Matye 26 - Cebaara Bible 2010

Zyefubèle yɛɛ̀kinibéle n joo n bɛ̀ɛ Zyezu kpóoli kéele na

¹ A Zyezu ga syɛ́ɛnri bee myɛ joo n kwɔ́ɔ, a wi wi pìitamabèle pye:

² «Yele n gi cán canya siin yi kòro, Sɔ̀lɔ-mí-yaʔali séri si nan. Pe si a Syɔɔn-pya le wi nigoobèle kɔ́yɔ ni pe wi kóri tiiparigi na.»

³ Lǎli bee ni a sáriga-wòlobèle kàfɔɔlɔ ní Zyefubèle wólɛɛbéle peyɛɛ gbóʔoro sáriga-wòlobèle kàfɔgbɔɔɔ kacoolo ni, wee be yiri lè Kayifu.

⁴ A be sáà gi tímana ní peyɛɛ ní àmɛɛ poro a gi pye lè bi sɛ́ɛ, si Zyezu lɛ́ɛlɛ taa cò bi kpóo.

⁵ Kàjáa pe maa jo: «Ki ga yɛlɛ gi pye sériw làla ni í, jàngó kàfulogo a kɔ́ yìri syɛ́ɛnbèle nínge ni í.»

Cewaa n nùndaanna sìnmɛ wo Zyezu nyúngi ni

⁶ Lǎli ni Zyezu pye lè Betanii ni Siimɔn kpáagi ni, wi lè yaanyɛɛnmi fɔ́lɔ,

⁷ a cewaa nùuni wi na ní lɔgbanra nundaanna sinmɛ ní, sìngbopile ni, n baa wo wi nyúngi ni n wi yaʔa lìíli na.

⁸ A pìitamabèle ga gee bee nyaa, a be fúnyi fala n tanʔa a be jo: «Nyàʔá gi nyɛ kálagili naa nyúngo?

⁹ Ki maa yɛlɛ pe dée sǐnmi naa pára lɔgbanra na bi kaan foomɔfɔbèle ma.»

¹⁰ Amɛɛ Zyezu gi cán lè, a wi be pye: «Nyàʔá na yele wári nya céw na?

¹¹ Kacànna wi pye mii na. Níì cán foomɔfɔbèle a pye naa ní yele ní làla o làla, kàjáa mii a pye ní yele ní làla o làla í.

¹² Wi n nùndaanni naa sìnmɛ wo mii céri na mii kùúw yɛ́ʔɛ na.

¹³ Mii a gi joo yele ma kányɛʔɛ ni, syɛ́ɛnbèle ga ni Kolocɔlɔɔ Syɛɛnjóocǎnri nyuu dulunyanw ni tɛʔɛ o tɛʔɛ ni, gee céw naa kpéʔele lè, pe a wɔ́ɔ ra gi nyuu yaà, pe a fɛ̀ʔɛ wi na í.»

Zyudasi i caa bi Zyezu le sáriga-wòlobèle kàfɔɔlɔ kɔ́yɔ ni

¹⁴ Koro kàdoʔo ma a wàa yìri kɛɛ ní siinw nínge ni n kári sáriga-wòlobèle kàfɔɔlɔ ma, pe i wi yiri Zyudasi Isikariyɔti.

¹⁵ A wi sáà be pye: «Mii ga wi le yele kɔ́yi ni, nyàʔá yele a kaan mii ma?» A be wálifiio tɛɛyɛ toko ní kpɔrigɔ córo n kaan wi ma.

¹⁶ Lǎli bee ni a wi fala n séli ni làrijànna caa bi Zyezu le be kɔ́yi ni.

Zyezu n Sɔ̀lɔ-mí-yaʔali séri lìile lìi ní wi pìitamabèle ní

¹⁷ Levé fun búruw séri cânzelige na, a pìitamabèle pan Zyezu ma n baa wi pye: «Sán mɔ caa wolo í sa Sɔ̀lɔ-mí-yaʔali séri lìile sámaga mɔ ma, mɔ í lìi?»

