Matye 24 - Cebaara Bible 2010

Zyezu n kpɔ̀ʔɔrɔli kpaʔa cáanna kéele joo

¹ A Zyezu ga yiri kpɔ̀ʔɔrɔli kpaʔa ni ni syée, a wi pìitamabèle nùuni wi na n baa kpɔ̀ʔɔrɔli kpaʔa kàcoolo tɛ̀ɛn wi na kánmee na pe li faan n sɛ́ɛ lè.

² A wi be pye: «Yele ga yáriri naa myɛ nyaa í? Mii a gi joo yele ma kányɛʔɛ ni, kàdɛnɛgaa faala a kòro kàa na nɛɛ naa í, pe a ba yi myɛ cáan.»

Kagbanyi ní wɔʔɔyi kéele

³ A wi ga sáà tɛ́ɛn Olivye tíiri nyanbelege na, a wi pìitamabèle nùuni wi na, pe yagwɔɔlɔ, n baa jo: «Mi gi joo wolo ma, làlìí ni kérigèle bee a ba pye? Nyàʔá fɛ̀ɛfeleo wi a mɔ lúrubanni ní lǎli naa kwɔ́ɔmɔ tɛ̀ɛn wolo na?»

⁴ A Zyezu be pye: «Yaa yeyɛɛ kɔ̀rɔsíi, yele a kɔ́ syɔɔn faala yaʔa wi yele fáana pùuni í.

⁵ Níì cán syɛ̀ɛnnɛ saʔa a pan bi ba ra mii mɛ́ɛgi nii peyɛɛ na si jo poro be nyɛ Kirisi, si pèle saʔa fáana pùuni.

⁶ Yele si a kɔ́ gi lóʔo kapɛɛngèle n too tátɛɛyaa ni, si wɔ́ɔ kapɛɛngèle tìnmɛ lóʔo. Ki si ga yɛlɛ yele í da fɛ̀ɛgí í, níì cán kérigèle naa myɛ n yɛlɛ ge kpéʔele gbɛnʔɛnɛ. Kàjáa gee bee ban ki a pye gi kwɔ́ɔmi í.

⁷ Syɛɛnfelegaa a ba ra tuun kàa na, fàngaa si wɔ́ɔ ba ra tuun kàa na, kateekpoloyi a wɔ́ɔ ba ra tuun, tári si wɔ́ɔ cúngo tɛɛyaa ni.

⁸ Kérigèle naa myɛ ke a pye wɔʔɔli sélimɛ.

⁹ Lǎli bee ni pe a ra yele kaangi paa wɔʔɔ, sáā yele kúu, yele kéeli si syɛɛnfeleyi myɛ bɛɛn mii mɛ́ɛgi kéele na.

¹⁰ Lǎli bee ni pèle saʔa a lúru kàdoʔo ma, sáā peyɛɛ nii pe nigoobèle kɔ́yɔ ni, si wɔ́ɔ peyɛɛ bara.

¹¹ Jànvaafɔɔlɔ saʔa a yìri, pe si a ba pèle saʔa fáana pùuni.

¹² Kakolobyeri a ba nɛʔɛ bi sɔ̀lɔ, fwɔɔ koro a gi kaan syɛ̀ɛnnɛ saʔa tamaga í ba cɛ́rɛ.

¹³ Kàjáa syɔ́ɔnwee wi ga fɔ̀rɔgi kpàraco lè n baa nan gi kwɔ́ɔmi na, wi a syɔɔ.

¹⁴ Syɛɛnjóocǎnri naa di nyɛ lè fǎngi wóro, ti a kɔ́ ba joo dulunyanw tɛ́ɛyɛ myɛ ni bi pye syɛɛnfeleyi myɛ ma séera, gi kwɔ́ɔmi si náa ba nan.

Gàlagíw kapeekpɔʔɔ

¹⁵ «Lǎli ni yele ga kɔ́ɔ̀ ‹kálagili kapeekpɔʔɔ› nyaa lè, gee syɛ́ɛnrɛ kanyaajoow Danyɛli da joo lè, a gi yére tɛɛcǎngi ni, (wee wi tɛ́ɛgi naa syɛ́ɛnrɛ wéle ni nyuu lè, ki n yɛlɛ wi di kɔ́rɔw cán)

¹⁶ lǎli bee ni bele be nyɛ lè Zyude tári ni, ki n yɛlɛ be fàn be kári nyanbeleyi ma.

