na.

⁴³ Wi n wi sɔ̀ngumi taʔa Kolocɔlɔɔ na, ki n yɛlɛ Kolocɔlɔɔ í wi syɔɔ tɔ́ɔliw ni, kapye wi kéeli n Kolocɔlɔɔ dɛ́nɛ. Níì cán wi n jo: ‹Mii i nyɛ Kolocɔlɔɔ Jáa.› »

⁴⁴ Kàyuu-fànʔafɔbèle bele pe da kóri lè wi taana, a poro wɔ́ɔ i wi teeri.

Zyezu kùúw kéele

⁴⁵ Nlaʔa cânvugi làla na a tári myɛ kàri yébilimɛ n taa n baa nan cangàrigi na.

⁴⁶ Lǎli bee ni a Zyezu yákpogbɔɔlɔ wáa níì jo: «Eli, Eli, lama sabatani?» Ki kɔ́rɔw wi nyɛ, «Mii Kolocɔlɔɔ, mii Kolocɔlɔɔ, nyàʔá na mɔ mii yaʔa?»

⁴⁷ Syɛ́ɛnbèle pèle maa pye yaà woyérebéle ní, a poro pèle jo: «Wi i yaà ni Elii yiri.»

⁴⁸ Lǎli bee ni a poro wàa fàn n sáà cétɛɛ fɔɔn vinɛgiri ni, níì wi nɔɔri kàgaanna na n baa kaan wi ma wi gbaa.

⁴⁹ A wozanbèle jo: «Yére, wó gi wéle kapye Elii a pan ba wi syɔɔ.»

⁵⁰ A Zyezu níì yákpogbɔɔlɔ wáa níì wi pǐli yaʔa a li kári.

⁵¹ Wéle, fàniw pe da pari lè kpɔ̀ʔɔrɔli kpaʔa fúngo ni, a wi yabi siin, nlaa ǹjoʔo ma n tìgi táàma, a tári cúngo, a kàdɛnɛgboloyi jabagi.

⁵² A nyányi fala n múgu, syɛɛnsinbèle pe da kùu lè, a poro pèle saʔa cére fala n nyán n yiri kúbèle nínge ni.

⁵³ A pe ga yiri nyányi ni Zyezu nyán-yirili kàdoʔo ma, a be jée kècǎngi ni n peyɛɛ dɛ̀ɛn syɛ̀ɛnnɛ saʔa na.

⁵⁴ A sùlasiibèle dabata kàrigafɔlɔ ní bele pe da ni Zyezu kɔ̀rɔsíi ní wi ní lè, a pe ga gi nyaa àmɛɛ tári cúngo lè, ní wɔ́ɔ̀ kérigèle nyaa, gele ge kpéʔele lè, a be fyáa gbanʔama níì jo: «Nǎnw naa wi da tɔ̀nɔ n pye Kolocɔlɔɔ Jáaw kányɛʔɛ ni.»

⁵⁵ Càbala saʔa maa yére léelige, ní i wéle yaà. Cébèle bee maa taʔa Zyezu na n yìri Galile tári ma ní i báara wi ma.

⁵⁶ Marii maa pye ní be ní wi lè Magidala ye wów, ní Mariiwee ní wi lè Zyaki ní Zyozɛfu nɔ́ɔw, n fàra Zebede jáabèle nɔ́ɔ na.

Zyezu tɔ́nni kéele

⁵⁷ A ki ga pye cângwɔɔgi nyɔ́ɔ na, a lɔrɔfɔwaa pan, pe i wi yiri Zyozɛfu, Arimate ye wów, wi tiimaa maa wɔ́ɔ̀ pye Zyezu pìitamawaa.

⁵⁸ A wi kári Pilati ma n sáà Zyezu kúceri nyɛ́ɛri wi ma. A Pilati be pye pe di kaan wi ma.

⁵⁹ A Zyozɛfu Zyezu kúceri láa n sáà pwɔɔ ní fànicàɔn ní,

⁶⁰ níì di le woro tiimaa nyángi ni, níì kàdɛnɛgbɔʔɔ kòlogo n baa tɔ́n nyanweeli na, níì kári. Nyángi maa pye nyanvɔngɔ, gee wi da túgu lè fálaga na.

⁶¹ Marii wi lè Magidala ye wów, ní Marii siin wów maa pye yaà wodɛ́ɛnbéle ní nyángi yɛ́ʔɛ ma.

Nyángi kɔ̀rɔsiile kéele

⁶² Cángi bee nyǐndaliga na, a sáriga-wòlobèle kàfɔɔlɔ ní Farisibèle peyɛɛ gbóʔoro Pilati tɛ́ʔɛ ma, cángi bee maa wɔ́ɔ̀ pye sériw kèlē sámaga-yaʔala canʔa nyǐndaliga.

⁶³ A be sáà wi pye: «Kàfɔw, wolo n sɔ̀ngi n taa jànvaafɔw bee syɛ́ɛnraa na, dee wi da joo lè wi wéemi làla ni níì jo: ‹Canya taanri ga kwɔ́ɔ, mii a nyán yiri.›

⁶⁴ Koro na gi yɛlɛ mɔ í gi joo bi gbàn, jàngó paa nyángi kɔ̀rɔsíi bi taa cányi taanri í ba foro. Kapye koro ban í, wi pìitamabèle a gbǎn pan ba wi yùu, si jo, wi n nyán n yiri kúbèle nínge ni. Jànvaaw bee kàdoʔo si a naa ba pee bi sɔ̀lɔ wozeliw na.»

⁶⁵ A Pilati be yari: «Kpaàwelebèle pèle i yaà n kwɔ́ɔ yaà yele ma, yaa syée ye sa ra gi kɔ̀rɔsíi àmɛɛ yele gi sɔ̀ngí lè.»

⁶⁶ A be kári n sáà nyángi sámaga n tɔ́n níì fɛ̀ɛ kpúmɔn kàdɛnɛgi na, ní wɔ́ɔ̀ kpaàwelebèle télege yaà.