¹⁸ A wi be yari: «Yaa syée ye sa jée kěgi ni nànwaa ma, yé wi pye, Tamafɔw n jo woro lǎli n nan, koro na woro ní woro pìitamabèle a ba Sɔ̀lɔ-mí-yaʔali séri lìile lìi mɔ kpáagi ni.»

¹⁹ A pìitamabèle kári n sáà gi kpéʔele àmɛɛ Zyezu gi joo be ma lè, níì Sɔ̀lɔ-mí-yaʔali séri lìile sámaga.

²⁰ A ki ga pye cânjeevɔngi na, a wi tɛ́ɛn ni líi ní wi pìitamabèle kɛɛ ní siin ní.

²¹ N be yaʔa lìíli na, a wi be pye: «Mii a gi joo yele ma kányɛʔɛ ni, wàa i naa yele níngi ni, wee wi a mii le lè nigoobèle kɔ́yɔ ni.»

²² A be yɛ́ɛyi tɔ̀nɔ n tanʔa be na gbanʔama. A be fala n séli ni wi yíbe nibin nibin níì jo: «Mii lé, Kàfɔw?»

²³ A wi be yari: «Wee wi wi kɔ́gi nii lè ní mii ní pɛ́ɛli ni, wee bee wi a mii le be kɔ́yi ni.

²⁴ Syɔɔn-pya tɔ̀nɔ́ i syée àmɛɛ ki da sɛ́bɛ lè wi kéeli na. Kàjáa wɔʔɔli a pye nǎnw bee na, wee wi a Syɔɔn-pya cǒ kaan lè! Ki da caà yɛlɛ pe dée nǎnw bee see í.»

²⁵ Zyudasi wi lè wi levɔw, a woro wi yari: «Tamafɔw, mii wi lé?» A wi wi pye: «Ɛɛn.»

Lìizanni kéele

²⁶ Lǎli ni be pye lè lìíli na, a Zyezu búruw láa níì bariga kaan Kolocɔlɔɔ ma níì wi kabagi n lɛɛ pìitamabèle na níì jo: «Ye wi syɔɔ ye lìi. Wee naa wi nyɛ mii céri.»

²⁷ Koro kàdoʔo ma a wi yagbaala láa níì bariga kaan Kolocɔlɔɔ ma níì li kaan be ma níì jo: «Ye myɛ ye gbaa li ni.

²⁸ Níì cán wee naa wi nyɛ mii sìsyaanw, joogaanni sìsyaan, wee wi wo lè syɛ̀ɛnnɛ saʔa kapeegéle kusulugo kéele na.

²⁹ Mii a gi joo yele ma kányɛʔɛ ni, nlaʔa níjanʔa na mii a ní ɛrɛzɛn tírire yasanra lógi naa kàa gbaa nyáana í, bi taa cángi í ba nan gee ni mii a ní gi gbaa lè ní yele ní kavɔn mii Tóow fànʔa ni.»

³⁰ Koro kàdoʔo ma a pe ga ŋùu n kwɔ́ɔ, a be yiri n kári Olivye tíiri nyanbelege ma.

Zyezu n jo Pyɛri a woro cée

³¹ Lǎli bee ni a Zyezu be pye: «Yele myɛ a mii cée yébiligi naa ni. Níì cán ki maa sɛ́bɛ níì jo: ‹Mii a bànaʔaw kpúmɔn kpóo, bàtogi si cariga.›

³² Mii si ga baa nyán, mii a kári Galile tári ma yele yɛ́ʔɛ na.»

³³ A Pyɛri wi pye: «Alí bele myɛ ga mɔ cée, mii a tée mɔ cée í.»

³⁴ A Zyezu wi yari: «Mii a gi joo mɔ ma kányɛʔɛ ni, àlí yébiligi naa tiimaa ni sáni gòpɔ́w í nyɛni lè, mɔ a mii cée tɔlɔyɔ taanri.»