¹⁷ Wee wi ga pye lè binge ǹjoʔo ni, ki ga yɛlɛ wi tìgi wi jée gi ni bi jo woro a wi yáriri láa í.

¹⁸ Wee wi ga wɔ́ɔ̀ pye lè seʔe ni, ki ga yɛlɛ wi lúru kári kàʔa ma sa wi búrogi láa í.

¹⁹ Ki si a tɔ̀nɔ́ gbàn fícarigèle fɔ̀ɔlɔ ma cányi bee ni, n fàra bele na pe a ra pìibēle kaangi paa ŋɔri lè!

²⁰ Ki n yɛlɛ yaa nyɛ́ɛri jàngó yele kàfyaali a kɔ́ pye weere làla ni í, wàlá cândɛnɛgɛ canʔa ni í.

²¹ Níì cán wɔʔɔgbɔʔɔ a ba pye lǎli bee ni, gee félege gi lè ki ga kɔ́ɔ̀ kpéʔele í nlaa yaà dulunyanw sélimɛ na n baa nan níjanʔa na, ki félegi si a ní wɔ́ɔ kpéʔele gee bee kàdoʔo ma í.

²² Kapye Kolocɔlɔɔ da gi kɔ̀rirɔ bi kàa yirige cányi bee ni í, syɔɔn faala mǎà dée syɔɔ í, kàjáa wi a kàa yirige yi ni wi syɛɛnnyɛnɛ-wòlobèle kéele na.

²³ Lǎli bee ni syɔɔnwaa ga yele pye: ‹Kirisi i naa wee,› koro ga jáa: ‹Wi i yaà wee,› ki ga yɛlɛ ye tága gi na í.

²⁴ Níì cán kirisi-fáanabéle, ní kanyaajoo-fáanabéle a ba yìri, sáā fɛ̀ɛbēle ní kakpoloyo kpéʔele, jàngó pe fanʔa ga taa poro í Kolocɔlɔɔ syɛɛnnyɛnɛ-wòlobèle fáana pùuni.

²⁵ Wéle, a mii gi joo n tɛ̀ɛn yele na wii sáni ki ba kpéʔele lè.

²⁶ Koro na pe ga yele pye: ‹Ye wéle, wi i yaà fìími tára ni,› ki ga yɛlɛ yele í kári yaà í. Koro ga jáa pe ga jo: ‹Ye wéle, wi i yaà kpáagi fúngo ni,› ki ga yɛlɛ ye tága gi na í.

²⁷ Níì cán àmɛɛ nyɛ̀ʔɛni gáà nyɛ́ʔɛnɛ lè, li gbɛ̀ɛ́nmi n si yìri canʔafolomɔ ma, bi nan canʔajeemɛ na kánmee na lè, ànbée Syɔɔn-pya lúrubanni a wɔ́ɔ ba pye.

²⁸ Yakuugo ga pye tɛ́ɛgee ni lè, nɛɛ bee kàcɔʔɔri a tiyɛɛ gbóʔoro.

Syɔɔn-pya lúrubanni kéele

²⁹ «Wɔʔɔli bee canya kàdoʔo ma, cángi a kàri yébilimɛ terire, yégi a ní fílige í, ŋɔripiigèle sáā yìrigí nyɛ̀ʔɛni na bi ba ra tuun tári na, nyɛ̀ʔɛni fàngboloyo a cúngo.

³⁰ Lǎli bee ni pe a Syɔɔn-pya fɛɛw nyaa nyɛ̀ʔɛni na, tári syɛ̀ɛnnɛ myɛ sáā nyaan bàā peele, si wɔ́ɔ Syɔɔn-pya nyaa waa maa fàfaanyi ni ní séew, ní nìjangbɔɔri ní.

³¹ Lǎli bee ni wi a wi tundunbèle tun ní búruw wìimɛ yákpogbɔɔlɔ ní, pe a sa wi syɛɛnnyɛnɛ-wòlobèle kpóʔoro bi yìri dulunyanw kàbanya myɛ sicɛrɛ na, beè nyɛ̀ʔɛni ní tári tiyɛɛ vàra lè.

Tamana děsyaantiigi kéele na

³² «Ye wɔ́ɔ ye děsyaantiigi kéele wéle. Ki ga kɔlɔ, á káganyi ba ni wâburo yirigi lǎli ni lè, yele n gi cán wɔ̀ɔ́gi n nùuni.

³³ Anbée si gi wɔ́ɔ̄ nyɛ, yele ga kɔ́ɔ̀ kérigèle naa myɛ nyaa, ki n yɛlɛ ye gi cán Syɔɔn-pya n nùuni naa, fwɔɔ n baa nan kpàánweeli na.

³⁴ Mii a gi joo yele ma kányɛʔɛ ni, lǎli naa syɛ̀ɛnnɛ a kwɔ́ɔ í bi taa kérigèle bee myɛ í ba kpéʔele.

³⁵ Nyɛ̀ʔɛni ní tári a kwɔ́ɔ, kàjáa mii syɛ́ɛnri a tɔ̀nɔ́ kwɔ́ɔ í.

Kolocɔlɔɔ nibin wi làrigwɔɔli cán

³⁶ «Syɔɔn faala ga cángi bee ní lǎli bee cán í, àlí nyɛ̀ʔɛni tundunbéle yoo, Jaafɔw yoo, kapye Tofɔw nibin ban í.

³⁷ Amɛɛ ki da pye lè Nowe lǎli ni, ànbée ki a wɔ́ɔ ba pye Syɔɔn-pya laribanni ni.

³⁸ Níì cán sáni lòkpɔɔgi í tári tɔ́n lè, syɛ́ɛnbèle maa kòro ni líi ní i gbo, ní i cèpɔriyi kpéʔele, ní wɔ́ɔ i be pìíbèle kaangi nǎnbèle ma, pe maa ni gee bee myɛ kpéʔele n taa n baa nan Nowe cânjeegi na kɔ́rɔkpɔɔgi ni.

³⁹ A be kòro gi sìnjánmi ni n taa a lòkpɔɔgi baa pe myɛ wáa. Anbée si Syɔɔn-pya lúrubanni a wɔ́ɔ ba pye.

⁴⁰ Nànbēle siin a pye seʔe ni, pe a wàa nibin láa si wàa yaʔa,

⁴¹ càbala siin a pye da tire tírekpɔʔɔ na, pe a wàa nibin láa si wàa yaʔa.

⁴² Koro na gi yɛlɛ yaa kɔ̀rɔsíi, níì cán cángee na yele Kàfɔw a pan lè, yele ga gi cán í.

⁴³ Ye gi cán kpáagi fɔ́lɔ ga maa kàyuuw làribanna cán yébiligi ni, wi mǎà dée kòro nyɛ̀nɛ na, wi a dée fɔ̀lɔ kàyuuw í woro kpáagi fùru í.

⁴⁴ Koro na gi yɛlɛ ye wɔ́ɔ yeyɛɛ zámaga ye yaʔa, níì cán Syɔɔn-pya a pan làlaa ni, lee ni lè yele o wi sɔ̀ngí í.

Falipyejǎnw ní falipyepeew kéele

⁴⁵ «Wìí wi nyɛ falipyejǎnw níì cìlige, wee wi Kàfɔw a télege wi narigbaagi syɛ̀ɛnnɛ yɛ́ʔɛ na lè, jàngó waa be lìíli kaangi be ma li làrigaanni ni?

⁴⁶ Falipyew bee kàfɔlɔ ga pan ní baa wi nyaa wi i gi kpéʔele kánmi bee na, wee bee i nyɛ dùba pyà.

⁴⁷ Mii a gi joo yele ma kányɛʔɛ ni, wi a ba wi télege wi pye woro kɔ́lɔ yáriri myɛ kàrigafɔlɔ.

⁴⁸ Kàjáa wi ga pye falipyepeeo, ní i gi sɔ̀ngí wiyɛɛ fúngi ni n jo: ‹Mii kàfɔw a wári pan í,›

⁴⁹ níì fala ni wi falipyenyɛnbèle kpúmɔn ní i pìnɛ́ ni líi ní i gbo ní singbaadinbèle ní.

⁵⁰ Falipyew bee kàfɔlɔ a pan cangaa, cángee gi nyɛ lè wi o gi sɔ̀ngí í, ní lǎlee li nyɛ lè wi ga li cán í.

⁵¹ Wi si a ba wi wɔʔɔ gbanʔama si wi yaʔa wi wi lɛɛli taa ní syɛɛnjóotɛɛyi siin joofɔɔlɔ ní pe tɛɛkòrogi ni, beè syɛ́ɛnbèle a ra sùpiigèle wáa sáā gǎngèle kúru lè.