³⁵ A Pyɛri wi yari: «Alí ki ga yére mii í kùu ní mɔ ní, koro ki a tɔ́ɔ pye, mii a tée mɔ cée í.» A pìitamabèle wozanbèlē myɛ wɔ́ɔ̀ fala ni syɛɛnnijanri nyuu.

Zyezu i nyɛ́ɛri Zyɛtisemane ma

³⁶ Lǎlee ni Zyezu ní wi pìitamabèle nan lè tɛ́ɛgi na, gee be yiri lè Zyɛtisemane, a wi be pye: «Ye tɛ́ɛn nɛɛ naa, mii si kári yɛʔɛ̀ ma bi sa nyɛ́ɛri.»

³⁷ A wi Pyɛri ní Zebede jáabèle siin kɔ́ri n kári. A funjurugori ní fúngi wɔʔɔgɔ sáà séli n jée wi ni.

³⁸ A wi be pye: «Mii fúngi n curugo mii na gbanʔama, fwɔɔ n baa nan kùúw na, ye kòro nɛɛ naa, yé pye nyɛ̀nɛ na ní mii ní.»

³⁹ A wi ga sɛ̀ʔɛrɛ yɛʔɛ̀ ma cɛɛri, a wi too n wi yɛ́ɛgi cíbele ní i nyɛ́ɛri níì jo: «Mii Tóow, kapye ki a gbǎn kpéʔele, ki n yɛlɛ yagbaagi naa í léeli mii na! Kàjáa ki ga yɛlɛ mii nyɛ́nɛ kéeli í kpéʔele í, fwɔɔ mɔ nyɛ́nɛ wóli.»

⁴⁰ A wi ga lúru n pan pìitamabèle ma, a wi baa be nyaa pe i ŋúnɔ. A wi Pyɛri pye: «Alí yele ga gbàn lé n kòro nyɛ̀nɛ na ní mii ní bi lɛ́ɛri nibin kwɔ́ɔ í?

⁴¹ Ki n yɛlɛ ye kòro nyɛ̀nɛ na yáā nyɛ́ɛri koro ga pye yarigaa a kɔ́ yele kárima bi lége kapeele ni í. Ki láagi i nyɛ syɔɔn pili na, kàjáa wi céri fànʔa n cɛ́rɛ.»

⁴² A wi núngo be taana tɔziin wógi na, n sa ni nyɛ́ɛri níì jo: «Mii Tóow, kapye mii a gbǎn kòro yagbaagi naa sìngbaa ni í, ki n yɛlɛ mi mɔ nyɛ́nɛ kéeli yaʔa li foro.»

⁴³ A wi ga lúru n pan, a wi ní baa be nyaa pe i ŋúnɔ, níì cán ŋúnɔmi maa be jáa gbanʔama.

⁴⁴ A wi be yaʔa yaà níì kári n sa ni nyɛ́ɛri tɔdaanri wógi na, ní níì syɛɛnnijanri joo.

⁴⁵ A wi ga lúru n pan pìitamabèle ma a wi baa be pye: «Yaa ŋúnɔ tɔ́ɔliw ni, ye ŋɔ́n ye daa! Ye wéle, lǎli n nan, pe n Syɔɔn-pya le kapeebyebèle kɔ́yɔ ni.

⁴⁶ Ye yìri wo kári. Ye wéle, wee wi a mii le lè be kɔ́yi ni, woro wi nan n kwɔ́ɔ wee.»

Zyezu cǒli kéele

⁴⁷ Lǎli ni wi sèʔê pye ni nyuu lè, a Zyudasi pan, wi lè kɛɛ ní siinw ni. A syɛ̀ɛnnɛ saʔa pan ní wi ní ŋɔséebéle ní kàgbeegēle si maa pye be ma, sáriga-wòlobèle kàfɔɔlɔ ní Zyefubèle wólɛɛbéle pe da be tun.

⁴⁸ Woro wee wi nyɛ lè wi levɔw be kɔ́yi ni, wi maa joo n tɛ̀ɛn be na níì be pye: «Mii ga sáà wee syɔɔnri lè, woro wii, ye wi cò.»

⁴⁹ A wi fala n nùuni Zyezu na níì wi pye: «Mɔ o faana, Tamafɔw.» Níì wi syɔɔnri syɔɔnri.

⁵⁰ A Zyezu wi yari: «Ni tàannyɛnnɛ, gee mɔ pan ba kpéʔele lè, mi gi kpéʔele.» Lǎli bee ni a be fala n kpóʔoro Zyezu na n wi cò.

⁵¹ Bele be da pye lè ní Zyezu ní, a poro wàa wi ŋɔséew kɔ́n n sáriga-wòlobèle kàfɔgbɔɔɔ falipyeo kpúmɔn n líigi láʔa wi na.

⁵² A Zyezu wi yari: «Mi mɔ ŋɔséew lúrugo mi le kpàfogi ni. Níì cán bele myɛ be ŋɔséebèle lée lè, pe a wɔ́ɔ bele bee kpóo ní ŋɔséebéle ní.

⁵³ A mɔ tɔ̀ʔɔ́ sɔ̀ngí lé mii a gbǎn mii Tóow nyɛ́ɛri jàngó wi nyɛ̀ʔɛni tundunbéle kaan mii ma pe nɛʔɛ sɔ̀lɔ lezyɔnbéle kɛɛ ní siin na í láà?

⁵⁴ Ki ga pye nya, mɛ̀ɛ́ Kolocɔlɔɔ syɛɛnsɛbɛri a gbǎn foro bi sɛ́ɛ, dee di joo lè, fwɔɔ gi pye kánmi naa na?»

⁵⁵ Lǎli bee ni a Zyezu gi joo syɛ́ɛnmi ma níì jo: «A yele pan lé ba mii cò ní ŋɔséebéle, ní kàgbeegēle ní àmɛɛ mɔ lóʔo lè kàyuuo mii nyɛ? Mii maa ni tɛ̀ɛ́n yele níngi ni canʔa o canʔa kpɔ̀ʔɔrɔli kpaʔa ni ni syɛ́ɛnbèle tama, yele ga taa si mii cò í.

⁵⁶ Kàjáa gee naa myɛ n kpéʔele jàngó gi foro àmɛɛ kanyaajoobèle da gi sɛ́bɛ lè.» A pìitamabèle myɛ fàn n cariga wi na.

Pe n Zyezu yérige kútiijoobèle yɛ́ʔɛ ma

⁵⁷ Bele be Zyezu cò lè, a be wi kɔ́ri n kári Kayifu ma, wi lè sáriga-wòlobèle kàfɔgbɔɔɔ, beè làlwaw sɛ́bɛwelebéle ní wolɛɛbèle da peyɛɛ gbóʔoro lè.

⁵⁸ A Pyɛri taʔa wi na, wi si ga fɔ̀lɔ n nùuni wi na í, n taa n sáà nan sáriga-wòlobèle kàfɔgbɔɔɔ kacoolo na, níì jée n tɛ́ɛn ní falipyebèle ní, jàngó woro í gi kwɔ́ɔmi nyaa.

⁵⁹ A sáriga-wòlobèle kàfɔɔlɔ ní Sanedirɛnw myɛ i jànvaa séera kéelaa caa bi jo taʔa Zyezu na, koro ga pye poro í wi taa kpóo.

⁶⁰ Alí àmɛɛ jànvaa séerafɔbèle wírè pan lè wonɛʔɛbéle ní, pe ga gbàn n jànvaa kéelaa taa í. Koro kàdoʔo ma a pèle siin pan

⁶¹ n baa jo: «Nǎnw naa n jo woro a gbǎn kpɔ̀ʔɔrɔli kpaʔa cáan, si gi faan canya taanri nínge ni.»

⁶² A sáriga-wòlobèle kàfɔgbɔɔɔ yìri n yére níì wi yari: «Mɔ ga yarigaa taa bi joo wii ì? Nyàʔá be nyuu ni taari mɔ na?»

⁶³ A Zyezu pyèri. A sáriga-wòlobèle kàfɔgbɔɔɔ wi pye: «Ki n yɛlɛ mi kàli Kolocɔlɔɔ woweew na, mí gi joo wolo ma kányɛʔɛ ni kapye mɔ wi nyɛ Kirisi, Kolocɔlɔɔ Jáaw.»

⁶⁴ A Zyezu wi yari: «Ɛɛn, mii wii. Mii si a gi joo yele ma, yele a kɔ́ Syɔɔn-pya nyaa wodɛ́ɛɔn ní séew myɛ fɔ́lɔ Kolocɔlɔɔ kàliige ma, si wɔ́ɔ kɔ́ wi nyaa waa maa fàfaanyi ni.»

⁶⁵ A sáriga-wòlobèle kàfɔgbɔɔɔ wiyɛɛ búroyi sulugu níì jo: «Wi n Kolocɔlɔɔ mɛ́ɛgi kálagi. Nyàʔá na wolo ní i séerafɔɔlɔ caa? Yele n Kolocɔlɔɔ mɛ́ɛkalagi-syɛ́ɛnri lóʔo wi nyɔ́ɔgi na tɔ́ɔliw ni.

⁶⁶ Nyàʔá yele sɔ̀ngí wi kéeli na?» A be wi yari: «Wi n yɛlɛ ní kpóolo ní.»

⁶⁷ A be i tɛ́ɛri wáa wi yɛ́ɛgi ni ní i wi cínɛ ní kágungèle ní, pèle si i wi kpúmɔn ní kadaagèle ní

⁶⁸ níì jo: «Kirisi, wìí wi mɔ kpúmɔn? Mi wi tɛ̀ɛn wolo na.»

Pyɛri n Zyezu cée

⁶⁹ Pyɛri si maa pye kàfugi na wodɛ́ɛɔn ní kàcooli ni. A falipyecewaa pan n baa wi yari: «Mɔ maa wɔ́ɔ̀ pye ní Zyezu ní, wi lè Galile ye wów.»

⁷⁰ Kàjáa a wi gi kábala pe myɛ nyɛ́nɛ na níì jo: «Gee mɔ nyuu lè, mii ga gi cán í.»

⁷¹ A Pyɛri yiri kàfugi na n sáà yére nìkpaangi ni. A falipyecewaa nikwɔɔ wi nyaa níì gi joo tɛ́ɛgi bee syɛ̀ɛnnɛ ma níì jo: «Wee naa maa pye ní Zyezu ní, wi lè Nazarɛti ye wów.»

⁷² A wi níì gi kábala níì kàli níì jo: «Mii ga nǎnw bee cán í.»

⁷³ A cɛɛri ga pye, bele be pye yaà lè woyérebéle ní, a poro nùuni Pyɛri na n baa wi pye: «Mɔ i nyɛ syɛ́ɛnbèle bee wàa kányɛʔɛ ni, níì cán mɔ jooganmi n gi tɛ̀ɛn.»

⁷⁴ A wi fala ni joobeemi nyuu ní i kɛ̀ɛ́ níì jo: «Mii ga nǎnw bee cán í.» A gòpɔ́w fala n nyɛni.

⁷⁵ A Pyɛri Zyezu syɛ́ɛnri sɔ̀ngi n taa dee wi da joo woro ma lè níì jo: «Sáni gòpɔ́w í nyɛni lè, mɔ a mii cée tɔlɔyɔ taanri.» A wi yiri kàfugi na n sa ni nyaan gbanʔama.